ازاى ضعف حركة الحيوانات المنوية بيأثر على الانجاب ؟
في اسباب كتير بتعمل تاخر في الانجاب عند الرجالة ، و اللى منها انعدام الحيوانات المنوية أو وجود تشوه في الشكل الطبيعى للحيوان المنوي ، بس من اهم الاسباب اللي بتعمل تأخر في الإنجاب هي ضعف حركة الحيوانات المنوية ، او أن الحيوان المنوي يكون ضعيف في الحركة ، هو ده اللي هنتكلم عنه فى مقال انهارده ، بس قبل ما نتكلم عن ضعف الحركة ، خلونا الاول نتكلم عن اهمية حركة الحيوانات المنوية
حركة الحيوان المنوى هى الدليل على حيوية و جودة الحيوان المنوى ، وهى الطريقة اللى بيتنقل بيها الحيوان المنوى من الخصية للقنوات المنوية و بعد ما بيخرج مع القذف و يوصل لعنق الرحم ، بيبدأ بعد كده الحيوان المنوى رحلة طويله و بيفضل يعوم لحد ما يوصل لقناة فالوب وده المكان اللى بيكون فيه البويضة ، فكل ما كان فى ضعف او بطئ فى الحركة ، كل ما قلت فرص وصول الحيوان المنوى للبويضه ، وده طبعا هيسبب تأخر فى الانجاب .
و خلينا دلوقتى نعرف حاجة مهمة ، وهى اننا لو عندنا نقص فى عدد الحيوانات المنوية ، بس الحيوانات المنوية بتتحرك ، حركة متقدمة سريعه ، فده ممكن يحل مشكلة نقص عدد الحيوانات المنوية ، لان كده هيكون عندنا حيوانات منويه سليمة مفيهاش اى تشوهات و قادره انها تتحرك و توصل للبويضة و تخصبها فيحصل الحمل بشكل طبيعى .
و تعالوا دلوقتى نعرف بقى
يعنى اى ضعف حركة الحيوانات المنوية
ضعف الحركة معناه ان فى بطء او ضعف في حركة الحيوان المنوي ، وده بيخلية مش قادر انه يعوم لحد قناة فالوب علشان يخصب البويضة ويحصل حمل بشكل طبيعي ، و بكده الحمل هيتاخر.
و عشان نقول ان حركة الحيوانات المنوية طبيعية لازم تكون سرعتها على الأقل 25 ميكرو متر في الثانية الواحدة ، و حركة الحيوانات المنوية بيكون ليها 3 أنواع:
- الحركة التقدمية ، و دى معناها ان الحيوانات المنوية بتتحرك لقدام فى خطوط مستقيمة أو في دوائر كبيرة، بسرعة على الأقل 25 ميكرو متر في الثانية.
- الحركة غير التقدمية ، و هنا الحيوانات المنوية بتتكون بتتحرك في مكانها، مش بتكون قادره انها تتحرك لقدام ، بسرعة اقل من 25 ميكرو متر في الثانية.
- الحيوانات المنوية غير المتحركة ، و دى معناها ان فى انعدام فى حركة الحيوان المنوى و انه مش بيتحرك نهائى ، و هنا بنحتاج نتأكد اذا كانت الحيوانات المنوية عايشة و لاميته.
و بكده نكون عرفنا يعنى اى ضعف حركة الحيوانات المنوية ، و ليه ضعف الحركة بيأثر على الانجاب ،
و تعالوا دلوقتى نعرف اى هو اجمالى الحركة اللى المفروض يكون الحيوان المنوى بيتحركها عشان مايكونش عندنا مشكلة فى الخصوبة ؟
وعشان نقول ان الراجل ده عنده خصوبة كويسة ، يكون عدد الحيوانات المنوية 15 مليون حيوان منوى فى المللى الواحد ، لازم يكون عدد الحيوانات المنوية اللى مش بتتحرك يكون عدد قليل ،و لازم الحركة الإجمالية للحيوان المنوى سواء كانت ( تقدمية وغير تقدمية ) متقلش عن 40 % ، و ان الحركة التقدمية بس تكون حوالي 32 % أو أكثر .
لكن لو النسب دى قلت يبقى وقتها هيكون ضعف فى حركة الحيوانات المنوية .
و لو عاوزين تعرفوا اكتر عن اسباب ضعف حركة الحيوانات المنوية هنضغط هنا