هل يحدث حمل مع ضعف حركة الحيوان المنوي؟
يعتبر الحيوان المنوي هو المسؤول عن تكوين الجنين ، وعلشان الحيوان المنوي يقدر يمشي ويوصل إلى قناة فالوب ويخصب البويضة ، بيحتاج انه يتحرك حركة سريعة ، وبالتالي لو حصل اي مشكلة أثرت على حركته ، وقتها هيكون حيوان منوي ضعيف في الحركة ، وهيكون السبب في إصابة الرجل بالعقم وتأخر الإنجاب.
ودلوقتي خليني اقولك ايه هي أهمية حركة الحيوان المنوي:
في البداية لازم تكون عارف ان حركة الحيوان المنوي هي الدليل اللي بيقول ان الحيوان المنوي ده سليم وجودته كويسه وعنده حيوية وقادر انه ينتقل من الخصية إلى القنوات المنوية ويختلط بالسائل المنوي ويخرج وقت القذف ويوصل الى عنق الرحم ويفضل يعوم لحد ما يوصل إلى قناة فالوب علشان يخصب البويضة.
ولو عايز تعرف امتي تكون حركة الحيوان المنوي طبيعية ، اسمع الفيديو ده مع الدكتور اسامة البكل….
وبالتالي فإن ضعف حركة الحيوان المنوي معناه ان في ضعف وبطء في حركة الحيوان المنوي وده اللي بيخليه مش قادر انه يوصل للبويضة ويخصبها ويحصل حمل طبيعي ، وهيكون السبب في تأخر في الانجاب.
ولازم تكون عارف ان حركة الحيوان المنوي ليها 3 انواع:
1/ حركة متقدمة: بمعنى أن الحيوان المنوي بيتحرك لقدام في خطوط مستقيمة بسرعة على الاقل 25 ميكرو متر في الثانية الواحدة.
2/ حركة غير متقدمة: بمعنى أن الحيوان المنوي بيتحرك في مكانه بسرعة أقل من 25 ميكرو متر في الثانية الواحدة.
3/ حركة منعدمة: بمعنى أن الحيوان المنوي مش بيتحرك اصلا وعنده انعدام في الحركة.
وبالتالي لازم تكون عارف ان الحيوان المنوي عشان يتحرك حركة طبيعية ويقدر يوصل للبويضة ويكون جنين ، لازم يتحرك على الاقل حركة تقدمية وغير تقدمية متقلش عن 40% ، وأن الحركة التقدمية بس تكون حوالي 32% او أكثر ، وبالتالي لو النسب دي قلت عن كدة ، هيكون حيوان منوي ضعيف الحركة وده هيسبب تأخر في الإنجاب.
وخليني اقولك ان في اسباب كثير جدا ممكن تكون السبب في ضعف حركة الحيوان المنوي ، زي:
1/ دوالي الخصية: لان دوالي الخصية بتاثر على الدورة الدموية في الخصية وخصوصا لو كانت الدوالي دي من الدرجة الثانية أو الثالثة هترفع من درجة حرارة الخصية وهتزيد من تراكم المواد المؤكسدة (Ros) وده هيأثر على الخصية وانتاجها للحيوانات المنوية وهتسبب ضعف في حركة الحيوان المنوي.
2/ الالتهابات: بمعني ان الالتهابات والعدوى في الجهاز التناسلي بتاثر على الأعضاء التناسلية وجودة الحيوانات المنوية وبتسبب ضعف في حركة الحيوان المنوي.
3/ التعرض للعلاج الإشعاعي والكيميائي: بمعني ان علاج الامراض السرطانية بتاثر على الخصية وانتاجها وجودتها للحيوانات المنوية.
4/ التدخين: لأن مادة النيكوتين الموجودة في السجائر بتقلل من وصول الدم إلى الخصية وده طبعا بياثر على الخصية وانتاجها للحيوانات المنوية وهيضعف من قدرة الحيوانات المنوية على الحركة.
5/ الخلل الهرموني: وده بيسبب اضطراب في الهرمونات ، وبيعمل خلل في نسبة هرمون الذكورة أو نسبة هرمون الأنوثة ، وخلل الهرمونات ده بياثر على وظيفة الغدد التناسلية وبالتالي هياثر على انتاج الخصية للحيوانات المنوية.
