ازاى اضمن نجاح عملية التفتيش الميكروسكوبى ؟
لو قررنا اننا هنعمل عملية التفتيش الميكروسكوبي عشان نستخرج الحيوانات المنوية من الخصية ، ففى شويه حاجات لازم نكون بنعملها قبل العملية عشان نضمن ان العملية تنجح باذن الله ، و شويه حاجات لازم نكون بنعملها بعد العملية عشان نبعد عن اى مضاعفات ممكن تحصلنا ، ده غير ان فى شوية تجهيزات تانيه تخص الزوجة لازم نكون بنعملها وقت العملية، عشان نضمن أننا هنستفاد من الحيوانات المنوية اللى هنستخرجها من الخصية ، و نحقق حلمنا في ان يكون عندنا طفل .
و تعالوا دلوقتى نعرف كل حاجة بالتفصيل ،
- اولا عشان نضمن ان العمليه ان شاء الله هتنجح ، و اننا هنقدر نستخرج حيوانات منوية من الخصية ، لازم ناخد بالنا من شوية حاجات قبل العملية ، وخلال وقت العمليه ، و خلينا نبدأ باللى هنعمله قبل العمليه :
- لازم قبل ما ناخد خطوة العمليه اننا نعمل تحليل للسائل المنوى و يفضل انه يتعمل اكتر من مره ، و يكون فى وقت بين التحليلين على الاقل اسبوعين ، عشان نتأكد ان فى انعدام فعلا للحيوانات المنوية فى السائل المنوى .
- و لازم كمان نفحص الخصية كويس ،و نعمل اشعة دوبلر على الخصية عشان نتأكد من حجم الخصية و وضع الدوره الدموية ، و كمان نتأكد ان مفيش عندنا دوالى كبيرة مؤثرة على الخصية ، لأن دوالى الخصية و خصوصا لو كانت من الدرجة التانية او التالتة ، بتقلل من انتاج الخصية للحيوانات المنوية ، فلو لقينا عندنا دوالي يفضل نعملها الاول لان ده هيحسن وظيفة الخصية و ممكن يطلعلنا حيوانات منوية فى السائل المنوى و مانحتاجش نعمل العملية ، ولو مطلعش حيوانات منوية فى السائل المنوى بعد عملية الدوالى ، فاحنا هنا هنكون استفدنا أن الخصية نشطة عن الاول و بتنتج حيوانات منوية و وضع هرمون الذكوره اللي اتأثر بسبب أن الخصية ماكنتش نشطة وقت الدوالى هيرجع لمعدلاته الطبيعية ، و كل ده بيزود فرص اننا نلاقى حيوانات منوية بأعداد كويسة و جودتها كمان تكون كويسة .
- ولازم كمان نعمل شويه تحاليل هرمونية عشان نطمن على نسب الهرمونات المسؤولة عن إنتاج الحيوانات المنوية زى هرمون (FSH – LH) و هرمون الذكورة وهرمون البرولاكتين وهرمون ال E2 او هرمون الانوثة ، لان لو كان في نقص أو زيادة في نسب الهرمونات دى عن الطبيعى ، لازم قبل ما نعمل التفتيش الميكروسكوبي اننا نظبط نسب الهرمونات دى ونعوض الهرمونات اللى هتكون نسبتها ناقصه بعلاج هرموني لمدة متقلش عن 3 شهور و هو ده الوقت اللى بتحتاجه الخصية عشان تنتج الحيوانات المنوية ، و بعد العلاج هنعيد تحليل الهرمونات مرة تانية عشان نطمن على نسب الهرمونات بعد العلاج بقت فى معدلاتها الطبيعية و هنعيد كمان تحليل السائل المنوى لان فى بعض الحالات بتستجيب للعلاج بشكل كبير و بنلاقى ان بقى فى حيوانات منوية مع السائل المنوي وقت القذف و لو ده حصل مش هنكون اصلاّ محتاجين نعمل العملية ، اما لو كانت نتايج تحليل السائل المنوى لسه بتوضح ان فى انعدام الحيوانات المنوية ، فوقتها بنعمل العمليه بس واحنا مطمنين أننا ضبطنا الهرمونات ، وده طبعاّ هيزود من فرص نجاح العملية .
- ولازم كمان نعمل تحاليل جينية زى karyotyping و تحليل Y chromosome microdeletion عشان نتأكد ان مفيش خلل في الكروموزومات أو حذف في الجينات المسؤولة عن إنتاج الحيوانات المنوية ، لان بعض المشاكل الجينية مش بيكون ليها علاج للأسف وفرص اننا نلاقي حيوانات منوية في التفتيش الميكروسكوبي بتكون معدومة ، عارف ان دى حاجه صعبه جدا بس هيكون احسن اننا نعرفها قبل العمليه ، عشان نكون وفرنا على نفسنا تعب العمليه .
