عادات بتأثر على الخصوبة والقدرة الجنسية عند الرجال
الدورة الدموية السليمة و هرمون الذكوره هما أساس القدرة الجنسية و الانجابية ، لأن الدورة الدموية هى اللى بتخلى العضو الذكرى يحصله انتصاب ، وده اللى بيخلينا نقدر اننا نمارس العلاقة الجنسية ، و هى كمان اللى بتخلى الخصية قادره انها تقوم بوظايفها سواء انتاج هرمون الذكورة و اللى بيكون مسؤول عن الرغبة و القدرة الجنسية و ان الجسم يظهر عليه كل الصفات الذكورية فى مرحلة البلوغ ، او انتاج الحيوانات المنوية .
طيب اى اللى ممكن يسبب مشكلة فى الدورة الدموية أو نقص فى نسبة هرمون الذكورة ؟
عشان نجاوب على السؤال ده ، هنحتاج نتكلم عن العادات اللى ممكن نكون بنعملها و تكون بتأثر على الخصوبة والقدرة الجنسية .
و خلونا نقسم العادات دى لنوعين :
اولاّ : عادات صحية زى :
- النظام الغذائى :
عشان نكون ماشين على نظام غذائى مفيد ، لازم نكون بناخد يوميا السعرات الحراريه اللي الجسم محتاجها مش اكتر عشان ميحصلناش زيادة فى الوزن ، و مش اقل فيكون عندنا خمول وارهاق ، وعشان يكون النظام الغذائى اللى ماشين عليه صحى و بيوفر للجسم احتياجاته
- لازم اكلنا يكون فيه زينك و فيتامين د و دهون صحية و ده هنلاقيه موجود فى منتجات كتير زى (الأسماك – صفار البيض ) و لو عملنا كده هيزيد عندنا هرمون الذكوره ، و هنحافظ كمان على أن وزننا ميزدش ،
- لازم نبعد عن الاكل المقلي و اللحوم المصنعة زي مثلا السجق و البسطرمة
- لازم نقلل من اكل السكريات و النشويات زي (العيش – الرز – المعجنات ) ، و نبعد كمان عن مشروبات الطاقة والمشروبات اللى فيها صودا ، لان كل ده بيزود من انتاج الانسولين ، وده هيتسبب فى زيادة الوزن ونقص فى نسبة هرمون النمو و هيحول هرمون الذكورة لهرمون انوثه ، وده طبعاّ هيأثر على الانتصاب والرغبة الجنسية .
- و نبعد كمان عن الاكل الدسم لانه بيزود من الكوليسترول ، وده من اهم اسباب ضيق الشرايين وضعف الدورة الدموية ، و بكده الدم مش هيوصل كويس للقضيب ، وده هيسبب ضعف انتصاب .
- لازم نبعد عن اننا نستخدم بذور الكتان لانها بتزود هرمون الانوثه و بتقلل هرمون الذكورة
و بعد ما نمنع و نقلل كل الحاجات اللى قولنا عليها دى ، لازم نضبط مواعيد الاكل وناكل بعد ما تكون المعدة هضمت كل الاكل اللى كان فيها ، لان ده بيساعد اكتر على حرق الدهون .
و فى هنا حاجة خد بالك منها عشان بس راحتك انت ، بلاش ناكل اى حاجة قبل العلاقة الزوجية على طول ، لان ده بيسبب غازات في البطن و ده بيخلينا منكنش مرتاحين وقت العلاقة الزوجية .
- السمنة المفرطة:
و دى من الحاجات اللي بتأثر على الرغبة والقدرة الجنسية والإنجابية، لان معنى ان عندي سمنة مفرطة اننا عندنا خلايا دهنية كتير جدا، وكل خلية دهنية بيكون فيها انزيم اسمه الاروماتيز، والانزيم ده بيحول هرمون الذكورة لهرمون الانوثة، و ده هيسبب ضعف في الانتصاب وضعف في الرغبة الجنسية ونقص في عدد وحركة الحيوانات المنوية، ده غير مشاكل تانية كتير هتسببها السمنة زي:
- التثدى .
