فحوصات ما قبل الزواج

فحوصات ما قبل الزواج

زى ما ترتيبات الفرح بتكون مهمه، في خطوة كمان مهمه جدا ويمكن اهم من كل الترتيبات اللي بتعملوها وهي فحوصات ما قبل الزواج، ولازم نفهم ان الكلام عن فحوصات ما قبل الزواج مش حاجة نتكسف منها دى خطوه مهمه جدا عشان نعرف شكل حياتنا الجايه هيكون عامل إزاي، والفحوصات دي لازم يعملها الطرفين قبل الزواج ب 3 شهور، وبيها بيكون عندنا معلومات كفاية عن وضعنا الصحي، و بنعرف بيها هل هيكون عندنا مشاكل ممكن الطرف التانى ميكونش متقبلها زى

• مشاكل في الخصوبة والقدرة على الإنجاب.
• ولو في اي امراض وراثية ممكن تتنقل للأطفال وخصوصاّ لو الزوج والزوجة كانوا قرايب.
• او لو فى اى مشاكل فى القدرة الصحية و الجنسية، بمعنى ان هل عندنا اى مشاكل ممكن تمنعنا من ممارسة العلاقة الزوجية، سواء كانت المشاكل دى  صحية زى ان يكون عندنا بعض الأمراض المزمنة زي الضغط اوالسكر، لأنهم بيأثروا على الانتصاب والقدرة الجنسية ، أو مصابين بأمراض جنسية ممكن تتنقل للطرف التانى . 

كل اللى فات ده لازم نكون عارفينه كويس قبل الجواز عشان لو كان فى اى مشكله ممكن تأثر على حياتنا بعد كده نكون عارفينها، نقرر وقتها هل احنا هنقدر نكمل ولا لا، ولو هنكمل اى العلاج و الاحتياطات اللي ممكن ناخدها، لان ده اللي هيتحدد على اساسه شكل حياه لسه بتبدأها فأبدأها صح.

طيب اى هى الفحوصات اللى المفروض نعملها قبل الزواج؟

قبل ما نتكلم عن الفحوصات لازم الاول نكشف عشان

•  نطمن على حجم العضو الذكرى والخصية 
• ولازم نعرف كل التاريخ المرضى زى هل عملنا عمليات قبل كده و احنا صغيرين او كان عندنا اى عيوب خلقية زى الخصية المعلقة أو الاحليل السفلى او الفتق الاربى لان ممكن يكون ليهم تأثير على الخصوبة والقدرة الجنسية
• ومهم كمان نعرف هل كان فى اى علاقات جنسية قبل الزواج ولا لأ ، و ده عشان نعرف حاجتين :
  1. هل كان عندنا أي مشكله في ممارسة العلاقة الجنسية.
  2. وهل في احتمال نكون اتصابنا بأى أمراض جنسية ممكن انها تتنقل للطرف التانى بعد الجواز
• مهم نعرف لو الزوج والزوجة قرايب، لان لو كانوا قرايب ده بيكون ليه فحوصات لازم نكون بنعملها وهنتكلم عنها كمان شوية بالتفصيل
• مهم كمان اننا نعرف هل عندنا أى أمراض مزمنة زي الضغط والسكر لأنهم بيأثروا على القدرة الجنسية.
• ممكن نحتاج اننا نعمل أشعة دوبلكس على القضيب والخصية عشان نتأكد من وضع الدورة الدموية و نتأكد اننا معندناش اى مشاكل زى دوالى الخصية أو مرض بيروني لأنهم بيأثروا على القدرة الإنجابية والجنسية.

بعد ما بنعرف كل التفاصيل دى بنبدء نحدد شوية تحاليل وهنقسمها 5 مجموعات:

1. تحليل السائل المنوى واللي هنطمن منه هل في حيوانات منوية اصلا في السائل المنوي ولا لا ، وهنطمن كمان على عدد الحيوانات المنوية في السائل المنوي وحركتها ويفضل ان التحليل ده يتعمل في مركز خصوبة عشان نعرف هل في نسبة تشوهات في الحيوانات المنوية أو في مشكلة في حركتها  ولا لا،

وعشان نقدر نقول ان نتيجة تحليل السائل المنوى كويسه، لازم عدد الحيوانات المنوية فى السائل المنوى متكونش اقل من 15 مليون في الملي الواحد، وإجمالي الحركة يكون 40% والحركة المتقدمة تكون 32%، ونسبة التشوهات تكون اقل من 96%، وهي دى النتايج اللي بيها نقدر نقول ان تحليل السائل المنوي سليم ومش هيكون في تأخر في الانجاب، لكن لو كان في اى مشكله في نتايج التحاليل وقتها، هنبدء نشوف اى المشكلة وازاى نقدر اننا نعالجها.

