أسباب ضعف الانتصاب العضوي وأعراضه
ضعف الانتصاب أو الضعف الجنسي ممكن يكون علامة على مشاكل او امراض صحية عندك و محتاجة علاج ، زي الإصابة بالسكر أو بسبب خلل او اضطراب في الهرمونات وممكن يكون سبب ضعف الانتصاب نفسي أو بسبب مشاكل فى العلاقة الزوجية.
علشان كده اهم حاجة في علاج ضعف الانتصاب هو التشخيص الصح عشان تعرف نوع ضعف الانتصاب اللي بتعاني منه :
- هل هو ضعف انتصاب بسبب نفسي؟
- ولا ضعف انتصاب بسبب عضوي أو مرضى ؟
- ولا ضعف انتصاب بيحصل نتيجة مشاكل في العلاقة الزوجية؟
- ولا بسبب نمط حياة غلط؟
تعالوا نعرف أكتر عن الأسباب العضوية اللي ممكن تسبب ضعف انتصاب أو ضعف جنسي و هى :
- نقص هرمون التستوستيرون : لان هرمون التستوستيرون بيبدأ يقل بعد سن التلاتين ، وعلشان كده ممكن نلاقي إن اشخاص كتير من اللي بيعانوا من ضعف الانتصاب بيكونوا بعد سن الأربعين و دا بسبب انخفاض إنتاج هرمون الذكورة وده بيؤدي لانخفاض الرغبة الجنسية ومشاكل في الانتصاب.
- إصابات القضيب ، أو منطقة الحوض أو المثانة أو الحبل الشوكي : كل الإصابات دي بتأثر على الأعصاب والأوعية الدموية المسؤولة عن انتصاب العضو الذكرى .
- العمليات الجراحية في منطقة الحوض : زي استئصال البروستاتا أو القولون او لو حصل كسر فى الحوض ، واللي ممكن تسبب ضرر للأعصاب والأوعية الدموية.
- ارتفاع ضغط الدم : لانه بيكون ليه تأثير على الانتصاب ، ودا لأن عشان يحصل انتصاب لازم يكون فى تدفق دم قوي للعضو الذكري ، وارتفاع ضغط الدم بيخلي جدران الأوعية الدموية تكون سميكة اكتر من الطبيعى ، وممكن يترسب فيها دهون كمان ، وده هيعمل تصلب في الشرايين وبكده بيكون صعب ان يحصل ارتخاء للشرايين عشان الدم يدخل العضو بشكل طبيعي.
- التسريب الوريدي : ودا بيتسبب في أن الدم يرجع يخرج من العضو الذكرى بسرعة من خلال الأوردة ، نتيجة ان الاوردة فيها خلل ومش بتقفل ، ودا بيكون السبب في أن العضو الذكرى ميبقاش صلب ، أو أن القضيب يفقد الصلابة بسرعة بسبب تسرب الدم.
- أمراض القلب والأوعية الدموية : ودا لانها بتبطئ تدفق الدم للعضو الذكري ، و بكده هيكون عندنا مشكلة في الانتصاب.
- مرض السكر من النوع الأول والثاني : وخاصة لو أهملنا ضبط نسبة السكر في الدم ، لأن ارتفاع السكر في الدم لفترة طويلة بيسبب ضرر في الأوعية الدموية في الجسم ، والأوعية الدموية هي اللى بتكون مسئولة عن الانتصاب ، دا غير ان مرض السكر كمان بيكون ليه تأثير على الأعصاب المسئولة عن الاستجابة للتحفيز الجنسي.
- الإصابة ببعض الأمراض زى : مرض باركنسون ،او التصلب المتعدد ، أو الزهايمر، أو السكتة الدماغية، او إصابات الرأس والعمود ودا لان كل الامراض دى بيكون ليها تأثير على الجهاز العصبي والمخ وهتسبب ضعف انتصاب .
- الاضطرابات الهرمونية : ودا لان أي خلل في توازن الهرمونات ممكن يسبب مشاكل جنسية زي ضعف الانتصاب أو ضعف الرغبة الجنسية ، ومن المشاكل الهرمونية الشائعة اللي بتأثر على الانتصاب
- قصور الخصية في انتاج هرمون الذكورة
- فرط أو قصور نشاط الغدة الدرقية
- فرط إفراز هرمون البرولاكتين
- أو زيادة إنتاج الجسم لهرمون الكورتيزول
- السمنة وزيادة الدهون في الجسم : لان السمنة بيكون ليها تأثير على الانتصاب ، لأنها بتخلي الشخص أكثر عرضة لضرر الأوعية الدموية والإصابة بأمراض القلب وتصلب الشرايين ، وده زى ما قولنا بيأثر على تدفق الدم للعضو الذكري .
- مشاكل والتهابات البروستاتا : سواء كانت المشاكل دى التهابات مزمنة فى البروستاتا أو سرطان فى البروستاتا ، وكل المشاكل دى بتأثر على الانتصاب الطبيعي وبتسبب ألم أثناء القذف ، دا غير ان الأدوية المستخدمة في علاج تضخم البروستاتا الحميد والجراحات الخاصة بيها ممكن تسبب ضعف الانتصاب.
- تشوهات العضو الذكري : زي الإصابة بمرض بيروني ، اللي بيسبب تليفات في أنسجة العضو وبيعمل اعوجاج أو تقوس في القضيب، وده بيسبب مشكله في الانتصاب وألم شديد أثناء العلاقة الزوجية.
ولو عايز تعرف معلومات اكثر عن أعراض مرض بيروني وازاى بنشخصه وبنعالجعه ، اسمع الفيديو ده مع الدكتور اسامة البكل…
- تناول بعض الأدوية : زي أدوية علاج ضغط الدم ، مدرات البول ، حاصرات بيتا ، ومضادات الاكتئاب ، والقلق والمهدئات ممكن تسبب ضعف انتصاب عند بعض الرجال ، لأنها بتأثر على تدفق الدم أو بتتداخل مع الإشارات العصبية.
ودلوقتى تعالوا نعرف امتى يكون المريض عنده فعلا ضعف انتصاب عضوى
- لو الضعف بيحصل بشكل مستمر وبيتكرر في مواقف وظروف مختلفة ، وممكن يظهر بعدة طرق زى :
ممكن يحصل انتصاب لفترة قصيرة وبعدين يضعف قبل القذف.
في بعض الحالات ، ممكن يفقد الشخص الانتصاب قبل حتى الإيلاج.
ممكن العضو يمتلئ بالدم بس مايبقاش في صلابة كافية للإيلاج ، وده بيكون نتيجة مشاكل في الدورة الدموية وأنسجة القضيب.
وهنا خليني اوضحلك معلومة مهمة ، وهى ان لو الاعراض دي بتحصل لك بشكل مستمر ومتكرر خلال 3 شهور فانت لازم تروح تكشف وتستشير دكتور علشان يشخص حالتك ويعرف ايه المشكلة اللي عندك ومسبب لك ضعف مستمر في الانتصاب.
لكن لو بتعاني من مشاكل في الانتصاب الطبيعي من وقت للتاني علي فترات متباعدة انت كدا ممكن تكون بتعاني من النوع التاني من ضعف الانتصاب وهو ضعف الانتصاب النفسي ، و لو عايزين تعرفوا اكتر عن ضعف الانتصاب النفسي هتلاقوا عنه كل المعلومات هنا “ ايه هو ضعف الانتصاب النفسي واعراضه وطرق علاجه ؟. “