- لو كنا بناخد اى علاج اشعاعي او كيميائى لازم منعملش التفتيش الميكروسكوبى غير بعد 5 سنين على الاقل من وقت آخر جلسة ، لأن العلاج الكيميائي أو الإشعاعي بيأثر على الخصية و على الحيوانات المنوية ، و يفضل يبقى في فترة علاج هرموني عشان ننشط الخصية قبل التفتيش الميكروسكوبي لمدة متقلش عن 6 شهور .
- ودلوقتى تعالوا نعرف اى اللى لازم ناخد بالنا منه وقت العمليه
- لازم اللى يعمل العملية يكون عنده خبره كبيره جدا فى الجراحات الميكروسكوبية ، عشان يقدر يميز الأنابيب المنتفخة اللي فيها حيوانات منوية عن غيرها .
- لازم كمان في العملية ناخد وقتنا كويس و ندور فى كل انسجة الخصيتين على الانابيب المنتفخة ، عشان كده وقت العمليه لازم يكون من ساعة لساعتين ، وده عشان نكون وصلنا لاكبر عدد من الأنابيب اللى فيها حيوانات منوية ، عشان نعمل الحقن المجهرى و نجمد كمان عدد كبير من الحيوانات المنوية عشان ماتحتاجش تعمل عملية وتفتح الخصية فى كل مرة هتكون عاوز يبقى عندك طفل فيها .
- و بالنسبة للميكروسكوب نفسه اللى بنستخدمه فى الجراحة لازم تكون كفائته عالية جدا من ناحية الاضائة و التكبير و وضوح الصورة .
- و اخيرا المكان اللى هنعمل فيه العملية لازم يكون موجود فيه معمل اجنة و يكون مجهز وفيه دكاتره عندهم خبرة عالية ،عشان يستلموا العينة اول ما نطلعها و يبدؤا ينتقوا منها الحيوانات المنوية السليمة اللى هنعمل بيها الحقن ، و يجمدوا الحيوانات المنوية اللي جودتها عالية .
و دلوقتى بعد ما عرفنا الحاجات اللى المفروض نكون بناخد بالنا منها قبل ووقت العمليه ، دلوقتى يلا نعرف اى التحضيرات اللى لازم الزوجة كمان تكون بتعملها وقت العمليه ،
وعشان نفهم ليه لازم نحضر الزوجة كمان وقت العمليه ،خلينى اقولك ان وقت العمليه احنا بيكون عندنا احتمال من الاتنين
- الاحتمال الأول : هو أننا هنضطر نعمل الحقن المجهرى فى نفس يوم العملية ، بمجرد ما يطلع معمل الاجنة الحيوانات المنوية من العينه اللى اخدناها ، ، وده بيكون سببه أن الحيوانات المنوية اللى لاقيناها مش هتستحمل التجميد ، و فى الحالة دى بنحتاج اننا نكون محضرين الزوجة ، و تكون واخده العلاجات الهرمونية اللى بتنشط بيها التبويض ، عشان نقدر اننا نستخرج البويضة و نحقن الحيوان المنوي جواها عشان تتخصب .
- أما الاحتمال التانى : ان الحيوانات المنوية اللى خرجناها تكون جودتها كويسه وقتها نقدر نعمل التجميد و نعمل الحقن المجهرى فى اى وقت ، وده بيخلينا مانحتجش نفتح الخصية تانى ، و وقت ما نكون عاوزين طفل تانى نقدر اننا نستخدم الحيوانات اللى جمدناها و نعمل بيها على طول الحقن المجهرى .
و دلوقتى تعالوا بقى نعرف اى اللى مفروض نعمله بعد العمليه عشان ميحصلناش اى مضاعفات ، و العملية تعدى على خير :
- لازم نلتزم الأدوية و المضادات عشان نمنع اى التهاب .
- وممكن نعمل كمادات ثلج على الخصية في أول 24 ساعة بعد العملية .
- و لازم كمان حركتنا فى اول 3 ايام بعد العمليه تكون بسيطه .
- لازم نبعد عن العلاقة الجنسية و اى نشاط بدنى عنيف لمدة اسبوع بعد العمليه .
لو كل اللى قولنا عليه ده حصل وقتها هنضمن انشاء الله ان العمليه هتنجح و هنقولك مبروك هتبقى اب ، و هتقوم كمان من العمليه بالسلامة من غير اى مضاعفات .
و دلوقتى لو عاوز تعرف اكتر عن تجميد الحيوانات المنوية و ازاى بيحصل تقدر تضغط هنا
و لو احتجت تتواصل معانا و نحجزلك معاد مع دكتور اسامه محمد البكل مدرس واستشاري طب وجراحة أمراض الذكوره وتأخر الإنجاب والصحة الجنسية بطب القصر العيني ، تقدر تتواصل معانا على الرقم ده 01018874287