اى اللى المفروض اعمله قبل و بعد عملية تركيب دعامة العضو الذكرى ؟
خلاص قررت انك هتركب دعامة العضو الذكرى عشان تعالج ضعف الانتصاب ، و ترجع تانى تمارس حياتك الزوجيه بكل ثقة ، طيب تعالى نعرف مع بعض دلوقتى ازاى تجهز نفسك للعمليه ، و اى الحاجات اللى لازم تاخد بالك منها بعد العمليه عشان نبعد عن اى مضاعفات ممكن تحصل ، و ازاى اصلا اتأكد ان العمليه كده نجحت
و خلينا نبدأ بالترتيبات اللى المفروض تكون بتعملها قبل العمليه
- تحليل صورة دم كاملة (CBC)
- تحليل سكر تراكمي (HbA1C) ، عشان نتأكد من مستوى السكر
- تحليل سيولة (PT , PC)
- تحليل وظائف كلى و كبد
- و هنحتاج نعمل رسم قلب(ECG) ، لو الشخص اللى هيركب الدعامة سنه كان اكبر من 40 سنه ، او نعمل موجات صوتيه على القلب (Echocardiography) ، لو الشخص اللى هيعمل العمليه كان سنه اكبر من 60 سنه
- لازم نبعد عن اننا ناخد ادويه سيولة قبل العملية بكام يوم .
- هنمتنع عن الاكل و الشرب قبل العمليه بمده متقلش عن 8 ساعات
- هنحتاج كمان اننا نحلق الشعر اللى موجوده فى منطقة البطن من اول السرة لحد منطقة العانه و حوالين العضو الذكرى
و بكده نكون جهزنا نفسنا كويس للعمليه ، و تعالوا بقى دلوقتى نعرف اى اللى المفروض اننا ناخد بالنا منه بعد العمليه ؟
- لازم نلتزم بعد العمليه اننا ناخد الادويه بتاعتنا بأنتظام و اللى هتكون عباره عن مسكنات ومضادات حيوية
- لازم كمان ناخد بالنا من ان الجرح مايجيش عليه مايه لمده 3 او 4 ايام بعد العمليه
- هنحتاج اننا نغير على الجرح كل يوم و نطهره لمده 3 او 4 ايام بعد العمليه
- ونحاول اننا منعملش اى مجهود كبير او نشيل اى حاجة تقيله فى اول فتره بعد العمليه
- لازم نبعد عن العلاقة الزوجيه و نحاول ان العضو ميحصلهوش انتصاب لمده 4 او 6 اسابيع لحد ما الجرح يلتئم
- لو بعد العمليه حسينا ان الجرح وارم شويه دى حاجة طبيعيه و ممكن نعمل كمدات تلج عشان الورم يروح
طيب بعد ما عرفنا اى اللى المفروض نعمله قبل و بعد العمليه ، تعالوا دلوقتى نعرف كام حاجة لو اتوفرت فى عمليه تركيب الدعامة هنضمن ان العمليه انشاء الله هتكون ناجحة بنسبة 100%
- لازم المكان اللى هتعمل فيه العمليه يكون متوفر فيه اعلى درجات التعقيم لاننا بنزرع جسم غريب جوه جسمك و كمان فى منطقة حساسه جدا فى الجسم ،فعشان ميحصلش اى عدوي تخلى الجسم يرفض الدعامة ، و تتسب اننا نعيد العمليه مره تانية لازم المكان يكون متعقم كويس جدا و دى اهم خطوه فى نجاح العملية .
- لازم وقت العملية ميزدش عن 45 دقيقة ، عشان منرهقش انسجة العضو الذكرى، و يحصلها التهاب .
- لازم نتأكد اننا بنركب دعامة مناسبة لطول العضو و قطره مينفعش اصغر من العضو ، لان كده العضو هيحصله انحناء و هيكون شكله غريب وقت الانتصاب ، و راس العضو هتكون فاضية ، و كمان الدعامه فى الحالة دى مرونتها بتكون قليلة و ممكن تتكسر ، و مينفعش اطول لانها هتسبب وجع وقت الانتصاب ، و ممكن توصل لانها تخرم راس العضو
- لو انت مريض سكر لازم السكر يكون مظبوط و خصوصاّ لو السكر مش مستقر فلازم نزبط مستوى السكر التراكمى و العشوائى عشان ميحصلش التهابات ، لان السكر معروف انه بيضعف المناعة و بيقلل قدرة الانسجة على انها تستوعب الاجسام الغريبة ، عشان كده لازم نحافظ على السكر عشان نساعد ان الجرح يلتأم بسرعة و عشان ميحصلش اى التهابات .
- لو الشخص اللى هيركب الدعامة كان مريض ضغط لازم الضغط يكون مظبوط .
طب لو حصل أي خلل او لا قدر الله حصل عدوي بعد التركيب وده نادرجدا انه يحصل، بسبب ان المكان اللى عملنا فى العمليه مكنش متعقم كويس ، او لو حسينا بوجع شديد فى العضو الذكرى بعد العمليه بسبب اننا مكناش مختارين مقاس الدعامة المناسب للعضو الذكرى
وقتها الحل الوحيد اللى هيكون قدامنا هو اننا نعيد العمليه مره تانيه ، و نشيل الدعامة و نركب دعامة تانيه ،
طب لو ده حصل ممكن اشيل الدعامة خالص و ماركبش دعامة غيرها ؟
ينفع طبعا ؛ بس وقتها هنرجع تانى لنفس المشكله اللى ركبنا بسببها الدعامة و هى ان مفيش انتصاب فى العضو الذكرى
فى النهايه خلينى اقولك ، ان عشان العمليه تنجح لازم ناخد بالنا ان المكان اللى هنعمل فيه عملية تركيب الدعامة يكون متعقم كويس ،و لازم الدكتور اللى هيعمل العمليه يكون عارف انه لازم يدى للمريض قبل العمليه جرعه مضاد حيوى عشان نمنع اى فرصة ان يحصل عدوى بعد تركيب الدعامة ، و يكون عنده خبرة كبيره عشان يعرف يحدد مقاس الدعامة المناسب للعضو الذكرى ،
و دلوفتى لو عاوزين نعرفوا معلومات اكتر عن الفرق بين الدعامة المرنه و الدعامة الهيدروليك ممكن تقروا المقال ده