- مشاكل فى السائل المنوى ممكن تتسبب فى موت الحيوانات المنوية او تكسير في المادة الوراثية و ده ممكن يكون سبب في تشوه الاجنه .
- و هنلاقى كمان عندنا صعوبة فى الحركة ، و ده هيأثر على ادائنا وقت العلاقة الزوجية .
- ده غير ان زيادة الدهون فى منطقة البطن و العانه ، هتكون سبب فى ان العضو الذكرى يكون مدفون وده هيبين حجم العضو الذكري اصغر من الطبيعى .
- و كمان الدهون بتزود من درجة حرارة الخصية ، وده هيأثر على انتاج الخصية للحيوانات المنوية .
و عشان كده لازم ديماّ نحاول نحافظ على وزننا ، و لو كان عندنا سمنه مفرطة لازم نتابع مع دكتور مختصص و نحاول نوصل لوزن مناسب ، عشان نقدر نحافظ على صحتنا بشكل عام وعلى الصحة الجنسية والإنجابية
- لو عندنا سكر غير منتظم :
لازم اننا نهتم بتظبيط السكر ، لانه بيأثر على الشرايين و الأعصاب و بيخلى الدم مايوصلش كويس للقضيب وده هيسبب ضعف فى الانتصاب
ثانياّ : عادات سلوكية :
- ممارسة الرياضة :
زى ما هى من اكتر الحاجات اللي بتزود هرمون الذكورة ، هى كمان ممكن تتسبب فى نقصه او ان انتاجة يقف خالص ،و هقولك حالا ازاى ده ممكن يحصل :
- لو مارسنا الرياضة بشكل معتدل بمعنى أننا بنتمرن لفترات مش طويله اوى ، و وقت التمرين لو هنشيل اوزان تكون الاوزان مناسبة لينا ، فبكده احنا بنمرن كل عضله فى جسمنا بشكل يقويها مش يجهدها ، وده هيحسن من وضع الدورة الدموية وضخ الدم ، و هيزود كمان من نسبة هرمون الذكورة ، و بكده تبقى الرياضة مفيدة جدا لجسمنا
- لكن لو مارسنا الرياضة لفترات طويله جدا فى اليوم الواحد و شيلنا اوزان تقيله جدا ، ده غير انه ممكن يتسبب في اصابات كتير جدا و يجهد عضلات جسمك ، انت كمان هتكون بتحفز هرمون الكورتيزول انه يتفرز بكميات كبيرة جدا و ده هيقلل من هرمون الذكورة ، و هيضعف من ضخ الدم ، وده هيسبب ضعف فى الانتصاب .
- اما اللى بيخلى هرمون الذكورة يقف إنتاجه خالص ، هو انك تكون عاوز تعمل عضلات و فورمة بسرعه فتبدأ تحقن نفسك بهرمون الذكورة ، وهنا انت اه هتنجح انك تعمل عضلات و فورمة كويسة جدا فى وقت قياسى ، بس فى المقابل هتستغنى عن العلاقة الجنسية وأن يكون عندك اطفال ، وده لان حقن هرمون التستوستيرون ( هرمون الذكورة ) بيكون ليها اضرار كتير جدا حتى لو بطلتها زى :
- ضعف الانتصاب و ضعف شديد جدا فى الرغبة الجنسية ،
- ممكن كمان يحصل ضمور للخصية ومش بنقدر اننا نرجعها لوضعها الطبيعى ، وبكده هيقف إنتاج الحيوانات المنوية.
عشان كده مهم جدا اننا نمارس الرياضة بشكل معتدل نبنى بيه عضلاتنا و نحافظ فى نفس الوقت على قدرتنا الجنسية و الانجابية .
