لازم نعمل تحليل سائل منوي قبل وبعد عملية دوالي الخصية ؟
يعتبر تحليل السائل المنوي من أهم التحاليل اللي بنستخدمها عشان نحدد سبب العقم وتأخر الإنجاب عند الرجال ، لأنه بيوضح لنا صحة وجودة الحيوانات المنوية من حيث العدد والحركة ونسبة التشوهات ، وكمان بيكشف عن أي خلل أو عيوب موجودة في الحيوانات المنوية ، وفي نفس الوقت بيقدر يوضح لنا لو الشخص اللي عنده انعدام في الحيوانات المنوية بيعاني من مشاكل تانية زي الالتهابات أو دوالي الخصية أو مشاكل هرمونية.
ودلوقتي بعد ما عرفنا أهمية تحليل السائل المنوي، تعالوا نعرف ليه مهم نعمل التحليل ده قبل وبعد عملية دوالي الخصية
بس في الاول لازم تكون عارف ان دوالي الخصية هي عبارة عن توسع غير طبيعي في الاوردة اللي مسؤولة عن نقل الدم من الخصية الى القلب ، والأوردة دي بيكون جواها صمامات وظيفتها انها بتمنع رجوع الدم ثاني للخصية بعد تدفقه في اتجاه القلب ، فوجود أي خلل في الصمامات دي ، ساعتها الدم هيبدأ يتراكم جوا الاوردة ومش هتبقي قادرة انها تستوعب كمية الدم اللي فيها وهتبدا تضخم والدم جوا الأوردة يسخن وساعتها هيرفع من درجة حرارة الخصية وهيزيد من تراكم المواد المؤكسدة ( ROS ) وده طبعا بدوره هيأثر علي انتاج الخصية للحيوانات المنوية وهيضر بالهرمونات المسؤولة عن انتاج الحيوانات المنوية ، ده غير كمان انه هيضر بالحيوانات المنوية السليمة والمكتملة وهيتسبب في حدوث تكسير في المادة الوراثية الموجودة في رأس الحيوان المنوي وحدوث تشوه بها وطبعا هيؤدي في النهاية إلى تأخر الإنجاب.
ساعتها الحل الوحيد اننا نعالج دوالي الخصية ، ولازم تكون عارف ان الجراحة الميكروسكوبية افضل واحسن طريقة تعالج بيها دوالي الخصية.
ولو عايز تعرف ازاى هتهتم بجرح العملية واي الادوية اللي هتاخدها بعد عملية دوالي الخصية ، اسمع الفيديو ده مع الدكتور اسامة البكل….
وهنا لازم تعرف معلومة مهمة جدا ، وهي أننا قبل ما نعمل عملية دوالي الخصية ، لازم الاول نعمل تحليل سائل منوي ويكون أكثر من عينة علشان نتاكد كويس من نتيجة التحليل ، هتقولي طب ليه مهم نعمل تحليل سائل منوي قبل عملية دوالي الخصية بالرغم من أن التشخيص بيوضح وجود دوالي في الخصية ولازم عملية…
1/ هقولك علشان نطمن على وضع ووظيفة الخصية قبل عملية دوالي الخصية ونشوف هل الخصية سليمة وبتنتج حيوانات منوية ولا لا، وده اللي هيوضحه تحليل السائل المنوي ، فلو لقينا ان الخصية شغالة وبتنتج حيوانات منوية وان العدد سليم والحركة طبيعية ونسبة التشوهات طبيعية ، ساعتها ممكن نحتاج نعمل تحليل تكسير المادة الوراثية و لو ده كمان طلع كويس فبنسبة كبيرة في سبب تاني لتأخر الإنجاب بالذات لو درجة الدوالي مش كبيرة و مفيش تأثير على حجم الخصية في الحالة دي مش هنبقي محتاجين نعمل عملية دوالي الخصية.
2/ ومهم نعمل تحليل السائل المنوي قبل عملية دوالي الخصية ، علشان لاقدر الله لو حصل تدهور في وظيفة الخصية ومبقاش في حيوانات منوية في الخصية ، تكون عارف ان العملية مش هي السبب وان كان من الاول عندك انعدام في الحيوانات المنوية وده اللي وضحه تحليل السائل المنوي.
وبعد ما عرفنا أهمية إجراء تحليل السائل المنوي قبل عملية دوالي الخصية ، تعالوا مع بعض نوضح شوية تعليمات ونصائح قبل إجراء تحليل السائل المنوي
1/ الامتناع عن العلاقة الزوجية من 2 إلى 5 أيام قبل إجراء التحليل.
2/ تجنب التعرض لأي مصدر حرارة عالي زي الساونا أو الحمامات الساخنة.
3/ تجنب استخدام الصابون قبل العينة ، لأن بعض المواد الكيميائية ممكن تقتل الحيوانات المنوية.
4/ إرسال العينة للمعمل خلال ساعة واحدة من إخراجها ، لأن الحركة بيتم تقييمها خلال ساعة من القذف.
ودلوقتي تعالوا نعرف ليه مهم نعمل تحليل سائل منوي بعد عملية دوالي الخصية ، وامتي بيحصل تحسن في التحليل.
في الاول لازم تكون عارف ان بعد ما بتعمل عملية دوالي الخصية بالجراحة الميكروسكوبية ، اول تحليل سائل منوي بتعمله بيكون بعد عملية دوالي الخصية بحوالي 6 شهور، وده لان دورة تكوين الحيوان المنوي بتستغرق حوالي 3 شهور علشان تبدأ الحيوانات المنوية تتصنع في الخصية وتظهر تاني في السائل المنوي ، وده لان بعد عملية دوالي الخصية اول حاجة بتتحسن هي عدد الحيوانات المنوية وبعدها الحركة بتتحسن ونسبة التشوهات بتقل، وبنلاحظ تحسن في تحليل السائل المنوي حوالي 70% ، وفي خلال سنة واحدة من عملية دوالي الخصية ممكن يحصل حمل طبيعي بنسبة من 40 الي 45 % ، اذا مهم نعمل تحليل السائل المنوي بعد عملية دوالي الخصية علشان نتابع نسبة التحسن وصلت لايه بعد العملية.
في النهاية ، لازم تكون عارف ان تحليل السائل المنوي من التحاليل المهمة جدا ، لانه بيوضح عدد الحيوانات المنوية في العينة قد ايه وطبيعة حركة الحيوان المنوي ونسبة التشوهات قد ايه ، وان لو في انخفاض في النسب الطبيعية، تحليل السائل المنوي هيساعدنا اننا نحدد سبب العقم وتاخر الانجاب.
ولو لسه عاوز تعرف اكثر عن تحليل السائل المنوي ونتائجه، تقدر تتواصل مع الفريق الطبي علي رقم 01018874287 وهما هيجاوبوا علي كل استفساراتك، أو تقدر تطلب منهم تحديد ميعاد مع الدكتور اسامة محمد البكل مدرس واستشاري طب وجراحة أمراض الذكورة وتاخر الانجاب والصحة الجنسية بطب القصر العيني.