6/ تشوه ذيل الحيوان المنوي: لأن ذيل الحيوان المنوي بيكون جوا أنابيب ، والأنابيب دي بتتفاعل مع بعض علشان تخلي ذيل الحيوان المنوي يتحرك يمين وشمال وده اللي بيدي القدرة للحيوان المنوي على الحركة ، وبالتالي لو ذيل الحيوان المنوي كان فيه تشوه او عيب ده هيضعف من قدرة الحيوان المنوي على الوصول للبويضة.
ولازم تكون عارف ان في اسباب تانية كتير ممكن تضعف حركة الحيوان المنوي كوجود مشاكل في خصائص السائل المنوي، زي:
1/ لزوجة السائل المنوي
2/ حموضة السائل المنوي
3/ وجود صديد في السائل المنوي
4/ وجود اجسام مضادة في السائل المنوي
ودلوقتي تعالوا نعرف ازاي نعالج ضعف حركة الحيوانات المنوية:
بس لازم تكون عارف ان علشان تعالج ضعف حركة الحيوان المنوي ، لازم الاول تعالج السبب اللي ادي الي ضعف الحركة من البداية بمعنى ان لو كان ضعف الحركة بسبب:
1/ دوالي الخصيتين: الحل هيكون اننا نعالج دوالي الخصية بالجراحة الميكروسكوبية أفضل وأحسن طريقة تفكر تعالج بيها دوالي الخصية من غير ما تضر الخصية.
2/ ولو كان السبب خلل هرموني: العلاج هيكون هرموني عشان نظبط مستوي الهرمونات وننشط الخصية لإنتاج حيوانات منوية سليمة.
3/ ولو كان السبب الالتهابات: وقتها هنعمل مزرعة سائل منوي علشان نحدد نوع البكتيريا وانسب مضاد حيوي للمريض.
وبعد ما عرفت كل حاجة عن حركة الحيوان المنوي وأمتي تكون الحركة طبيعية فيحصل حمل طبيعي ، وأمتي تكون الحركة ضعيفة فيحصل تأخر في الإنجاب ، دلوقتي خليني اجاوبك على سؤالك :
هل ممكن يحصل حمل مع ضعف حركة الحيوان المنوي؟
خليني اقولك ان علشان يحصل حمل بشكل طبيعي ، لازم يكون عدد الحيوانات المنوي أكثر من 15 مليون حيوان منوي لكل ملليلتر من السائل المنوي ، وانها تكون قادرة تمشي بسرعة أكثر من 25 ميكرو متر في الثانية الواحدة علشان تقدر توصل لقناة فالوب وتخصب البويضة ويحصل حمل ، لكن لو كانت الحيوانات المنوية بطيئة أو ضعيفة الحركة ، ده هيقلل من وصول الحيوان المنوي للبويضة وبالتالي هيحصل تأخر في الإنجاب.
ودلوقتي تعالي اجاوبك على سؤال انا متأكد انك بتفكر فيه وهو :
هل ممكن اعمل حقن مجهري من غير ما اعالج ضعف حركة الحيوانات المنوية؟
اكيد طبعا لا، مينفعش اننا نعمل حقن مجهري قبل ما نعالج ضعف حركة الحيوانات المنوية ، لأنك كدة هتكون بتستخدم حيوان منوي ضعيف الحركة ، لان ده طبعا هيقلل من فرص نجاح الحقن المجهري ، لان الحيوان المنوي لازم يكون فيه حركة وحيوية ومفيهوش اي تشوهات علشان يزيد من فرص التلقيح السليم للبويضة وتكوين الجنين.
وفي النهاية ، لازم تكون عارف ان علشان يحصل حمل طبيعي ده طبعا بيتوقف على عوامل كثيرة جدا ، علشان كده لو بتعاني من تأخر في الإنجاب ، لازم تكشف وتعمل تحليل سائل منوي وتعرف فين المشكلة بالظبط وتعالجها علشان يكون عندك أعلى فرصة لحدوث حمل طبيعي باذن الله.
ولو محتاج اي استشارة تقدر تتواصل معانا من خلال الرقم ده 01018874287 واحنا هنحددلك ميعاد مع الدكتور اسامة محمد البكل مدرس واستشاري طب وجراحة أمراض الذكورة وتأخر الانجاب والصحة الجنسية بطب القصر العيني.