- لو على طول بنلبس لبس ضيق :
ده هيتسبب فى رفع الخصية و انها تقرب اكتر من الجسم و ده هيزود حرارتها و هيقلل من قدرتها على إنتاج الحيوانات المنوية
- لو بنعمل العلاقة الجنسية بطريقة غلط تأذى العضو الذكرى زى :
- اننا نكون بنمارس وضع معين فى العلاقة الزوجية زى وضع Woman on top ، هنا ممكن يحصل انزلاق للقضيب وقت الدخول و الخروج من المهبل ، و ده هيتسبب فى خبط القضيب فى عظمة الحوض عند الزوجة ، وهنا ممكن يحصل كسر للقضيب ، و ده يعتبر من حالات الطوارئ اللى لازم نروح فيها فورا للمستشفى ، لانه لو متلحقش ممكن يسبب عجز جنسي ونفقد الانتصاب نهائى و وقتها لازم هنحتاج اننا نركب دعامة .
- من الحاجات الغلط اللى ناس كتير ممكن تكون بتعملها عشان تأخر القذف و تطول مدة العلاقة الزوجية ، انها تفضل تضغط على العضو الذكرى بعنف عشان تمنع القذف ، وده بيسبب كدمات للعضو الذكرى والكدمات دى مع تكرارها هتبدأ تسبب تليف فى العضو الذكرى (مرض بيرونى) ، و ده ممكن يسبب بعد كده ضعف انتصاب.
- التوتر و الاكتئاب و السهر لفترات طويلة
التوتر هيأثر بشكل كبير على الانتصاب لان من أهم الأسباب النفسية لضعف الانتصاب هو التوتر ،
أما السهر لفترات طويلة فده بيأثر على الخصوبة و جودة الحيوانات المنوية ، و كمان بيأثر على إفراز هرمون النمو لو كنا لسه فى مرحلة البلوغ لأنه بيتفرز وقت النوم .
والاكتئاب ممكن يخلينا نلجأ لأدوية مضادة للإكتئاب، واللي بعد أقل من 3 شهور من تعاطيها هتأثر على الانتصاب وجودة السائل المنوى وده هيسبب تكسير للمادة الوراثية في الحيوانات المنوية و تشوه في الأجنة.
- التدخين:
وده لان السيجارة الواحدة بيكون فيها اكتر من 7000 مادة سامة، ده غير اضرار النيكوتين نفسه والغازات اللي بتطلع من اشتعال التبغ، وتعالوا نتكلم عن كل حاجة ونشوف ازاي بتأثر على الخصوبة والقدرة الجنسية،
اولاّ : بالنسبة لمادة النيكوتين اللى فى السجاير ، فدى بتسبب ضعف فى الشرايين التاجية و ضيق فى الأوردة و ده بيضر بتدفق الدم و بكده مش هيحصل انتصاب او هيحصل بس مش هنقدر نحافظ عليه لان الانتصاب بيحتاج لدوره دمويه قويه ، وكمان بتحتاجها الخصية زى ما قولنا قبل كده عشان انتاج هرمون الذكورة و الحيوانات المنوية ، ده غير أن النيكوتين بيأثر على الحمض النووى و بيعمل طفرات وراثية بتسبب امراض سرطانية ،
أما بالنسبة للتبغ فهو لما بيتحرق بيطلع منه غاز اسمه احادى اكسيد الكربون و ده بيأثر على حاجتين :
- إنتاج الحيوانات المنوية و بيسبب ضعف أو انعدام لحركتها و بيزود نسبة التشوهات ،
- ده غير انه بيأثر على انتاج اكسيد النيتريك فى الجسم وده اللى بيكون مسؤول عن نقل الإشارات العصبية ، للأعصاب المسؤولة عن الانتصاب ،
و بكده التدخين هيكون بيسببلك ضعف جنسي و ضعف للحيوانات المنوية .
