اى هى اعراض و اسباب مرض بيرونى
مرض بيرونى او اعوجاج القضيب المكتسب ، دا مرض بيصاب بيه رجل واحد من كل 11 راجل ، و ممكن تحصل الاصابه بمرض بيروني في مراحل وأعمار مختلفة ، وهو من الأمراض اللي بتسبب ضغط نفسي وألم للمريض
و تعالوا نعرف أكتر عن مرض بيروني او اعوجاج القضيب المكتسب دا بيكون عباره عن تليفات بتحصل اسفل جسم القضيب و التليفات دى بنسميها نسيج ليفي او ندبي وبتكون بالتحديد في غطاء النسيج الكهفي للقضيب، والتليف دا ممكن يخلي القضيب يبان أقصر وقت الانتصاب لأن المنطقة اللي فيها أنسجة ندبة او تليفات مش بتتمدد وقت الانتصاب ، وده بيعمل عند الشخص انتصاب منحني بمعنى تانى ان شكل القضيب بيكون معووج .
الاعوجاج اللي بيحصل في العضو الذكري دا مش مشكلة شكلية بس، لا دا كمان مشكلة وظيفية لأنه بيأثر على الجماع وبيعمل ألم للزوج والزوجة وقت العلاقه الجنسيه ، ده غير ان انحناء و تقوس العضو الذكرى درجته كبيرة، فده هيمنع الجماع أصلاً ،
و دلوقتى بعد ما عرفنا اى هو مرض بيرونى خلونا نعرف
اى هى الاعراض او المضاعفات اللي بتظهر علي الشخص المصاب بمرض بيروني ؟
و فى البداية خلينا نعرف ان الاعراض دى بتظهر بشكل تدريجي علي الشخص المصاب ، و الاعراض دى زي:
- اننا بقينا نلاقى صعوبة في الانتصاب والحفاظ عليه (ضعف انتصاب).
- او اننا بقينا بنحس بألم في القضيب سواء فى وقت الانتصاب او فى وقت ارتخاء العضو الذكرى .
- نقص في طول القضيب.
- او اننا نحس ان بقى فى كتل صلبة تحت القضيب
- و بدأ يكون فى انحناء فى القضيب ، و الانحناء ده ممكن يكون لأعلى أو لأسفل أو ناحيه اليمين او الشمال ، وده بيسبب تشوه في شكل القضيب .
- و ممكن نبدأ نحس بالقلق أو الاكتئاب بسبب صعوبة ممارسة علاقة زوجية.
- و ممكن كمان يحصل تأخر فى الانجاب بسبب ان العلاقة ت الزوجية مش منتظمة .
و هنا لو لاحظت أي عرض من الأعراض دي لازم تروح للدكتور لأن كل ما عالجنا مرض بيرونى اسرع كل ما كان احسن ، لاننا كده هنكون بنمنع التليف قبل ما يزيد ،
و دلوقتى تعالوا نعرف بقى اى هى اعراض و اسباب مرض بيرونى او اعوجاج القضيب المكتسب
مش بس إصابة القضيب وتعرضه لحوادث اللي بتعمل مرض بيروني ، لكن في عوامل تانية بتخلي القضيب يحصل فى جروح ، و اللى بيبدأ بسببها يتراكم النسيج الندبي ويحصل انحناء او كتل محسوسة فى العضو الذكرى زي:
- ممارسة العادة السرية كتير و بعنف، ده بيسبب جروح علي جسم القضيب وتكوين نسيج ندبي و ده اللى بسبب مرض بيروني.
- و من اكتر الاشخاص المعرضة للمرض البيروني هما الرجال اللى عندهم مرض السكري .
- وفي عوامل تانية زي الجراحات السابقه في منطقه الحوض او المثانه ممكن بردو تكون السبب فى الصابة بمرض بيرونى .
- و اخيرا لو كان عندنا ضعف انتصاب و كنا بنعالجة بالحقن الموضعى ، و استخدمنا الحقن ده لفترات طويلة او كنا بنحقن العضو الذكري بكميات كبيره من المنشطات ، فده ممكن السبب فى الاصابة بمرض بيرونى
طيب اى اللى ممكن نعمله علشان نحمى نفسنا من مرض بيروني ؟
1- لازم نحافظ على القضيب من الخبطات والصدمات و نحاول اننا نبعد عن اللبس الضيق
2- لازم كمان نبعد عن العنف في العلاقة الزوجية علشان ميحصلش جروح او كسر في القضيب.
3- نبعد عن ممارسة العادة السرية بعنف .
4- لو عندنا ضعف انتصاب لازم منجربش الحقن الموضعي من غير ما نرجع للدكتور ، و لازم كمان نكون بنتابع معاه بانتظام طول ما احنا بنستخدم الحقن الموضعى .
5- نحاول اننا نعمل فحوصات علشان نطمن علي حالتنا باستمرار
6- و نحاول كمان اننا نبطل تدخين لان ليه اضرار كتير على صحتنا بشكل عام و على قدرتنا الجنسية و الانجابيه
طيب هل مرض بيروني له علاج؟
اجابة السؤال ده نقدر اننا نعرفها بالتفصيل من هنا “تشخيص و علاج مرض بيرونى“