هل مشاكل الغدة النخامية تؤخر الحمل؟
الغدة النخامية على الرغم من ان حجمها صغير جدا ، الا ان لو حصل فيها اي خلل ولو بسيط ، هتاثر على الخصية اللي هي المصنع اللي بينتج الحيوانات المنوية وهرمون الذكورة ، وساعتها هتسبب لنا مشكلة كبيرة جدا وهي تأخر الإنجاب.
ودلوقتي تعالوا نعرف مع بعض ايه هي هرمونات الغدة النخامية اللي مسؤولة عن تأخر الإنجاب ؟
في البداية لازم تكون عارف ان الغدة النخامية هي موجودة اسفل الدماغ وتقوم بإفراز أهم 3 هرمونات في الجسم ، واللي بدورها بتاثر على وظيفة الرجل الجنسية والانجابية ، وهما :
1/ هرمون FSH
2/ هرمون LH
3/ هرمون البرولاكتين
- هرمون FSH و LH : هي هرمونات بتفرزها الغدة النخامية وبتبدا تمشي في الدم ، وبتكون عبارة عن إشارة من الغدة النخامية إلى الخصية
- هرمون FSH : بتفرزه الغدة النخامية وبعدها بيبدا يمشي في الدم ويروح لخلايا سيرتولي ، وبعد كدة ينتقل للخلايا المنوية ، فتبدأ الخصية تنتج حيوانات منوية.
- هرمون LH : بتفرزه الغدة النخامية وبعدها بيبدا يمشي في الدم ويروح لخلايا لايدج ، فتبدأ الخلايا دي تفرز هرمون الذكورة.
وهنا لازم تكون عارف حاجة مهمة جدا ، وهي ان الغدة النخامية لو كان فيها اي خلل او مشتغلتش ، كدة مش هيكون في إفراز للهرمونات دي ، وساعتها الخصية مش هتنتج حيوانات منوية ، وده طبعا هيسبب انعدام للحيوانات المنوية في الخصية ، وهيؤدي الى تاخر الانجاب.
ونيجي بقى للسؤال الاهم ، ايه اللي هيسبب خلل في الغدة النخامية ويخليها متشتغلش ومتنتجش الهرمونات ؟
1/ لو الغدة النخامية فيها عيب خلقي هيخليها متنتجش الهرمونات.
2/ لو في ورم حميد في الغدة النخامية.
3/ لو في التهاب في المخ.
4/ لو بناخد بعض الادوية زي أدوية علاج السرطان.
5/ لو عندنا نقص في وصول الدم إلى المخ نتيجة انخفاض ضغط الدم.
والعلاج هنا علشان الخصية تشتغل وتنتج حيوانات منوية ، لازم الاول نمشي على فترة علاج هرموني عشان نقدر نعوض بيه نقص هرمون FSH و LH في الجسم وتفضل الخصية شغالة وترجع تاني تنتج حيوانات منوية بصورة طبيعية ويحصل حمل طبيعي.
- هرمون البرولاكتين : ده هرمون بتفرزه الغدة النخامية ، والهرمون ده كل ما كانت نسبته قليلة في الجسم ، كل ما كان وضع الخصية ووضع هرمون FSH و LH طبيعي ، لكن لو نسبته ارتفعت عن المعدل الطبيعي ، ده هسيبب مشاكل كثيرة جدا زي :
1/ هيسبب نقص في مستوى هرمون FSH و LH وبكدة الخصية مش هتنتج حيوانات منوية وبالتالي مش هيحصل حمل طبيعي وهيحصل تاخر في الانجاب.
2/ هيسبب نقص في هرمون الذكورة وبكدة هيسبب ضعف في الرغبة الجنسية وضعف انتصاب ، ولما يحصل ضعف انتصاب ، بالتالي مش هيكون في علاقة زوجية وهيحصل تاخر في الانجاب.
والعلاج في الحالة دي هيكون عبارة عن اننا هناخد علاج هرموني لمدة 3-6 شهور علشان نقلل بيه مستوى هرمون البرولاكتين في الجسم ، وبعد العلاج هيحصل زيادة في عدد الحيوانات المنوية وهيبقى عندنا فرصة كبيرة ان يحصل حمل طبيعي.
ولو عايز تعرف معلومات أكثر عن حالات انعدام الحيوانات المنوية اللي لازم تعمل تفتيش ميكروسكوبي من الخصية ، اسمع الفيديو ده مع الدكتور اسامة البكل…
في النهاية ، لازم دايما ناخد بالنا على صحتنا وخاصة في الامور اللي بتتعلق بالصحة الجنسية والإنجابية ، عن طريق اننا دايما نعمل تحاليل الهرمونات عشان نطمن على نفسنا ، علشان لاقدر الله لو في اي مشكلة نقدر اننا نعالجها بدري ، قبل المشكلة ما تتطور وتكبر وتاثر على حياتنا وساعتها ميبقاش ليها علاج.
ولو احتجت تتابع معانا مشكلتك تقدر تتواصل معانا على رقم 01018874287 واحنا هنحجزلك ميعاد مع الدكتور اسامة محمد البكل مدرس واستشاري طب وجراحة أمراض الذكورة وتأخر الانجاب والصحة الجنسية بطب القصر العيني.