دوالى الخصية فى سؤال و جواب
حمل زوجتك اتأخر ده غير انك بدأت تحس بوجع فى الخصية ، او ان شكل الخصية متغير، و سمعت عن دوالى الخصية و عرفت انها ممكن تكون السبب فى تأخر الحمل ، و ممكن كمان تكون السبب فى كل الاعراض اللى انت حاسس بيها، فمبقتش عارف المفروض تعمل اى وفيه فى دماغك دلوقتى اسئله كتير مش لاقى ليها اجابه ، فى الاول لازم تطمن ، دوالى الخصية مش حاجة تقلق و علاجها بسيط جدا و خلينى دلوقتى اجاوبك على اغلب الاسئلة اللى بسمعها من اى مريض عنده دوالي على الخصية عشان تطمن اكتر
س 1 : ازاى اعرف ان انا عندي دوالي؟
فى البداية لازم نعرف ان مش دايما بيكون فى اعراض للدوالى ، و خصوصاّ لو كانت من الدرجة الاولى و مش بنعرفها غير لو احنا متعودين اننا نفحص نفسنا و عارفين الشكل و الملمس الطبيعى للخصية ، فلما بنلاقى اختلاف عن اللى احنا متعودين عليه و بنكشف ، بنكتشف اننا عندنا دوالى ، لكن فى بعض الحالات ممكن تضهر عليها اعراض زى :
- تورم فى كيس الصفن .
- لو لمسنا كيس الصفن و لقينا فى تضخم في أوردة الخصية .
- لو حسينا بألم و تقل في الخصية ، زى ما يكون حد شادد الخصية لتحت ، خصوصا لو وقفنا لفترات طويه .
- لو كان فى تأخر للانجاب اكتر من سنه و مفيش اى موانع عند الزوجة .
س 2 : اى اللى المفروض اعمله لو حسيت بااعراض دوالى الخصية ؟
ج : اولا لازم تكشف ، و فى الكشف بنبدء بفحص يدوى للخصية عشان نحس الاورده و نشوف هل فيها تضخم او لا ، و بنعمل حاجة كمان اسمها تكنيك فالسالفا ، وده بنخلى المريض فيه يحزق جامد عشان نشوف هل فى ارتجاع للدم فى الاورده ، و نسبته قد ايه ، لان الارتجاع ده معناه ان الدم مش ماشى فى اتجاهه الطبيعى اللى هو من تحت لفوق عشان يرجع للبطن و لما بنكح او بنحزق جامد او بنشيل حاجة تقيله بسبب ضغطنا على البطن الدم ده بيحاول يرجع تانى للأورده ، فلما بتكون الصمامات اللى فى الاورده سليمه ، فالصمامات دى بتتقفل عشان تمنع رجوع الدم تانى للخصية ، لكن اللى بيحصل فى حالة الدوالى ان الصمامات دى مش بتكون سليمة و مش بتقدر انها تمنع الدم من انه يرجع تانى للخصية ، و بعد ما نخلص الكشف بنطلب اشعة دوبلر على الخصية ، عشان
- نقيس قطر الاورده
- و نحدد درجة الدوالى
- نحدد وقت الارتجاع
- و نحدد كمان كام وريد فيه مشكله
- و نحدد كمان حجم الخصيتين ، عشان نعرف اذا كانت الدوالي ماثرة على حجمهم ولا لأ .
س 3 : امتى ممكن تجيلي دوالي على الخصية؟
ج : فى الحقيقة دوالى الخصية ملهاش سن معين ، ممكن تيجى من بعد البلوغ يعنى من بعد سن 13 سنه ولحد اى سن ، بس بتكون منتشره اكتر فى الرجال اللى اعمرهم من سن 13 لسن 30 ، و بتقل فرص انها تجلنا بعد سن ال 40
س 4 : هو انا لو عندى دوالى فى الساقين ده معناه اننا عندى دوالى كمان فى الخصية ؟
ج : هو الحقيقة مفيش علاقة مباشره ، بس لو احنا عندنا دوالى فى الساقين ، فده معناه اننا عندنا خلل فى الاورده او ضعف فى الانسجة الضامة ده معناه اننا ممكن يكون عندنا :
- دوالى فى الخصية .
- دوالى فى الساقين .
- بواسير .
- فتق اربي .
عشان كده لو بدأت تلاحظ ان بقى عندك دوالى فى الساقين ، بنسبة كبيرة هيكون عندك دوالى على الخصية ، عشان كده حاول تفحص نفسك ديما و تشوف هل فى اى دوالى فى الساق لان بيكون سهل انك تكتشفها بنفسك عن دوالى الخصية .
