هل تحليل السائل المنوي بيكشف سبب تأخر الإنجاب ؟
تحليل السائل المنوي يعتبر من أهم وأول الفحوصات اللي بتتعمل عند الرجل، علشان يوضح سبب العقم وتأخر الإنجاب عند أي زوجين بيوجهوا صعوبة في الحمل. لأن تحليل السائل المنوي يُعتبر المؤشر الرئيسي اللي بنفحص من خلاله صحة وجودة الحيوانات المنوية في السائل المنوي، وأهمها العدد، الحركة، والشكل.
ودلوقتي تعالوا نعرف مع بعض ايه هو اصلا تحليل السائل المنوي وازاي بيتم اجراءه ، وايه اللي نتائجه بتوضحه بنكشف من خلاله سبب تأخر الإنجاب.
في البداية لازم تكون عارف ان السائل المنوي من السوائل المهمة اللي بتفرزه الحويصلات المنوية والبروستاتا ، واللي بيحتوي على مواد مغذية وانزيمات بتعمل على تغذية الحيوانات المنوية وحمايتها من اول ما بتخرج من القضيب وقت القذف ولحد ما بتوصل إلى مهبل الزوجة علشان تخصب الزوجة ويحصل حمل طبيعي.
وتحليل السائل المنوي هو تحليل بنعمله علشان نكشف سبب تأخر الإنجاب عند زوجين عدي علي جوازهم أكثر من سنة والزوجة معندهاش اى موانع ، والتحليل لازم يتعمل في مكان متخصص ، وتكون أكثر من عينة وتكون على فترات متباعدة حوالي 2-3 اسابيع ، علشان نتاكد كويس من نتيجة التحليل.
ولو عايز تعرف بنحتاج نعمل تحليل السائل المنوي كام مرة علشان نحدد سبب تأخر الانجاب ، اسمع الفيديو ده مع الدكتور اسامة البكل…
وبعد ما عرفنا ازاي بيتم إجراء تحليل السائل المنوي، تعالوا نعرف مع بعض ايه هي نتائج تحليل السائل المنوي واللي من خلالها بنكشف سبب تأخر الإنجاب.
1. عدد الحيوانات المنوية:
- بمعنى أن الشخص الطبيعي بيخرج حوالي 39 مليون حيوان منوي أو أكثر في القذف الواحد.
- وحوالي 15 مليون حيوان منوي لكل ملليلتر من السائل المنوي في عملية القذف الواحدة ، وفي حالة ان العد قل عن المعدل الطبيعي ، كدة الشخص ده بيعاني من نقص في عدد الحيوانات المنوية وهيسبب تأخر الإنجاب.
2. حركة الحيوانات المنوية:
بمعنى أن حركة الحيوان المنوي مهمة ، لان ده اللي بيخليه يتحرك ويعوم لحد ما يوصل للبويضة ويخصبها ويحصل حمل بشكل طبيعي ، ولازم الحيوان المنوي يتحرك على الاقل بسرعة 25 ميكرو متر في الثانية الواحدة ، وحركة الحيوان المنوي 3 انواع :
- حركة تقدمية : يعني الحيوان المنوي بيتحرك حركة مستقيمة بسرعة 25 ميكرو متر في الثانية الواحدة.
- حركة غير تقدمية : هنا الحيوانات المنوية بتتحرك في مكانها بسرعة أقل من 25 ميكرو متر في الثانية الواحدة.
- حيوانات منوية غير متحركة : بمعنى أن الحيوانات المنوية مش بتتحرك اصلا.
فلو لاقينا حركة الحيوانات المنوية في العينة أقل من 40%، كدة الحيوانات المنوية ضعيفة الحركة ، وده هيسبب تأخر الإنجاب.
3. شكل الحيوانات المنوية:
الحيوان المنوي بيتكون من رأس وعنق وذيل.