2. صوره دم كامله نحدد بيها

•  فصيلة الدم و RH، لان لو RH عند الزوجة كان سالب وعند الزوج كان موجب، وقتها لازم نكون عارفين , لان الزوجة فى الحالة دى وقت الحمل بتحتاج متابعه مختلفة، ولازم بعد الولادة تاخد حقنة RH
• مهم نعرف كمان لو فى اى امراض وراثية في الدم ممكن تتنقل للاطفال زى مرض الثلاسيميا لانه بيسبب مشاكل كتير جدا للطفل زي
  • نقص فى الهيموجلوبين
  • ونقص فى كرات الدم الحمرا
  • تضخم فى الطحال
  • بطء في التنفس
  • وممكن كمان يسبب للطفل مشاكل في القلب.

3. تحليل سكر تراكمي، لان السكر بياثر على الانتصاب والقدرة الجنسية.
4. تحليل التهاب الكبد الوبائى (C – B)، لان دول من الامراض اللى ممكن تتنقل للطرف التانى بسبب الاتصال الجنسي،  وهنا لازم نعرف حاجة ان في حالة ان كان عندنا لا قدر الله التهاب الكبد الوبائي C، فاحنا لازم الاول نعالج التهاب الكبد الوبائي وناخد علاج لفترة متقلش عن 3 شهور عشان نقدر اننا ناخد شهادة الخلو من الامراض، اما لو كان عندنا التهاب كبد وبائي B فده للأسف مش بيكون ليه علاج، لكن بيكون في لقاح لازم الطرف التانى ياخده عشان ميتنقلهوش العدوى.

5. تحليل لباقى الامراض الجنسية التانية زي الايدز والزهري والسيلان، لان كل الامراض دى ممكن تتنقل للطرف التانى بالتلامس او الاتصال الجنسي و تتنقل كمان للجنين، فهنا لو لقدر الله كان فى اى اصابه بمرض من الامراض دي و الطرفين هيكملوا مع بعض في احتياطات لازم نكون بناخدها وقت ممارسه العلاقة الزوجية والإنجاب، عشان نقلل بيها فرص نقل العدوى للطرف التانى والجنين،

دة غير بعض التحاليل اللى ممكن نحتاجها عشان نطمن على الصحة العامة، زي:

• تحليل وظائف كلى وكبد
• تحليل غدة درقيه

أما لو كان في صلة قرابة وقتها لازم نعمل كمان تحليل الكروموسومات والجينات عشان نطمن ان مفيش اى عيوب وراثية ممكن تتنقل للأطفال زي:

• فقر الدم المنجلي.
• ضمور العضلات الوراثى
• ضمور المخ الوراثى
• او امراض الغدد

وهنا انت اكيد بتقول ما انا وخطيبتي كويسين اهو ومفيش عندنا أي مشكله ايه بقي لازمة التحاليل الكروموسومية دي، هقولك أنك ممكن تكون سليم ومعندكش حاجة، بس في حاجة اسمها الجينات المتنحية و ده موضوع كبير جدا مش هنتكلم عنه بالتفصيل بس هحاول ابسطهولك

الجين المتنحى ده معناه ان انت عندك صفة او خلل جينى و مش ظاهر عليك لانه مش الجين السائد فى الجينات بتاعتك ، فلو حصل و خطيبتك كان عندها نفس الجين المتنحى ده ، فاللى هيحصل وقت تكوين الجنين ان الجينين المتنحين دول بيتحدوا مع بعض و بيتنقلوا للجنين بس بشكل سائد أو ظاهر وده اللى ممكن يسببله العيوب اللى اتكلمنا عليها دى ، و صدقنى لو ده حصل و طفلك اتولد بعيب وراثى هيكون الوضع اصعب بكتير ، لان العيوب دى اما مش بيكون ليها علاج ، اوليها علاج بس مكلف جدا و بياخد وقت طويل ، و ده هيسببلك أعباء نفسية ومادية كبيرة جدا ، فبلاش تستنى المشكله تحصل .

واخيرا خلينى اقولك بلاش أنك تهمل الفحوصات دي وتقول انها مش مهمه، عشان لو طلع عندنا مشكله نقدر نعالجها، ليه تكتشف المشكلة دي يوم فرحك لو مثلا مقدرتش أنك تمارس العلاقة الزوجية، وتحول اسعد يوم في حياتك ليوم وحش.  

و لو احتجت تتواصل معانا و نحجزلك معاد مع دكتور اسامه محمد البكل مدرس واستشاري طب وجراحة أمراض الذكوره وتأخر الإنجاب والصحة الجنسية بطب القصر العيني ، تقدر تتواصل معانا على الرقم ده 01018874287