هل يحدث حمل مع نقص عدد الحيوانات المنوية؟
أي مشكلة بتاثر علي حدوث الحمل ، فهي بالتأكيد بتاثر على العلاقة الزوجية ، وعلى الرغم من ان الحمل ممكن يحصل بحيوان منوي واحد يلتقي مع بويضة واحدة ، إلا أن عدد الحيوانات المنوية يعتبر سبب مهم جدا في زيادة حدوث الحمل ، بالتالي لو أي مشكلة أثرت على عدد الحيوانات المنوية ، فهي هتصعب من حدوث الحمل.
ودلوقتي تعالوا نعرف مع بعض ايه هو العدد الطبيعي للحيوانات المنوية ،
وامتي نقول علي الشخص ده انه بيعاني من نقص في عدد الحيوانات المنوية :
في البداية لازم تكون عارف ان الشخص الطبيعي بيستطيع إخراج حوالي من 40 إلى 300 مليون حيوان منوي في عملية القذف الواحدة ، لكن لو الشخص كان بيعاني من انخفاض في عدد الحيوانات المنوية ، ده معناه ان في انخفاض في عدد الحيوانات المنوية لاقل من 15 مليون حيوان منوي لكل ملليلتر من السائل المنوي في عملية القذف الواحدة.
ونقص عدد الحيوانات المنوية ممكن يحصل نتيجة لاسباب كثير جدا :
- قد تكون وراثية : بمعني ان في مشاكل في الخصية أثرت على انتاجها للحيوانات المنوية.
- أو مكتسبة : بمعني ان في أمراض صحية ومشاكل اتسببت في نقص عدد الحيوانات المنوية ، زي :
1/ وجود خلل هرموني : بمعني ان لو في خلل في مستوى هرمون الذكورة أو خلل في مستوى هرمون الأنوثة ، هيسبب مشكلة في الغدد التناسلية وهياثر على الخصية وجودتها للحيوانات المنوية.
2/ وجود انسداد في القنوات المنوية : بمعني ان في عائق أو حاجز بيمنع خروج الحيوانات المنوية من الخصية واختلاطها بالسائل المنوي ، وده هيسبب نقص في عدد الحيوانات المنوية.
3/ وجود التهابات أو عدوى في الجهاز التناسلي : بمعني ان لو في عدوى في الجهاز التناسلي كالامراض المنقولة جنسيا ، أو وجود التهابات في الخصية او البربخ ، هياثر علي الخصية وممكن يسبب انعدام أو نقص في الحيوانات المنوية.
4/ دوالي الخصية : لان دوالي الخصيتين بتاثر على الخصية وانتاجها للحيوانات المنوية ، وخصوصا لو كانت الدوالي دي من الدرجة الثانية أو الثالثة ، هترفع من درجة حرارة الخصية وهتزيد من تراكم المواد المؤكسدة ( ROS ) اللي هتضر بالحيوانات المنوية السليمة والمكتملة ، وهتسبب انعدام أو نقص في عدد الحيوانات المنوية.
5/ الخصية المعلقة : ودي حالة مرضية بتصيب الأطفال الذكورة بعد الولادة مباشرة ، وده معناه ان في خصية واحدة أو الاثنين معلقين داخل البطن ، والحالة دي لازم تتعالج خلال السنة الأولى من عمر الطفل ، لأنها لو فضلت معلقة داخل البطن ، ده هيعرضها لدرجة حرارة الجسم العالية ، وهتسبب للطفل مشاكل كثير جدا لما يكبر ، لان الخصية المعلقة هتسبب نقص في عدد الحيوانات المنوية و تاخر الانجاب.
ولو عايز تعرف بالتفصيل علاقة الخصية المعلقة بتاخر الانجاب ، اسمع الفيديو ده مع الدكتور اسامة البكل…
6/ التدخين بشراهة : لأن مادة النيكوتين الموجودة في السجائر بتقلل من وصول الدم إلى الخصية و هياثر على إنتاج الخصية وجودتها للحيوانات المنوية ، ده غير ان مادة النيكوتين بتسبب ضيق في الأوعية الدموية الموصلة للعضو الذكري وبتقلل من تدفق الدم للقضيب ، وبالتالي بتسبب ضعف انتصاب.
