انعدام الحيوانات المنوية
اول ما بنسمع كلمة انعدام حيوانات منويه بتبقى دايما فاهم ان كده خلاص مفيش امل ان يبقى عندك اولاد ، و تفضل مكتئب و بدل ما تدور على علاج ، لا بتقفل على نفسك و ممكن تاخد قرار الانفصال كمان عن زوجتك ، طب ليه كل ده انعدام الحيوانات المنويه ، مش معناه انك مش هتخلف ، كل الحكايه انه موضوع محتاج علاج اعتبره زى اى مرض بلاش تبصله على انه كارثه و هتوقف حياتك
و تعالى معايا دلوقت نفهم
يعنى ايه انعدام الحيوانات المنوية و اي اسبابة
انعدام الحيوانات المنوية معناه ببساطة ان وقت القذف بيخرج سائل منوي، بس مبيكونش فيه حيوانات منوية
و هنا لازم نفرق بين السائل المنوى و الحيوانات المنوية :
السائل المنوى ده وهو إفراز طبيعي بتنتجة البروستاتا و الحويصلة المنوية ، بيتكون من بلازما منوية ، وظيفته انه يغذي الحيوانات المنوية و يسهل خروجها وقت القذف ، اما الحيوانات المنوية دى بيتم إنتاجها فى الخصية ، و دى اللى بتكون مسؤولة عن تخصيب البويضات و تكوين الجنين .
طيب ليه ممكن يحصل انعدام للحيوانات المنوية فى السائل المنوى ، ده ممكن نقسمه 3 أسباب :
- سبب قبل الخصية
- سبب فى الخصية
- سبب بعد الخصية
و يلا نفهم سوا ايه الكلام ده
1- سبب قبل الخصية :
و ده معناه ان مفيش اشاره رايحه للخصية تخليها تخلق الحيوان المنوى ، و ده بسبب وجود خلل في الغدة النخامية اللى بتفرز هرمونات (LH-FSH) ، والهرمونات دى هى اللى بتحفز الخصية انها تقوم بوظايفها سواء انتاج الحيوانات المنوية و دى اللى مسؤول عنها هرمون FSH، او انتاج الهرمون الذكري عن طريق خلايا لايدنج و دى المسؤول عنها هرمون LH ، و بسبب الخلل فى الهرمونين دول، الخصية مش بتقدر تقوم بوظيفتها .
و ده اسهل انواع انعدام الحيوانات المنوية فى العلاج ، لأننا بنقدر اننا ناخد علاج نعوض بيه الهرمونات دى ، فتبتدى الخصية تنشط مرة تانية و تنتج الحيوانات المنوية ، و فى الحالة دى هيطلع فى السائل المنوى حيوانات منوية ، و نقدر اننا نخلف بشكل طبيعى .
2- سبب فى الخصية :
و ده يعتبر من اصعب أسباب انعدام الحيوانات المنوية ، لان الخلل هنا بيكون فى الخصية نفسها ، انها مش بتقدر تنتج الحيوانات المنوية و فى الحاله دى هنلاقى ارتفاع كبير فى نسب هرمون LH – FSH ، لان الغدة النخامية بتفضل ترسل اشارات بكميات كبيرة للخصية عشان تنتج الحيوانات المنوية .
طب ايه هى اسباب خلل الخصية :
- لو كنا مصابين بمتلازمة الكلاينفلتر .
- لو عندنا خلل جينى فى تكوين الحيوانات المنوية .
- لو حصل إصابة في الخصية .
- لو واحنا صغيرين كان عندنا خصية معلقة و منزلنهاش قبل مرور سنة ونصف من عمر الطفل .
- لو لا قدر الله كان عندنا سرطان و اتعالجنا بعلاج اشعاعي او كيماوي ، وعشان كده دايما بننصح ان لو هناخد علاج زى ده ، يبقى لازم قبله نعمل تجميد للحيونات المنوية .
- و اخيرا لو حصل ضمور للخصية بسبب التواء بالخصية و متعالجش ، او لو عملنا اى عملية اتسببت بضرر فى الدورة الدموية بالخصية .
و هنا العلاج بيكون اننا فى الاول ناخد علاج نحاول ننشط و نعالج بيه الخصية ، و بعد العلاج بنعمل تحليل للسائل المنوي ، لان هنا ممكن يحصل استجابة كبيرة مع العلاج و تبدأ الخصية تصنع حيوانات منوية ، و تخرج مع السائل المنوي وقت القذف ،و أوقات تانية ممكن نحتاج اننا نعمل تفتيش ميكرسكوبي نوصل بيه للحيوانات المنوية .
3- سبب بعد الخصية :
و هنا بتكون الخصية سليمه وشغاله كويس جدا مفيهاش اى مشكله و بتقدر تنتج حيوانات منوية ، و الهرمونات كمان كويسه سواء ( الهرمون الذكرى او هرمون LH و FSH ) ، بس بردو مفيش اى حيوانات منوية فى السائل المنوى و دة بسبب انسداد فى القنوات المنوية
و هنا بنبدأ نشوف الانسداد ده فين و درجته ايه ، و نشوف هنقدر نصلحة ولا لأ ، و لو لقينا ان الانسداد مش هينفع يتعالج ، و قتها بنعمل عينة ميكروسكوبية من الخصية .
طيب هو ايه الافضل اننا نعمل عينة ميكروسكوبية من الخصية على طول ولا نصلح الانسداد ؟
طبعا الافضل اننا نصلح الانسداد لو ده ممكن عشان نقدر اننا نخلف طبيعى فى كل مره بدل ما نحتاج اننا نعمل عينة ميكروسكوبية من الخصية و بعدها نعمل حقن مجهرى فى كل مره هنكون عاوزين نجيب فيها طفل .
طيب بعد ما عرفنا ايه هى اسباب انعدام المنوية ، تعالوا بقى نعرف ازاى اقدر افرق بينهم
| فى حالة ضعف الخصية | فى حالة الانسداد |
| حجم الخصية صغير | حجم الخصية كويس |
| كمية السائل المنوي هتكون طبيعية | كمية السائل المنوي هتكون قليلة |
| هرمون الذكورة بيكون نسبته قليلة ، و هرمون LH-FSH بتكون نسبتهم عالية | الهرمونات بتكون مظبوطه |
و كمان عن طريق اننا نعمل اشاعة على الخصية أو البروستاتا عشان نقدر اننا نحدد هل هو ضعف فى الخصية ولا انسداد ، لان العلاج بيكون مختلف فى كل حالة .
و لو عاوز تعرف اكتر عن انسداد القنوات المنوية و أسبابها و طرق علاجها هيكون من هنا
و لو احتجت تتواصل معانا و نحجزلك معاد مع دكتور اسامه محمد البكل مدرس واستشاري طب وجراحة أمراض الذكوره وتأخر الإنجاب والصحة الجنسية بطب القصر العيني ، تقدر تتواصل معانا على الرقم ده 01018874287