- ادمان المخدرات والمواد الكحولية :
كتير بيكونوا فاكرين انها بتزود الرغبه ، لكن فى الحقيقة الخمور بتخليك
اولاّ: متحسش اصلا بمتعة العلاقة الجنسية و لا تحس بمدتها لان مبتكونش واعى لتصرفاتك او للوقت
ثانياّ: بيلغوا تحكم المخ فى الاعصاب و بيسببوا التهاب للاعصاب الطرفيه ، و بما ان العضو الذكري يعتبر من الأعصاب الطرفية فانت كل ما هتشرب خمور أو مخدرات كل ما هتضعف و تضر بأعصاب العضو الذكرى و ده هيعمل ضعف انتصاب و سرعه في القذف ،
ثالثاّ: المخدرات بتسبب نقص فى عدد الحيوانات المنوية و ضعف فى الحركة و تشوهات ، بسبب المواد السامة اللى بتكون فيها ،
رابعاّ : بعض انواع المخدرات بتسبب ارتخاء لعضلات الأوعية الدموية و ده هيأثر على الانتصاب ، ده غير انها بتقلل من هرمون الذكوره اللى من غيره مش هيكون فى ولا رغبة جنسية ولا انتصاب .
- ممارسة العادة السرية :
العادة السرية نفسها ملهاش ضرر و مش بتسبب انعدام للحيوانات المنوية زى ما بنسمع و لا بتعمل ضعف انتصاب لو اتعملت بطريقة متأذيش العضو الذكرى ، ولما بنقول كده ده مش تشجيع على انك تمارسها بس لازم تبقى عارف المعلومة الصح ،
العادة السرية تكون مضره لو اتمارست بطريقة غلط و ممكن تسبب اضرار عضوية و اضرار نفسية ،
و خلينا نبدأ نتكلم عن الأضرار العضوية زى :
- لو طولنا في الممارسة ومنعنا القذف ده هيسبب احتقان للبروستاتا و الخصية ، لان عشان يحصل انتصاب لازم القضيب يكون مليان بالدم ، و عشان يحصل القذف البروستاتا بتبدء تفرز السائل المنوى ، و لما بيجى وقت القذف بيخرج السائل المنوى من البروستاتا عن طريق مجرى البول و بكده البروستاتا بتفضى ، و بعد القذف بيبدأ العضو الذكرى يرتخى و الدم اللى كان فيه يرجع مره تانى للدورة الدموية ، لكن اللى بيحصل لما تمنع القذف أن الدم اللى كان مالى العضو الذكرى ده بيفضل موجود فى الحوض و مش بيرجع للدوره الدموية و ده بيسبب احتقان للخصية وده طبعا هيأثر على إنتاجها للحيوانات المنوية وهرمون الذكورة ، و بالنسبة للسائل المنوي فهو كمان مطلعش و فضل فى البروستاتا و ده بيعمل احتقان في البروستاتا .
- لو مارسنا العاده السريه بعنف شديد ، ده ممكن يسبب تليف في أنسجة العضو الذكري (مرض بيرونى) و يحصل بسببه ضعف انتصاب .
- لو مارسنا العاده السريه اكتر من مره فى اليوم ، لان بسبب الاحتكاك الزيادة فى العضو الذكرى هيبدأ يحصل التهابات فى جلد القضيب ، وده مش بيحصل فى العلاقة الزوجية لأن المهبل نفسه مش بيكون خشن ، وكمان وقت العلاقة الزوجية بيكون في افرازات مهبلية و دى اللى بتسهل دخول و خروج القضيب من غير ما يكون فى احتكاك شديد يسبب ضرر لجلد العضو الذكرى .