7/ وجود مشاكل في القذف مثل القذف المرتجع :
- في الطبيعي ، السائل المنوي وقت القذف بيخرج من مجرى البول ، لكن في القذف المرتجع بيرجع للمثانة بدل ما يخرج من مجري البول.
- وده بيحصل لما يكون في ضعف في عضلة عنق المثانة ، المسئولة انها تقفل وقت القذف لمنع ارتجاع السائل المنوي للمثانة ، و لو فيها ضعف أو مشكلة ممكن متقفلش كويس وقت القذف.
- في الحالة دي ، الحيوانات المنوية مش هتخرج بالشكل الطبيعي ، و هترجع على المثانة و بعدها تخرج مع البول بدلا من الخروج اثناء القذف ، وده هيسبب مشكلة كبيرة في السائل المنوي ونقص في عدد الحيوانات المنوية.
8/ الأجسام المضادة : بمعنى ان جهاز المناعة بيهاجم الحيوانات المنوية باعتبارها أجسام غريبة وبيفرز ضدها مضادات اكسدة وممكن يتسبب في موت الحيوانات المنوية ونقص في عددها.
9/ واخيرا لو بنتعرض للعلاج الكيميائي او الاشعاعي : لأن علاج الأمراض السرطانية بيهاجم الخلايا في الخصية على أنها خلايا سرطانية ، وممكن يتسبب في موتها وده طبعا هياثر علي الخصية وتصنيعها للحيوانات المنوية ، علشان كده بننصح دايما اللي هيتعرض للعلاج الاشعاعي والكيماوي ، انه يجمد عينة من الحيوانات المنوية عشان يستخدمها بعد التعافي في عملية الحقن المجهري.
ودلوقتي بعد ما عرفنا الاسباب اللي ممكن تؤدي الي نقص عدد الحيوانات المنوية واللي ساعتها بيكون صعب ان يحصل حمل طبيعي ، تعالوا نعرف ازاي نعالج المشكلة دي عشان نحسن من وظيفة الخصية انها ترجع تاني تنتج حيوانات منوية بأعداد كبيرة :
بس في البداية لازم تكون عارف ان علشان تعالج نقص عدد الحيوانات المنوية في الخصية ، لازم الاول تعالج السبب الي أدى إلى نقص العدد ، بمعني ان لو كان السبب في انخفاض عدد الحيوانات المنوية :
- وجود خلل في الهرمونات : وقتها لازم ناخد علاج هرموني لمدة 3 شهور علشان نظبط مستوي الهرمونات في الجسم ونحسن من انتاج الخصية للحيوانات المنوية.
- أما لو كان السبب هو دوالي الخصية : وقتها العلاج اننا نعالج الدوالي بالجراحة الميكروسكوبية افضل واحسن طريقة تعالج بيها دوالي الخصية من أي ما تضر الخصية.
- لكن لو كان السبب وجود التهابات في الخصية : وقتها لازم نعمل مزرعة سائل منوي علشان نحدد نوع البكتيريا والمضاد الحيوي المناسب لحالة المريض.
- ولو كان السبب قذف مرتجع : وقتها العلاج هيكون بالأدوية علشان ننشط عضلة عنق المثانة ، وان السائل يطلع للامام من مجرى البول ، بدلا من تدفقه للخلف وعودته للمثانة.
- لكن لو كان السبب في نقص عدد الحيوانات المنوية وجود مشكلة وراثية : ساعتها الحل الوحيد اننا نعمل حقن مجهري.
في النهاية ، لازم تكون عارف ان اي مشكلة بتتعلق بالإنجاب ، اوعى تستهون بيها ، لانها مشكلة مهمة ، وتستحق انك تدور عليها وتعالجها ، والاهم انك تبقي عارف ومتأكد أن كل مشكلة وليها علاج ، ومشكلة نقص عدد الحيوانات المنوية ليها أكثر من طريقة للعلاج وبعدها هيبقي سهل يحصل حمل طبيعي.
ولو لسه عندك اي تساؤل او استفسار تقدر تتواصل مع فريقنا الطبي علي الرقم ده 01018874287 وهما هيجاوبوا علي كل اسئلتك ، او تقدر تطلب منهم تحديد ميعاد مع الدكتور اسامة محمد البكل مدرس واستشاري طب وجراحة أمراض الذكورة وتاخر الانجاب والصحة الجنسية بطب القصر العيني.