س 5 : ليه الدوالى بتسبب تأخر فى الانجاب ؟
ج : لان دوالى الخصية اللى من الدرجة التانية او التالته ، بتسبب ضعف فى الاورده اللي بتخرج الدم من الخصية و بيخليها مش قادره انها تخرج الدم بره،فلما الدم بيتجمع في الوريد وده بيخليه يتمدد ويسخن، وبكده درجة حرارة الخصية بتزيد و بتزيد معاها المواد المؤكسدة(ROS) ، و ده ممكن يأثر على الهرمونات المسئولة عن انتاج الحيوانات المنوية، و بيأثر على تكوين الحيوان المنوى و اكتمال نموه، ده غير انها بتضر كمان الحيوانات المنوية المكتمله و بتسبب تكسير فى المادة الوراثية للحيوان المنوي، وكل ده ممكن يكون سبب فى ان يحصل تأخر فى الانجاب لاننا معندناش حيوان منوى سليم يقدر يخصب البويضه.
س 6 : ليه بقت احس انى معنديش رغبه جنسية من وقت جاتلى دوالى الخصيه ، هى الدوالى ممكن تعملى ضعف انتصاب ؟
ج : مبدأيا خلينا نعرف ان فى فرق كبير جدا بين الرغبه الجنسية و ضعف الانتصاب و ده كنا شرحناه بالتفصيل فى المقال ده “ ازاى بنعالج ضعف او انعدام الرغبه الجنسيه ؟ “
اما بالنسبة لاجابة السؤال ، فدوالى الخصية بتأثر بشكل مش مباشر على الرغبه الجنسية ، بس عمرها ما تعمل ضعف فى الانتصاب ، يعنى الدوالى نفسها مش بتضر العضو الذكرى او بتسببله اى مشكله ، لكن اللى بيحصل هنا حاجتين :
- ان الدوالى بتخلينا نحس بتقل و الم فى الخصية ، وده بيخلينا نكون خايفين من اننا نمارس العلاقة الجنسية فنحس بألم اكبر وده اللى بيسبب نقص فى الرغبه الجنسية .
- ده غير ان الدوالى بتأثر على وظيفة الخصية و انتاجها لهرمون الذكوره ، و ده ممكن يسببلنا ضعف فى الرغبه الجنسية
س 7 : ازاى اعالج الدوالى عشان اقدر اخلف ؟
ج : علاج دوالى الخصية بيكون تدخل جراحى ، بس فى الاول خليك عارف ان مش كل حالات دوالى الخصية بتحتاج لعلاج ، بمعنى اننا لو عندنا 100 شخص عندهم دوالى ، فاللى هيحتاج يعمل عمليه عشان يعالج بيها دوالى الخصية هيكون 20 او 25 ، و باقى الناس اه عندهم دوالى على الخصية ، بس مش عملاهم مشكله و مش هى السبب فى تأخر الانجاب ، عشان كده لازم تتأكد هل انت من الناس اللى لازم تعمل العمليه ولا لأ قبل ما تقررانك تعمل العمليه .
س 8 : امتى لازم اعمل عمليه دوالي الخصية ؟
ج : نقرر نعالج دوالي الخصيه لو :
- بقينا بنحس بوجع مستمر فى الخصية بيزيد مع الوقفة و بيقل مع الراحة ، و خصوصا لو مفيش اى مشكله تانيه فى الخصية ممكن تكون هى سبب الالم ده .
- لازم الدوالى تكون واضحة يعنى تكون درجة تانية او تالته .
- لو لقينا ان دوالى الخصية اتسببت فى تأخر الانجاب ، لان فى بعض الحالات دوالي الخصية مش بتأثر على الانجاب و خصوصاّ لو كانت الدوالى من الدرجة الاولى ،
س 9 : امتى نعمل عمليه الدوالى حتى لو كانت درجة اولى ؟
- لو عملنا تحليل للسائل المنوى و لقينا ان فيه نقص فى اعداد الحيوانات المنوية عن الطبيعى ، لان الدوالى هنا ممكن تقلل من عدد الحيوانات المنوية اكتر لانها بتأثر على انتاج الخصية للحيوانات المنوية ،
- ولو في تأخر فى الانجاب لفتره طويله ، و ماكنش عند الزوج او الزوجة اى مشكله تانية تكون السبب فى تأخر الانجاب .
