هل خلل الجينات يسبب العقم عند الرجال

هل خلل الجينات يسبب العقم عند الرجال

ربنا سبحانه وتعالي قال في القرآن الكريم ( ولقد خلقنا الانسان في احسن تقويم ) وده معناه أنه خلق المولود الذكر بصفات ذكورية ، وخلق الأنثى بصفات أنثوية خاصة بيها ، بمعنى أن المولود الذكر بيكون عنده 46 كروموسوم XY ، والأنثى بيكون عندها 46 كروموسوم XX ، ولكن لو حصل اي خلل أو تغير في الجينات دي او في الكروموسومات أثناء تكوين الجنين ، هيؤدي إلى خلل في تكوين الشخص ، وممكن يوصل بيه الأمر في المستقبل لتاخر الانجاب او العقم.

ودلوقتي تعالوا نعرف مع بعض ايه هي الحالات اللي بيكون عندها خلل جيني في الكروموسومات بتاعتها ، واللي بتؤدي الى تاخر في الانجاب : 

1. متلازمة كلاينفلتر

في البداية لازم تكون عارف ان جينات الشخص الطبيعي بتكون عبارة عن 46 كروموسوم ،اثنين منهم الكروموسومات الجنسية ، اللي هي عبارة عن ( XY للذكور ، XX للإناث ) ، ولكن في حالة متلازمة كلاينفلتر ، وده عبارة عن مرض بيصيب الجنين اثناء نموه وتكوينه في رحم الأم ، وبيحصل بسبب وجود خلل في مرحلة انقسام الخلايا أثناء توزيع الكروموسومات من الأب والأم ، وده طبعا بيسبب خلل في جينات الشخص وبيكون عنده كروموسوم X زيادة في الخلايا بتاعته ، بمعنى أن بيكون عنده 47 كروموسوم XXY. 

ودلوقتي تعالوا نعرف ايه هي الأعراض والعلامات اللي بتكون عند الشخص المصاب بمتلازمة كلاينفلتر: 

1/ صغر حجم القضيب و انكماش الخصيتين.

2/ انخفاض شعر الوجه والجسم.

3/ نقص في مستوى هرمون الذكورة.

4/ تضخم حجم الثدي.

5/ تاخر ظهور علامات البلوغ.

6/ انخفاض الرغبة الجنسية وصعوبة حدوث الانتصاب.

7/ انخفاض عدد الحيوانات المنويه او انعدامها.

8/ تاخر الانجاب.

إذا حالات متلازمة كلاينفلتر هيكون عندهم صعوبة شديدة في إنتاج الحيوانات المنوية من الخصية ، وبالتالي هيعانوا من تأخر الإنجاب ، وده من خلال… 

1/ صغر وانكماش حجم الخصيتين هياثر على وظيفة الخصية في انتاج وتصنيع الحيوانات المنوية ، وهيؤدي إلى انعدامها وبالتالي هيسبب تاخر في الانجاب.

2/ بسبب انخفاض مستوى هرمون الذكورة هيؤدي إلي انخفاض الرغبة الجنسية ، وبالتالي مش هيحصل انتصاب للعضو الذكري ، لان زي ما قولنا قبل كدة ان علشان يحصل انتصاب لازم يكون الشخص عنده رغبة جنسية ، بالتالي كدة مش هيكون في علاقة زوجية وهيؤدي الي تاخر الانجاب.

في الحالة دي علشان نعالج مشكلة تأخر الإنجاب عند حالات متلازمة كلاينفلتر ، حلها الوحيد هو التفتيش الميكروسكوبي ، بس قبلها لازم ناخد فترة علاج هرموني عشان نعوض بيه نقص هرمون الذكورة في الجسم ، وبعدها نعمل عملية التفتيش الميكروسكوبي في الخصية ، وهي عملية بسيطة جدا ومش بتاخد اكتر من 10 دقائق ، عشان نستخرج الحيوانات المنوية من الخصية ونعمل بيها حقن مجهري.

2. خلل الجينات نتيجة الحذف الجيني

وهي حالات الحذف الجيني للكروموسوم Y ، وهو ده الكروموسوم اللي بيكون عليه الجينات المسؤولة عن تكوين الحيوانات المنوية ، وبيكون متقسم الى 3 مجموعات : 

• المجموعة A : ودي لو حصل فيها حذف كامل ، ومبقتش موجودة في الكروموسوم Y ، ده معناه ان مش هيكون في اصلا خلايا منوية تقدر تنتج حيوانات منوية ، ومش هنلاقي أي حيوانات منوية حتي لو عملنا تفتيش ميكروسكوبي.
• المجموعة B : لو حصل فيها حذف ، احتمال ضعيف جدا اننا نلاقي حيوانات منوية ، لان انتاج الحيوان المنوي بيقف في المراحل الاولي ، وساعتها مش هنعرف نعمل تفتيش ميكروسكوبي.
• المجموعة C : لو حصل فيها حذف ، فرصتنا اننا نلاقي حيوانات منوية بالتفتيش الميكروسكوبي بتكون قليلة ، لكن مش صفر ، لان بيكون عندنا امل اننا نلاقي حيوانات منوية نعمل بيها حقن مجهري. 

3. حالات نادرة: MALE XX

•  بمعني ان ده تشريحيا رجل طبيعي في تكوينه واعضائه ، بس الكروموسومات بتاعته انثوية ، يعني عبارة عن XX بس ، بمعني ان معندوش جينات مسؤولة عن تكوين الحيوانات المنوية ، بالتالي الشخص ده هيعاني من تاخر الانجاب.
• والحالات دي للاسف مش بيكون عندها فرصة للحمل الطبيعي ولا حتى ينفع نعملها تفتيش ميكروسكوبي من الخصية ، لان مش هيكون في اصلا بؤر منوية نتطلع منها حيوانات منوية.

ولو عايز تعرف ايه هي حالات انعدام الحيوانات المنوية اللي ينفع تعمل تفتيش ميكروسكوبي من الخصية ، اسمع الفيديو ده مع الدكتور اسامة البكل…

ولازم تبقي عارف ان خلل الجينات هو سبب مهم جداً لتأخر الإنجاب أو العقم عند الرجال ، ولكن تأثيره على الشخص بيختلف حسب نوع الخلل ، وفي حالات كتير ممكن تتعالج لو اتشخصت صح واخدت العلاج المناسب زي العلاج الهرموني أو عملية التفتيش الميكروسكوبي ، المهم إننا نكتشف المشكلة بدري علشان نحقق أعلي نسبة شفاء.

ولو لسه عاوز تعرف أكثر عن الخلل الجيني وعلاقته بانعدام الحيوانات المنوية في الخصية وتأخر الانجاب ، تقدر تتواصل معانا على الرقم ده 01018874287 واحنا هنحجزلك ميعاد مع الدكتور اسامة محمد البكل مدرس واستشاري طب وجراحة أمراض الذكورة وتأخر الانجاب والصحة الجنسية بطب القصر العيني.