- رأس الحيوان المنوي : لازم تكون بيضاوية الشكل وفيها 23 كروموسوم اللي بيحمل المادة الوراثية للأب المسؤولة عن تكوين الجنين ، والراس بيكون عليها اكروسوم وده اللي بيكون جواه انزيمات مسؤولة عن اختراق الحيوان المنوي للبويضة ، ولو مش موجود كدة هيكون حيوان منوي مشوه.
- عنق الحيوان المنوي : يعتبر مصدر الطاقة اللي بيحرك ذيل الحيوان المنوي علشان يوصل للبويضة ويخصبها.
- ذيل الحيوان المنوي : لازم يكون مستقيم ، لأن جواه أنابيب بتتفاعل مع بعض بتخلي الحيوان المنوي يتحرك يمين وشمال لحد ما يوصل للبويضة ويخصبها.
وبكده لو كان في أي تشوه في أي من المواصفات دي ، الحيوان المنوي هيكون مشوه ومش هيقدر يوصل للبويضة ويخصبها ويحصل حمل.
والشخص الطبيعي لازم يكون عنده نسبة من الحيوانات المنوية المشوهة في العينة ، والنسبة دي بتكون اقل من 96% ، ونسبة الحيوانات المنوية الطبيعية بتكون 4% ، ولو نسبة الحيوانات المنوية المشوهة زادت عن المعدل الطبيعي ، كدة الشخص ده بيعاني من تشوه تام في شكل الحيوان المنوي ، وهيؤدي إلى تأخر الإنجاب.
4. حجم السائل المنوي:
- بمعنى أن حجم السائل المنوي للشخص الطبيعي اللي بيخرجه وقت القذف لازم يكون من 1.5-5 مل.
- لو الحجم أقل من الطبيعي ، ده بيدل ان في انسداد جزئي أو كلي ، وبكدة هيحصل تأخر في الإنجاب.
5. حموضة السائل المنوي:
- بمعنى ان النسبة الطبيعية لحموضة السائل المنوي 7.2 – 8.
- ولو زادت نسبة الحموضة عن المعدل الطبيعي ، ده بيعمل ضعف في حركة الحيوان المنوي وهيسبب تاخر في الانجاب.
6. لزوجة السائل المنوي:
- بمعنى أن السائل المنوي لما بيخرج وقت القذف بيكون متماسك ، وبعد حوالي من 15 الي 30 دقيقة بيبدا يسيل علشان يسهل خروج الحيوانات المنوية.
- لكن لو نسبة اللزوجة كانت عالية ، ده هيضعف من حركة الحيوان المنوي وهيسبب تأخر الإنجاب.
7. خلايا الدم البيضاء في العينة:
- بمعنى أن عدد خلايا الدم البيضاء في عينة السائل المنوي لازم تكون اقل من مليون خلية ، لكن لو زادت عدد خلايا الدم البيضاء عن المعدل الطبيعي ، بيسبب انعدام للحيوانات المنوية ، وهيؤدي الى تاخر في الانجاب ، وغالبًا بتكون بسبب التهابات في الجهاز التناسلي ، وده ممكن يسبب زيادة في المواد المؤكسدة وتكسير في المادة الوراثية.
في النهاية ، لازم تكون عارف ان تحليل السائل المنوي تحليل مهم ، لانه بيوضح لنا لو في اي مشكلة في الحيوانات المنوية ، وهي اللي مسببه تاخر الانجاب ، وانك كمان لازم تعمله ضمن فحوصات وتحاليل قبل الجواز ، علشان تطمن على نفسك ، ولو كان في اي مشكلة بسيطة نقدر نعالجها قبل ما المشكلة دي ما تسبب لك مضاعفات كثير بعد كدة.
ولو محتاج تتابع معانا ، ونحجز لك ميعاد مع الدكتور اسامة محمد البكل مدرس واستشاري طب وجراحة أمراض الذكورة و تأخر الانجاب والصحة الجنسية بطب القصر العيني ، تواصل معانا على الرقم ده 01018874287.