امتى الحيوان المنوى يكون مشوه ، و اى هى النسبه الطبيعيه للتشوه ؟
لما بنعمل تحليل للسائل المنوى و نلاقى ان نتيجته بتقول ان فى تشوه فى الحيوانات المنوية ، بنبدأ نقلق ، و نفتكر ان كده عندنا مشكله و هنا خلينى اقولك ان طبيعى جدا يكون فى نسبة تشوه فى الحيوانات المنويه ، و ان حتى لو لقينا ان نسبة التشوه فى الحيوانات المنويه وصلت 96% فدى بردو حاجة متقلقش خالص ، و ان منظمة الصحة العالمية وضحت إن نسبة الحيوانات المنوية السليمة من ناحية الشكل لازم تكون على الأقل 4% ، علشان تكون الخصوبه كده معدلاتها كويسه و يكون عندنا فرصه فى الانجاب
لكن لو كانت نسبة الحيوانات المنويه السليمة أقل من 4% فده معناه ان نسبة التشوهات فى الحيوانات المنوية زادت عن 96 % ، و هنا نبدأ نقلق لان ده ممكن يأثر على الخصوبة، لكن ده مش معناها إننا معندناش فرصة فى الانجاب لان فى طرق كتير نقدر اننا نعالج بيها تشوه الحيوانات المنويه و لو عاوزين تعرفوا معلومات عن طرق العلاج هتلاقوها هنا بالتفصيل ” ازاى نعالج تشوه الحيوانات المنويه “
و بعد ما عرفنا اى هى النسبة الطبيعية لتشوه الحيوانات المنويه ، خلونا نعرف دلوقتى اى هى المواصفات اللى لازم تتوفر فى الحيوان المنوي عشان يكون سليم ؟
و هنا عشان نفهم مواصفات الحيوان المنوى السليم خلونا الاول نعرف ان الحيوان المنوى بيتكون من 4 اجزاء :
- الاكروسوم
- راس الحيوان المنوى
- الرقبة
- الديل
و عشان نقول بقى ان الحيوان المنوى سليم ، لازم تتوافر فيه شوية شروط
اولا: من ناحية الطول :
- طول الحيوان المنوى نفسه لازم يكون ما بين 50 إلى 60 ميكرون
- و طول رأس الحيوان المنوي يكون من 5 إلى 6 ميكرومتر ، و عرضها 2.5 إلى 3.5 ميكرومتر
- اما بالنسبه لطول الذيل فبيكون حوالي 45 ميكرومتر
ثانيا : رأس الحيوان المنوي:
- لازم تكون رأس الحيوان المنوى بيضاوية.
- و لازم راس الحيوان المنوى يكون فيها 23 كروموسوم ، و المادة الوراثية للزوج و اللي بتكون مسؤولة عن تكوين الجنين ، و هنا عشان الحيوان المنوى يكون سليم ، لازم تكون المادة الوراثية دي سليمة ومفيهاش نسبة تفتت أو أي عيوب خلقية او اي مشاكل في الجينات أو في عدد الكروموسومات ، لان لو فيها خلل هيحصل مشكلة في الاجنة و اما انها مش هتتولد اصلا او هتتولد بعيوب خلقية.
- و لازم رأس الحيوان المنوى يكون عليها الاكروسوم وده حاجة عامله كده زي الكاب، حجمه بيكون حوالي من 40 إلى 70 % من حجم الحيوان المنوي ، و الاكروسوم ده بيكون فيه انزيمات هى اللى بتكون مسؤولة عن ان الحيوان المنوي يخترق البويضة ، و لو الاكروسوم ده مش موجود كده الحيوان المنوى يعتبر مشوه و مش هيقدر يخترق البويضة
ثالثا : عنق الحيوان المنوي
عنق الحيوان المنوى ده يعتبر هو مصدر الطاقة اللي بيحرك ذيل الحيوان المنوي ويساعده في الانتقال من مهبل الزوجة بعد القذف عشان يوصل لقناة فالوب و يخصب البويضة
رابعا : ذيل الحيوان المنوي:
- لازم ذيل الحيوان المنوى يكون مستقيم، طوله حوالي 45 ميكرومتر.
- و لازم يكون جوا الذيل أنابيب رفيعة جمب بعض والأنابيب دي بتتفاعل هى اللى بتخلي الذيل يتحرك يمين وشمال فيدي الحيوان المنوي القدرة على الحركة
- ولازم كمان الذيل يكون سليم ومفيهوش أي عيوب خلقية عشان الحيوان المنوى يعرف يتحرك و يوصل للبويضة ويخصبها ويحصل حمل.
و هى دى المواصفات اللى لازم تتوفر فى الحيوان المنوى عشان يكون سليم ، لكن لو لقينا
- ان رأس الحيوان المنوي أكبر أو أصغر من المعدل الطبيعي
- او ان الحيوان المنوى عنده رأسين .
- او فى اى عيوب في العنق .
- او لو الذيل كان صغير او معوج مش موجود اصلا .
- او لقينا للحيوان المنوى وجود أكثر من ذيل .
كل الحاجات دى تقول ان الحيوان المنوى مشوه ، و مش هيقدر انه يخصب بويضة
و دلوقتى لو عايز تعرف اى هى اسباب تشوه الحيوانات المنوية هتلاقوها هنا بالتفصيل ” اى هى اسباب و اعراض تشوه الحيوان المنوى“