امتى يكون تركيب دعامة للعضو الذكرى هو الحل الوحيد لعلاج ضعف الانتصاب
خلينا فى البدايه نأكد على نقطة ان تركيب دعامة للعضو الذكرى ، مش هو حلنا الوحيد عشان نعالج ضعف الانتصاب ، لكن هو الحل الاخير ، بمعنى ان اخر حاجة بنلجألها عشان نعالج ضعف الانتصاب هو تركيب الدعامة ، و ان فى طرق تانيه لعلاج ضعف الانتصاب زى العلاج الدوائى او الحقن الموضعى
و تعالوا دلوقتى نعرف امتى لازم نركب دعامه للعضو الذكرى عشان نعالج ضعف الانتصاب
- لو ضعف الانتصاب اللى عندنا كان من الدرجة التالتة ،و اللى بتكون اخر واصعب درجة ممكن نوصلها من ضعف الانتصاب ، و هنا العلاج الوحيد هيكون زرع الدعامة .
- لو كان عندنا مرض بيرونى ، بس هنا لازم نعرف ان الدعامة مش بتعالج التليف اللى بيحصل فى العضو الذكرى بسبب مرض بيرونى ، الدعامة هنا هتعالج ضعف الانتصاب اللى حصل بسبب التليف ، و لو عاوزين تعرفوا معلومات اكتر عن مرض بيرونى هتلاقوها هنا
- لو كان عندنا اعوجاج فى القضيب ، وقتها افضل قرار ممكن ناخده هو تركيب الدعامة ، لان الدعامة هنا مش بس هتعالج ضعف الانتصاب ، دى كمان هتعالج الاعوجاج و هترجع العضو الذكرى لشكلة الطبيعى ، و لو عاوزين تعرفوا اى اللى ممكن يسبب اعوجاج فى العضو الذكرى هتلاقوا كل المعلومات عنه هنا
- و لو جربنا العلاج الدوائى لفتره متقلش عن شهرين ولقينا ان ضعف الانتصاب لسه زى ما هو و مفيش اى تحسن وقتها ممكن اننا نلجأ لتركيب الدعامة ، بس هنا فى شرط عشان نقول ان العلاج مجابش نتيجة ، و هو اننا نكون عارفين اى اصلا سبب ضعف الانتصاب ، لان ضعف الانتصاب ده عرض مش مرض بمعنى انه بيحصل بسبب مشكله زى مثلا سكر مش متظبط او مشاكل فى القلب او الوزن الزايد ، او اننا بندخن ، او ان يكون عندنا زياده فى نسبه الدهون فى الدم ، فكل الحاجات دى بتأثر على الدوره الدمويه فى العضو الذكرى و بتعمل ضعف انتصاب ، فلازم قبل ما ناخد خطوه اننا نعالج ضعف الانتصاب سواء بالادويه او بتركيب الدعامة لازم الاول نعرف السبب فى ضعف الانتصاب و نعالجه ، لان احنا لو ركبنا الدعامة من غير ما نعالج المشكله الاساسيه ، احنا هنكون فعلا عالجنا ضعف الانتصاب بس ممكن نعرض نفسنا لمشاكل تانية كتير زى جلطات فى القلب و المخ بسبب المشكله اللى موجوده فى الدوره الدمويه
- و سبب كمان يخلى قرار تركيب الدعامة حلنا الوحيد و هو ان يكون عندنا مشكله فى القلب و بناخد بسببها موسعات للشرايين ، وقتها منقدرش اننا نعالج ضعف الانتصاب بالادويه ولا نقدر ناخد اى منشطات جنسيه ، لإننا كده هنكون بنرفع من مستوى cGMP في الجسم، وده ممكن يسبب انخفاض شديد في ضغط الدم وممكن يسبب الوفاة .
- و ممكن كمان نقرر اننا نركب دعامة لو كنا بنعالج ضعف الانتصاب بالحقن الموضعى ، بس احنا مش مرتاحين لفكره اننا لازم نحقن نفسنا فى العضو الذكرى فى كل مره عاوزين اننا نعمل فيها علاقة زوجية
- او لو عندنا تسريب وريدى ، بس هنا لازم قبل ما ناخد قرار تركيب الدعامة ، نكون متأكدين اننا عندنا تسريب وريدى فعلا لان ده من اكتر الامراض اللى بتتشخص غلط ، و لو عاوزين تعرفوا عنه معلومات اكتر هتلاقوها هنا
- و اخيرا لو لاقدر الله حصلنا كسرفى الحوض ، لان الكسر ده هيأثر على الاعصاب اللى مسؤوله عن تغذية العضو الذكرى و الانتصاب ، و هنا للأسف العلاج الدوائى مش هيجيب نتيجة .
