كسر القضيب

كسر القضيب :

واحد من الاصابات اللى ممكن تحصل فى العضو الذكرى وقت الانتصاب ،و عشان نفهم يعنى اي كسر فى القضيب خلونا الاول نعرف

ان العضو الذكرى مفيهوش اى عظم ، العضو الذكرى بيتكون من 3 انابيب ، انبويه صغيره اسمها مجرى البول داخل النسيج الاسفنجي و دى اللى بيخرج منها البول والسائل المنوي وقت القذف ، وانبوبتين كبار اسمهم النسيج الكهفى و ده النسيج اللى بيكون مسؤول عن الانتصاب و بيكون حواليهم جدار او غلاف مكون من طبقتين ، طبقة داخلية و طبقة خارجية ، و الغلاف ده وقت الانتصاب بيتمدد عشان الجسم الكهفى بيكون مليان بالدم ، وقت الانتصاب العضو الذكرى بيكون صلب جدا لانه بيكون مليان بالدم وفى نفس الوقت بيكون حساس جدا ، و لو اتعرضنا لاى خبطة جامده او حركة عنيفة ممكن يحصل وقتها قطع فى الغشاء اللى بيكون حوالين النسيج الكهفى و ده اللى بنسميه كسر فى القضيب .

و كسر القضيب بيكون نوعين :

كسر كلى ، و هنا الكسر بيكون فى كل طبقات الجدار اللى بيغطى النسيج الكهفى ، و فى الحالة دى بيبدء الدم يخرج الدم من النسيج الكفى و يتجمع تحت الجلد ، و لو كان الكسر ده شديد ممكن يوصل كمان لمجرى البول و يسببله تهتك .

و النوع التانى كسر جزئى : وده بيحصل فيه كسر فى طبقه واحده من طبقات الجدار اللى بيغلف النسيج الكهفى ، و على الاغلب بتكون الطبقة الداخليه ، و هنا مش بيكون فى تجمع دموى تحت الجلد .

طيب هو ليه ممكن يحصل كسر للقضيب اصلا ؟

كسر القضيب بيكون ليه اسباب كتير زى :

لو بنمارس العلاقة الجنسية بشكل عنيف ، ده ممكن يتسبب فى خبطة شديده للعضو الذكرى و يحصل بسببها كسر فى القضيب .
- او لو بنمارس العلاقة الزوجية بطريقة معينة يكون فيها وضع الزوجة على العضو الذكرى ، وقتها ممكن يحصل انزلاق للعضو الذكرى وقت دخوله و خروجة من المهبل فيتخبط فى عظمة الحوض عند الزوجة و يحصل الكسر .
- لو بنمارس العاده السرية بشكل عنيف .
- لو حصل التواء او ثنى للقضيب بعنف و هو منتصب .
- لو بنستخدم ادوات صلبه فى مداعبة العضو الذكرى .
- لو حصل انتصاب للعضو الذكرى و احنا نايمن ، واتحركنا بشكل غلط او نمنا فى وضع يكون فيه تقل الجسم كله على العضو الذكرى ده ممكن يسبب كسر للقضيب .
- و اخيراّ عاده غريبه بيعملها بعض الناس وهى طقطقة العضو الذكرى زى اللى بنعمله فى الاصابع ، دى ممكن تسبب كسر جزئى للعضو الذكرى ، و ده بيسبب تليف فى انسجة العضو الذكرى ، و لو اتكررت كتير ممكن نوصل لضعف انتصاب دائم .

طيب فى حالة ان حصل كسر فى القضيب هيكون ايه العلاج ؟

العلاج الوحيد للأسف هو تدخل جراحى بس قبل ما تقلق خلينى اقولك انها عمليه بسيطة مدته مش بتزيد عن ساعه ، و كل اللى بنعمله فيها اننا بنفضي التجمع الدموى اللى حصل ، و نبدء بعدها اننا نخيط القطع اللى حصل فى انسجة العضو .و لازم قبل العمليه نكون عملنا فحص عشان نحدد حجم التجمع الدموى ، و نعمل اشعه دوبلر على القضيب عشان نحدد مكان الكسر .

طيب لو معمالناش العمليه اى اللى هيحصل ؟

- هنفقد القدره على الانتصاب بشكل دائم ، و وقتها بدل ما كنا هنعمل عمليه بسيطة عشان نعالج الكسر اللى حصل فى القضيب ، هنكون محتاجين اننا نعمل عمليه اكبر و هى تركيب دعامة عشان نقدر نرجع الانتصاب للعضو الذكرى .
- ممكن يحصل تقوس و انحناء فى العضو الذكرى .
- او قصر فى طول القضيب .
- و تليف فى الانسجة (مرض بيرونى).
- او ممكن يحصل تسريب وريدى .
- و لو الكسر كان وصل لمجرى البول و معملناش العمليه ، وقتها هيحصل احتباس للبول .
كل دى حاجات انت ممكن تعرض نفسك ليها لو اهملت فى علاج كسر القضيب .

و دلوقت خلينى اقولك على كام حاجة لازم تتعمل بعد العمليه ، عشان ميحصلناش اى مضاعفات :

- - بعد العملية لازم نهتم بالعلاج و المضادات الحيوى عشان ميحصلش اى التهابات
  - و كمان هنحتاج اننا نبعد عن اى اثارة جنسية و ناخد ادوية تمنع الانتصاب لمده 8 اسابيع، لان لو حصل انتصاب ده ممكن يتسبب فى شد الغرز و فكها و نضطر اننا نعيد العملية .
  - هنبعد عن ممارسة العلاقة الزوجية ، او اى عادات جنسية لمدة شهرين من وقت العمليه ، عشان يكون جرح العمليه و الكسر حصلهم التأم .

و اخيراّ خليك عارف ان اى مشكلة صحية علاجها فى الاول بيكون سهل ، لكن لو اتأخرنا عليها بيكون الوضع اصعب و ممكن ميكونش ليه علاج ، و دلوقتى لو عندك اى استفسار تقدر تتواصل معانا على رقم 01018874287 و فريقنا الطبي هيجاوب على كل اسئلتك

مدرس واستشاري طب وجراحة أمراض الذكوره وتأخر الإنجاب والصحة الجنسية بطب القصر العيني .

# استبشر_خيرا

طاقم عمل مؤهل

#ماتفقدش_الامل

عنايه كاملة

احجز معنا

متاح دائما