علاج دوالي الخصية

علاج دوالي الخصية

اى مرض له علاج ، بس لازم نفهم كويس ايه هو المرض ده ، و امتى المفروض ابدأ فى علاجه و ، ايه هى افضل طرق العلاج 

عشان كده هنتكلم انهارده عن علاج دوالي الخصية 

بس خلينا نعرف الاول ايه هى دوالي الخصية و ازاى بتحصل :

اى عضو فى الجسم بيتكون من شريان مهمته انه يوصله الدم ، وفى كمان وريد مهمته انه يطلع بقايا الدم من العضو بعد ما يكون استفاد منها ، للدورة الدموية مرة تانية ، ده اللى بيحصل فى الطبيعى .

 لكن فى حالة ان فى دوالي في الخصية ايه اللى بيحصل ، بيكون فى ضعف فى جدار الوريد اللى بيكون مسؤل عن انه يخرج بقايا الدم من الخصية بعد ما تكون استفادت منها ، للدورة الدموية زى ما قولنا ، بس بسبب الضعف ده الدم مبيخرجش و بيفضل متجمع فى الوريد اللى بيفضل يتمدد عشان يستوعب كل الدم اللى بيترسب فيه ، و هو ده اللى بيسبب دوالي الخصية و كمان ترسب الدم بيضر بالحيوانات المنويه لانه بيكون مليان بمواد مؤكسده .

بعد ما عرفنا ايه هى دوالي الخصية ، تعالوا بقى نعرف حاجه مهمه ، امتى لازم اعالج دوالي الخصية ؟

لازم قبل ما نقرر نعالج دوالي الخصيه نتأكد من شوية حاجات :  

اولاّ : لازم نعالج دوالي الخصية لو بنحس بوجع مستمر ، وبيزيد مع الوقفة و بيقل مع الراحة .

ثانياّ : لو دوالى الخصية مأثره على الانجاب ، لان فى بعض الحالات دوالي الخصية مش بتأثر على الانجاب و خصوصاّ لو كانت الدوالى من الدرجة الاولى ، و هنا لازم عشان نقول ان الدوالي السبب  فى تأخير الانجاب لازم نتأكد من كام حاجه 

• أن يكون عدى على الزواج مش اقل من سنه ، يعنى مش من اول كام شهر .
•  ولازم نتأكد كمان ان مفيش عند الزوجه اى مشكله تمنع الإنجاب .
•  و ان كمان مفيش مشكله فى تحليل السائل المنوى من ناحية العدد أو الحركة او التشوهات ، و ان الخصيتين فى حجمهم الطبيعى . 
• لازم كمان نتأكد ان هرمونFSH  و هرمون LH نسبتهم طبيعيه ، لان لو كانت نسبة الهرمونين دول عاليه ده معناه ان فى خلل وظيفي في الخصية ، و بكده علاج دوالى الخصية مش هيجيب نتيجه ، لان دوالي الخصية مش هى السبب في تأخر الإنجاب .

ثالثاّ : لو فى انعدام في الحيونات المنويه ، و كان فى دوالى بدرجة كبيرة هنا لازم نعالج دوالى الخصية و بعد العلاج 40 % من المرضى بيقدروا يطلعوا حيوانات منوية وقت القذف ، بس بردو لازم نتأكد من ان هرمونFSH  و هرمون LH نسبتهم طبيعيه و ان الخصيتين فى حجمهم الطبيعى .

طيب بعد ما عرفنا امتى المفروض نعالج دوالى الخصية ،  جيه دور اننا نعرف بقى ايه هى طريقة علاج دوالي الخصية

 

العلاج الوحيد لدوالي الخصية هو العملية ، مفيش حاجة اسمها علاج بالاعشاب ولا بالمايه السخنه . 

و قبل ما تقلق وتتوتر من كلمة عمليه ، خلينى اقولك ان عملية الدوالى دى عمليه بسيطة ، و التعافى بعد العمليه مش بياخد وقت ، بس خليني اقولك ان فى طرق مش بننصح بيها نهائى زى :

1- الجراحة بالمنظار :

لان الجراحة بالمنظار مش بتخلينا نقدر نشوف الاورده الدقيقة جدا و مبنقدرش نربطها  ، ولا نقدر نحافظ على الشريان الخصوي ، وقت العملية ، و عشان كده بيكون فى احتمال ان دوالي الخصية ترجع تانى او ان وظيفة الخصية تتضرر بعد العملية.

 2- الاشعه التداخيله :

هما احتمال أن يحصل ارتجاع للدوالي بيكون نسبته كبيرة ، لاننا مش بنقدر نوصل لكل الأوردة ، و كمان وقت العمليه بنضطر اننا نعرض الخصية لجرعة كبيرة جدا من الإشعاع و ده بيضر الخصية وهى اصلا متضررة بسبب الدوالي 

3- الليزر :

بسمعه كتير من المرضى اللى بتجيلى فى العياده  ، بس ده بقى مش هنتكلم عن اضراره لانه مش موجود اصلا ، مفيش حاجة اسمها علاج دوالي الخصية بالليزر.

 الجراحة الميكروسكوبية :

افضل و احسن طريقة نعمل بيها عملية دوالي الخصية هى الجراحة الميكروسكوبية و هقولك حالا ليه دى افضل طريقة لانها : 

1. بتساعدنا فى تكبير مكان العملية فنقدر نشوفه بشكل واضح جداّ ، لان المكان اللى احنا بنعمل فيه العملية هو مكان حساس ودقيق جدا 
2. بنقدر بسبب التكبير ده اننا نحافظ على الشريان الخصوي اللى بيغذى الخصية بالدم ، و بكده منضرش الخصية و نتسبب أن وظيفتها تتدهور أكثر . 
3. بنقدر بسبب التكبير كمان اننا نوصل للأوردة الدقيقة و الدوالي الثانوية و نربطها عشان ميحصلش ارتجاع للدوالى مره تانيه و دة اللى مش بتوفره اى طريقة جراحية تانيه 
4. بنقدر اننا كمان نشوف الشعيرات الليمفاويه ، و نتجنب اننا نربطها بالغلط مع الأوردة لان ده ممكن يسبب قيلة مائية على الخصية .
5. و غير كمان ان العمليه مش بتاخد اكتر من ساعه .
6. وكمان بنقدر نروح بعد العملية بأربع ساعات أو اقل  ، و ممكن ننزل الشغل بعد 3-5 أيام  .
7. بنقدر نعمل العملية ببنج نصفي أو كلى .
8. و بنقدر نمارس العلاقة الزوجية بعد العملية بأسبوع .

في النهاية خليني اقولك حاجه عملية دوالي الخصية مش شوية اورده منفوخه هندخل عملية و نعملها ربط و خلاص ،  لازم نركز كويس جدا لاننا داخلين نعمل عمليه عشان نعالج مشكله مش عشان نزودها او نضيف عليها مشكلة جديده .

و لو عاوزين تعرفوا معلومات اكتر عن ازاى نقدر نعرف اننا عندنا دوالي على الخصية وكمان ايه اسبابها ، فهسيبكم مع المقال ده اعراض و اسباب دوالي الخصية .

و لو احتجت تتواصل معانا و نحجزلك معاد مع دكتور اسامه محمد البكل مدرس واستشاري طب وجراحة أمراض الذكوره وتأخر الإنجاب والصحة الجنسية بطب القصر العيني ، تقدر تتواصل معانا على الرقم ده 01018874287