- لو حصل سقوط للحمل اكتر من مره او فشلنا فى الحقن المجهرى ، لان ده معناه ان فى تكسر فى المادة الوراثية في الحيوان المنوى ، و اكتر حاجة بتسبب تكسر الماده الوراثيه هى دوالى الخصية
س 10 : اى افضل طريقة لعملية دوالى الخصية ؟
ج : افضل طريقة لعملية دوالي الخصية هى اننا نعملها بالميكروسكوب الجراحي ، وده لان
- جرح العمليه بيكون صغير جدا من 1.5 ل 2 سم .
- ده غير ان الميكروسكوب بيخلينا نكبر مكان العمليه لاكتر من 15 ضعف عن الطبيعى ، و بكده هنقدر نشوف كل الاورده و الشراين بشكل واضح ، و بكده مش هنسبب اى ضرر للشراين و الاوره وقت العمليه
- ده غير بسبب التكبير بنقدر نوصل كمان للدوالي الثانوية و نربطها عشان ميحصلش ارتجاع للدوالى مره تانيه و دة اللى مش بنقدر نعمله لو بنعمل العمليه باى طريقة جراحية تانيه
- بنقدر اننا كمان نبعد عن الشعيرات الليمفاويه ، لاننا لو مش شايفنها كويس وقت العمليه ده ممكن يخلينا نربطها بالغلط مع الأوردة ، وده هيسبب قيلة مائية على الخصية .
- و بنقدر بسبب التكبير ده اننا نحافظ على الشريان الخصوي اللى بيغذى الخصية بالدم ، اللى لو حصله اى ضرر وقت العمليه هيسبب ضمور للخصية .
- ده غير ان العمليه بالميكروسكوب ممكن نعملها ببنج نصفى ، لان مده العمليه مش بتزيد عن ساعه
- و نقدر اننا نروح بعد العملية بكام ساعه ، و ننزل شغلنا عادى جدا بعد 5 ايام بالكتير
- و بالنسبة للعلاقة الزوجية ، فبنقدر نمارسها بعد العملية بأسبوع .
س 11 : ليه ممكن يحصل ارتجاع للدوالى ؟
ج : ده بيكون ليه سببين :
- اننا نكون مربطناش كل الاورده ، و سيبنا اورده منتفخة من الدرجة الاولى ، فمع الوقت هتبدء الاورده دى هتنتفخ اكتر و تتحول من درجة اولى لتانيه او تالته و هنحتاج اننا نعمل بسببها عمليه تانية .
- اننا نكون لسه بنمارس العادات اللى ساعدت من الاول الدوالى انها تظهر ، زي شيل الاوزان التقيلة لفترات طويلة يوميا ، ده ممكن يتسبب فى الدوالى ترجع تانى .
س 12 : ليه ممكن نحس بألم فى الخصية بعد العمليه ؟
ج : خلينى اقولك ان طبيعى انك تحس بألم فى الخصية بعد العمليه و ده سببه اننا فى العمليه ربطنا الاورده اللى كانت بتخرج الدم بره الخصية ، فالاورده اللى اتربطت دى خلاص مبقاش ليها وظيفة ، فعشان الخصية تتخلص من الدم اللى مبقتش محتاجاه بتبدأ اورده تانيه تخرجة بره الخصية ، بس الاورده دى بيكون حجمها صغير جدا ، فده بيبطء من خروج الدم من الخصية ، مقارنه بالدم اللى داخلها ، فبيبدأ يحصل احتقان للخصية ، بس خلينى اطمن و اقولك ان الوجع و الاحتقان ده بيروح بعد شهرين او 3 بالكتير من بعد العمليه ،
لكن لو لقينا بعد 3 شهور الوجع لسه زى ما هو ،لازم نكشف لان ممكن يكون وجع الخصية من الاول مكنش بسبب الدوالى ، كان بسبب مشكله تانية احنا معالجناهاش ، عشان كده لازم مانستعجلش فى خطوة العمليه ، و نكون عارفين كويس سبب الالم اللى عندنا عشان لما نبدأ نعالجه نكون بنعالجه صح .
س 13 : امتى يحصل حمل بعد عمليه الدوالى ؟
ج : الوقت هنا بيتوقف على حجم الدوالى كانت من الدرجة الكام ، و حجم تأثيرها على انتاج الخصية للحيوانات المنوية ،و تأثيرها كمان على الحيوانات المنوية نفسها سواء من ناحية العدد او الحركة او جوده الحيوان المنوى ، بس فى الاغلب عشان الخصية تبدأ انها تتعافى من تأثير الدوالى بتحتاج وقت من 3 شهور لسنه
و بكده جاوبنا على اكتر الاسئله اللى بتجلنا دايما عن دوالى الخصية ، و لو لسه عندكم اسئله تانيه تقدروا تبعتوهالنا على رقم 01018874287 و احنا هنجاوب على كل اسئلتك