اصلاح اعوجاج القضيب

طيب لو حددنا سبب اعوجاج القضيب و كان السبب مكتسب و نسبة الاعوجاج مش كبيرة اوى و مش مقصره على الانتصاب
هنا بنبدأ بالعلاج الدوائى الاول لمده 6 شهور ،عشان نعالج المرض اللى سبب اعوجاج للقضيب ، و عشان نقلل فرص أن الاعوجاج يزيد ، و فى بعض الحالات ممكن العلاج يجيب نتيجة شويه و يحسن الاعوجاج اللى حصل ، لكن بعد الست شهور لو الوضع متحسنش او ابتدى يبقى اصعب ، وقتها لازم نعمل عملية ، و قبل ما تحس ان الموضوع صعب خلينى اطمنك ان العملية سهلة جدا
و انها مش زى ما ناس بتقول عنها دى بتسبب ضعف جنسي ، او ان القضيب طوله بيقصر بعد العملية خلينى اقولك ان ده عمره ما بيحصل ، طبعا لو العملية اتعملت صح .

نيجى بقى للسبب التانى : اعوجاج القضيب بسبب عيب خلقى بس الاعوجاج مش مقصر على الانتصاب ، دة بيكون حلة الوحيد العملية .
و تعالى نتكلم شوية عن العملية عشان تكون مطمن من ناحيتها
فى العملية احنا مش بنيجى خالص جنب النسيج الكهفى ، اللى بيكون مسؤول عن الانتصاب ، عشان كده قولتلك ان العملية عمرها ما بتسبب عجز جنسى ، كل اللى بنعمله فى العملية اننا بنعمل غرز بطريقة معينة فى القضيب عشان نصلح بيها الاعوجاج و نرجع شكل العضو طبيعى ، و الغرز دى مش بتدوب يعنى نتيجة العملية مش مؤقتة ، و كمان مش بتكون مكلكعه تحت الجلد ، ولا باينه فى ملمس العضو ، ولا هتأثر على حجم العضو او طوله .