طيب هل معنى اللى قولناه ده ان كده كل الناس اللى عندها ضعف انتصاب تقدر تركب دعامة للعضو الذكرى ؟
الاجابه هتكون لا فى حالات مينفعش نركب فيها دعامة العضو الذكرى حتى لو كانت هى الحل الوحيد لعلاج ضعف الانتصاب ، لان الدعامة وقتها هتسبب لنا مشاكل كتير و الحالات دى هى ،
- لو الشخص اللى هيركب الدعامة كان مريض سكر، و نسبة السكر فى الدم مش مستقره و مش عارفين نسيطر عليها وقتها مش هنقدر اننا نركب الدعامة ، غير لما نظبط السكر الاول .
- لو عندنا ضعف بدرجة كبيره فى مناعة الجسم .
- و لو عندنا اى عدوى فى الجهاز التناسلى ، و خصوصا لو كانت نشطة لازم نعالجها الاول .
- و اخيرا لو عندنا اى مشكله فى التبول ، لازم نحل مشاكل التبول الأول قبل ما نفكر في تركيب الدعامة .
بخلاف الحالات دى نقدر اننا نركب دعامة للعضو الذكري و احنا متطمنين ، لان العمليه نفسها بسيطة جدا و مفيهاش اى خطوره لو اتعملت صح ، و عشان نطمن اكتر تعالوا نعرف شويه تفاصيل عن العمليه و ازاى بتم ،
بس قبل ما نشرح اى اللى بيحصل فى العمليه ، خلينى اقولك شويه حاجات عن العمليه
- نسبة نجاح عمليه تركيب الدعامة بتكون اكتر من 95% ، و على فكره دى نسبه كبيره جدا لما نكون بنتكلم عن نسب نجاح عمليه .
- العمليه نفسها مش بتاخد اكتر من 45 دقيقة او ساعه بالكتير
- ده غير اننا بنقدر نعمل العمليه ببنج نصفى ، لو وضعنا يسمح وده بيتحدد طبعا بعد استشارة دكتور التخدير
و دلوقتى تعالوا نعرف ازاى الدعامة بتتركب ؟
- فى الاول بنبدأ العمليه بأننا بناخد جرعه مضاد حيوى ، و ده لاننا بنزرع جسم غريب فى العضو الذكرى فلازم مايكونش فى اى احتمال ان يحصل عدوى وقت تركيب الدعامة .
- و بعد كده بنبدأ اننا نطهر المكان اللى هنعمل فيه جرح العمليه كويس عشان برضو ميكونش فى فرصة ان يحصل اى عدوى.
- و بعد كده بنعمل فتحة صغيره جدا مش بتزيد عن 2 او 3 سم ، عشان ندخل فيها الدعامات ،
و هنا فى نقطة لازم ناخد بالنا منها و هى ان الدعامة لازم تكون جوا النسيج الكهفى ، مفيش حاجة اسمها اننا نزرع الدعامة بره النسيج الكهفى عشان نحافظ عليه وده لان
- اولا : النسيج الكهفى بقي فى مشكله اصلا و مبقاش قادر انه يقوم بدوره و هو انه يخلى العضو الذكرى ينتصب وقت العلاقة الجنسيه ، فهو بقى نسيج ملهوش دور
- ثانيا : احنا لما بنيجى ندخل الدعامة احنا مش بنشيل اصلا النسيج الكهفى ، احنا بس بنعمل فيه فتحة صغيره مش بيزيد قطرها عن 2 سم عشان ندخل فيها الدعامة ، وده مش هيضر النسيج فى حاجة
و دلوقتى خلونا نرجع تانى للعمليه بعد ما بنعمل الفتحة فى النسيج الكهفى و ندخل الدعامة ، هنا بنبدأ نتأكد ان طول الدعامة مناسب لطول العضو الذكرى ، و دي خطوة مهمة جدا لان لو طول الدعامة كان اقصر او اطول من العضو الذكرى ، ده هيسبب مشاكل كتير بعد كده .
و هو ده اللى بيحصل فى عمليه تركيب الدعامة المرنه اما لو المريض كان بيركب دعامة هيدروليك و قتها هيزيد على الخطوات اللى لسه قايلينها دى حاجة كمان ، لان الدعامة الهيدوليكية بتتكون من اكتر من جزء مش جزء واحد زى الدعامة المرنة ، وده بيخلينا نعمل فتحتين كمان صغيرين واحده فى كيس الصفن عشان نركب فيها المضخة بتاعت الدعامة و ده الجزء اللى بنضغط عليه عشان ينفخ الدعامة وقت العلاقة الزوجيه فيحصل انتصاب ، او يفرغ الدعامة بعد العلاقة ما تخلص فيروح الانتصاب ، و فتحة تانيه فى اخر البطن او ورا عظمة العانة، أو في المساحة اللى ورا العضلات البطنية عشان نركب فيها الخزان .
- و بعد ما بنتأكد ان خلاص الدعامة كده فى مكانها بنبدأ اننا نقفل الجرح بخيط تجميلى رفيع ، عشان بعد الجرح ما يلتئم ما يكونش ليه اى اثر .
كده احنا خلصنا العمليه و عرفنا عنها كل حاجة ، و دلوقتى لو عاوزين تعرفوا اكتر عن امتى نركب الدعامة المرنة و امتى بنركب الدعامة الهيدروليكيه ممكن نضغط هنا