العلاج الهرموني قبل عملية التفتيش الميكروسكوبي
تعتبر عملية التفتيش الميكروسكوبي من أحدث وأدق التقنيات المستخدمة لاستخراج الحيوانات المنوية من الخصية، خاصة في حالات انعدام الحيوانات المنوية بالسائل المنوي ،
ولكن في بعض حالات انعدام الحيوانات المنوية بتحتاج لفترة علاج هرموني قبل عملية التفتيش الميكروسكوبي ، عشان نرفع من فرص نجاح العملية.
ودلوقتى تعالوا نعرف مع بعض ايه هي حالات انعدام الحيوانات المنوية اللي لازم تاخد فترة علاج هرموني قبل عملية التفتيش الميكروسكوبي.
1. حالات متلازمة كلاينفلتر
متلازمة كلاينفلتر هى حالة جينية بيكون فيها خلل في عدد الكروموسومات، فالشخص الطبيعي بيكون عنده 46 كروموسوم، اثنين منهم كروموسومات جنسية XX للإناث و XY للذكور، لكن الشخص اللى بيكون مصاب بمتلازمة الكلاينفلتر بيكون عنده 47 كروموسوم (XXY) بدل من (XY) للذكور،
وده بيحصل بسبب وجود خلل في مرحلة انقسام الخلايا أثناء توزيع الكروموسومات للجنين من الأب والأم. والمتلازمة دي بتسبب للشخص المصاب بيها مشاكل كتير زى :
- ضعف في الكتلة العضلية ،
- قلة شعر الجسم والوجه،
- تضخم الثديين (التثدي) ,
- والعقم ،
و ده بيكون بسبب صغر حجم الخصية وانخفاض هرمون الذكورة وارتفاع هرمون الأنوثة ، ودا طبعا هيكون بيأثر على إنتاج الحيوانات المنوية.
عشان كده الاشخاص اللى بيكون عندهم متلازمة الكلاينفلتر لازم قبل ما يعملوا عملية التفتيش الميكروسكوبي ياخدوا فترة علاج هرموني لمدة ماتقلش عن 3 شهور و ممكن توصل الي 6 شهور، ودا عشان نرفع مستوى هرمون الذكورة و نقلل مستوى هرمون الانوثة ، لان ده طبعا هيفرق جدا في نسب نجاح العملية.
2. الحالات اللي عندهم ارتفاع في هرمون البرولاكتين
ودا لان لو مستوى هرمون البرولاكتين كان عالي، فده بيأثر على إنتاج الحيوانات المنوية وبيسبب نقص في هرمون الذكورة، وبيزيد من احتمالية تأخر الإنجاب ، لأن ارتفاع هرمون البرولاكتين بيعمل :
- نقص في هرمون FSH وLH ، و ده بيوقف من انتاج الخصية للحيوانات المنوية.
- نقص في مستوى هرمون الذكورة.
علشان كدة قبل عملية التفتيش الميكروسكوبي لازم ناخد فترة علاج هرموني من 3 الي 6 شهور ، علشان نقلل من مستوى هرمون البرولاكتين في الجسم ، وده طبعا هيفرق في نتيجة ونسب نجاح العملية ، وفي بعض الحالات ممكن يظهر حيوانات منوية في السائل المنوي بعد فترة العلاج وما نحتجش نعملهم عملية التفتيش الميكروسكوبي .
3. الحالات اللي عملت عملية تفتيش ميكروسكوبي قبل كده وفشلت
الحالات دي لما تيجي تعمل عملية التفتيش الميكروسكوبي مرة تانية ، لازم تاخد فترة علاج هرموني قبل العملية والحالات دي ممكن تستفيد جدا من العلاج الهرموني قبل عملية التفتيش الميكروسكوبي لان العلاج الهرمونى هيزود من فرص نجاح العملية .
وهي دي حالات انعدام الحيوانات المنوية اللي لازم تاخد فترة علاج هرموني قبل التحضير لعملية التفتيش الميكروسكوبي علشان نحقق أعلى نسبة نجاح بعد العملية.
ولو عايز تعرف اكتر عن حالات انعدام الحيوانات المنوية اللي لازم تاخد فترة علاج هرموني قبل عملية التفتيش الميكروسكوبي ، اسمع الفيديو ده مع الدكتور اسامة البكل………
وهنا لازم نقول معلومة مهمة جدا وفي نفس الوقت بتجاوب على سؤال انا متأكد انه بيدور في ذهنك دلوقتي،
وهو ليه في بعض الدكاترة بيدوا فترة علاج هرموني قبل عملية التفتيش الميكروسكوبي في بعض الحالات غير الحالات اللي احنا ذكرناها؟
لان في بعض الأحيان، الدكاترة ممكن ينصحوا بالعلاج الهرموني، حتى لو الحالة مش ضمن الحالات اللي ذكرناها، وده بيكون لأسباب معينة، منها :
ان بعض المرضي بيعتقدوا أن لاقدر الله لو العملية فشلت و ملقيناش حيوانات منوية في الخصية ، ان النتيجة كانت هتبقى مختلفة لو كانوا اخدوا فترة علاج هرموني قبل العملية.
الا ان كل الابحاث العلمية اثبتت ان ما دون حالات الانعدام اللي احنا ذكرناها دلوقتي، اي حالات تانية، العلاج الهرموني قبل عملية التفتيش الميكروسكوبي مش هيفرق في نتيجة العملية سواء بشكل ايجابي او سلبي ، لكن بعض الدكاترة بيدوا فترة علاج هرموني قبل عملية التفتيش الميكروسكوبي كنوع من اطمئنان المريض عشان ما يحسش بأي تقصير من الدكتور، وأنه لو كان اخد علاج هرموني كان هيفرق في نجاح العملية.
في النهاية، لازم تكون عارف ان انعدام الحيوانات المنوية مش نهاية حلمك في إنك تبقي اب، لسه في امل، بس لازم تكون عارف حالتك كويس علشان متمشيش رحلة علاج غلط ومتجبش نتيجة وتحس بعدها بالفشل وضياع حلمك فى انك تكون اب ،
عشان كدة لازم تتشخص صح و ماتستعجلش فى انك تعمل العملية ولو في علاج هرموني ناخده علشان منضيعش نتيجة اللي احنا عملناه، ولو عاوز تبدأ رحلة علاجك صح، تقدر تتواصل معانا على رقم 01018874287 واحنا هنحجزلك ميعاد مع الدكتور اسامة محمد البكل مدرس واستشاري طب وجراحة أمراض الذكورة وتأخر الانجاب والصحة الجنسية بطب القصر العيني.