اما بالنسبة للضرر النفسي اللى بتسببه العاده السريه بيكون:
- العادة السرية بتعمل توحد فى العلاقة ، بمعنى انك مش بتكون متقبل فكرة وجود شريك معاك فى العلاقة ، وده بيخليك ميكونش عندك رغبة فى العلاقة الزوجية ، و دايما بتحس بمتعه اكتر وقت العادة السريه ، وده هيسبب عندك ضعف في الرغبة ، اللى تعتبر مرحلة من مراحل الضعف الجنسي
- ولو كنا بنعمل العادة السرية بشكل عنيف و صلب، فده بيخلينا نستمتع و نوصل للنشوة الجنسية بشكل معين ، و لو ده محصلش فى العلاقة الزوجية ، وقتها بنبعد عنها و مش بنفضل أننا نمارسها لان مش بنوصل فيها لنفس المتعة اللي بنحسها في العادة السرية ، غير ان ده بيخلي القذف يتأخر أو ما يحصلش أصلا في العلاقة الزوجية .
- لو بنتفرج على افلام جنسية
ده بيأثر على العلاقة الزوجية ، لاننا بنشوف العلاقة الجنسية بشكل معين و بنكون متوقعين ان هو ده الشكل الطبيعى للعلاقة ، فلما بنلاقى غير كده بنبدأ نفقد الرغبة فى العلاقة الزوجية و نفضل مشاهدة الأفلام الجنسية ، ده غير ان النوع ده من الافلام الناس اللى بتشارك فيه بيكون ليهم مواصفات معينة وهنا هتبدأ تقارن بين نفسك وبين الحاجات اللى بتشوفها فى الافلام و بكده هيكون عندك مشكله مع نفسك انك مش واثق فى أدائك ، و ده غير انك ممكن تبدء متكونش راضي عن زوجتك بسبب برضو المواصفات اللى شوفتها ،وكل ده بيخليك تبعد عن العلاقة الزوجية ، و يبقى عندك ضعف في الرغبة الجنسية
- لو بنمارس الجنس الغير آمن :
و ده ممكن يتسبب في نقل أمراض جنسية ليك ولكل اسرتك لان فى بعض الأمراض الجنسية بتتنقل عن طريق التلامس ، ده غير ان فى امراض جنسية بتسبب انسداد للقنوات المنوية و ده طبعاّ هيتسبب فى انعدام الحيوانات المنوية فى السائل المنوى و بكده هيحصل تأخر فى الحمل ، و لو حصل و قدرنا اننا نستخرج حيوانات منوية و عملنا حقن مجهرى ، فالطفل اللى هيتولد فى احتمال كبير انه يكون حامل بردو للمرض لان فى امراض جنسية مش بتختفى تماماّ بالعلاج ،
ده غير ان بسبب المرض الجنسي انت بتفقد الرغبة اصلا فى العلاقة الجنسية ،لانك بتكون خايف انك تنقل المرض للطرف التاني ، وبكده انت مش بتضر نفسك بس انت كده بتضر كل اللى حواليك .
- و اخيرا لو بنتعرض لدرجات حرارة عالية بسبب :
- اننا بنقعد في مياه ساخنة لفترات طويلة،
- أو لو كانت طبيعة شغلنا بتخلينا نتعرض لدرجة حرارة زى مثلا لو بنشتغل في مجال صناعة الزجاج فده بيخلينا نقف قدام درجات حرارة عالية لفترات طويلة ، أو لو بنشتغل و احنا حاطين لاب توب على رجلنا، كل ده بيرفع من درجة حرارة الخصية و بيقلل من إنتاجها للحيوانات المنوية .
ولو عايز تعرف معلومات اكثر عن العادات الغير الصحية اللي بتسبب ضعف انتصاب ، اسمع الفيديو ده مع الدكتور اسامة البكل…
فى الاخر خليك عارف إن الصحة الجنسية معتمدة على الصحة الجسدية و النفسية ، و إن الصحة الجنسية والإنجابية حاجة مهمة جدا ، ومينفعش نتكسف اننا نتكلم فيها ، لو عندنا اى مشكلة لازم نكشف ونعالجها عشان تأثيرها علينا ميزدش.
و دلوقتى لو عندك اى استفسار تقدر تتواصل معانا على رقم 01018874287