مشاكل الهرمونات و تأخر الإنجاب عند الرجال

مشاكل الهرمونات :

هى عبارة عن خلل بيحصل فى الهرمونات المسؤولة عن الخصوبة و ده بيأثر على الخصية و انتاجها للحيوانات المنوية من ناحية العدد أو التشوهات أو هيسبب ضعف فى الحركة ، ده غير تأثيرها على القدرة الجنسية فهنلاقيها كمان بتأثر على الانتصاب و الرغبة الجنسية بسبب تأثير الخلل الهرموني على هرمون الذكورة .

و تعالوا دلوقتى نعرف ايه هى الهرمونات اللى بتسبب نقص أو انعدام في الحيوانات المنوية ، سواء الهرمونات اللى بتتحكم فى انتاج الحيوانات المنوية او الهرمونات اللى بتأثر على عدد الحيوانات المنوية ، و ازاى كمان بتأثر على القدرة الجنسية.

هرمونات الغده النخامية :

دى غده موجوده فى الدماغ و بتكون مسؤوله عن افراز 3 هرمونات و هما :

هرمون LH .
و هرمون FSH .
و هرمون البرولاكتين .

و خلينا نتكلم الاول عن هرمون FSH – LH :

لان دول من اهم الهرمونات اللى بسببهم بيحصل البلوغ ، و هما كمان السبب فى انتاج الخصية للحيوانات المنوية ، و هنعرف كل ده بالتفصيل دلوقتى .

الغده النخامية وقت البلوغ بتفرز هرمون FSH – LH و بعدين الهرمونات دى تبدء تمشى فى الدم و تروح للخصية ،

هرمون LH بيروح لخلايا ليدنج فتبدء الخلية تطلع هرمون الذكوره و من هنا تبدء تظهر علامات البلوغ ،
اما هرمون FSH بيروح لخلايا سرتولى و بعدين يتنقل للخلايا المنوية فتبدأ الخصية تنتج الحيوانات المنوية ، و من هنا بيكون عندنا قدرة على الانجاب .

ولو حصل مشكلة للغده النخامية و ماشتغلتش ، فده معناه ان مش هيكون فى انتاج لهرمون FSH – LH و هنلاقى نسبته قليله جدا ، و هنا هنلاقى :

ان الخصية مش شغاله و مش بتنتج حيوانات منوية هيسبب انعدام فى عدد الحيوانات المنوية.
هيكون كمان فى نقص فى انتاج هرمون الذكوره ، و ده هيسبب فشل فى البلوغ ، ده غير انه هيسبب ضعف فى الانتصاب و فى الرغبة الجنسية .

و العلاج هنا عشان يجيب نتيجة لازم نبدأ فيه بدرى فى سن صغير ، و العلاج ده للاسف هيكون علاج هرمونى هنفضل ماشين عليه على طول عشان نعوض نقص هرمون FSH – LH و تفضل الخصية شغاله بشكل طبيعى .

و هنا لازم نفرق بين حاجتين ، و هما نقص و زيادة نسبة هرمون FSH – LH

فلو لقينا نقص فى نسبة هرمون FSH – LH ، ده هيبقى خلل هرمونى و لسه متكلمين عنه بالتفصيل .
لكن لو كان فى زياده فى نسبة هرمون FSH – LH ، فده معناه ان المشكله هنا مش خلل هرمونى ، المشكله هنا هتكون فى الخصية نفسها سواء كان فيها فشل وظيفى و مش قادره تنتج حيوانات منوية ، او ان هى بتنتج حيوانات منوية بس بنسبة اقل من الطبيعى ، او ان الخصية فى اجزاء منها مفيهاش بؤر او خلايا منوية و هنا بردو هيكون انتاجها قليل ، و عشان الغده النخامية تحفز الخصية انها تشتغل اكتر و تنتج حيوانات منويه اكتر فهى بتفرز هرمون FSH – LH بكميات اكبر من الطبيعى عشان تنشط الخصية و هنا مينفعش ناخد علاج ننزل بيه هرمون FSH – LH لان كده هنكون بنموت الحيوانات المنوية و بنوقف خالص انتاج الخصية للحيوانات المنوية .

هرمون البرولاكتين :

و ده عكس هرمون FSH – LH ، بمعنى ان كل ما كانت نسبته قليله كل ما كان وضع الخصية و باقى الهرمونات طبيعى ، لان هرمون البرولاكتين لو لقينا ارتفاع شديد جدا فى نسبته ده هيسبب :

اما نقص فى هرمون FSH – LH ، و بكده هيقف او يقل انتاج الخصية للحيوانات المنوية ، لاننا قولنا ان هرمون FSH – LH هما المسؤولين عن نشاط الخصية و انتاجها للحيوانات المنوية .
او انه هيأثر على الخصية بشكل مباشر و يوقف او يقلل انتاجها للحيوانات المنوية و ده هيقلل فرص ان يحصل حمل طبيعى .
ده غير انه هيسبب نقص فى نسبة هرمون الذكوره و ده هيسبب ضعف فى الرغبه الجنسية و كمان ضعف فى الانتصاب ، و الضعف ده هيقلل العلاقة الجنسية ، و لان مفيش علاقة جنسية فده برضو هيسبب تأخر انجاب .
و كمان هيزود من نمو انسجة الصدر و ده هيسبب تثدى .

و بالنسبة للعلاج هنا لازم نبدأ بعلاج السبب الاول اللى خلى عندنا زياده فى هرمون البرولاكتين ، فمثلا لو كان السبب فى اننا بناخد ادويه معينه هى اللى اتسببت فى زيادة نسبة الهرمون وقتها ممكن اننا نغير الادوية دى لو امكن ، او لو مقدرناش اننا نغيرها وقتها هناخد علاج نقلل بيه نسبة هرمون البرولاكتين ، و فترة العلاج بتكون من 3 – 6 شهور على حسب نسبة الهرمون و بعد العلاج عدد الحيوانات المنويه هيرجع طبيعى و العلاقة الجنسية مش هيكون فيها مشكله و كده هيكون عندنا فرصه كبيره ان يحصل حمل طبيعى .

و هنا لازم نتابع نسبة هرمون البرولاكتين خصوصاّ لو كنا لسه مستمرين على الادوية اللى اتسببت فى زيادته ، عشان نسبته متزدش مره تانية .

طيب ليه ممكن يحصل خلل فى هرمونات الغده النخامية :

لو فيه فى الغده النخامية عيب خلقى اتسبب فى انها مأنتجتش اصلا هرمون FSH – LH و البرولاكتين
لو عندنا ورم حميد فى الغده النخامية ، و ده هيزود الخلايا اللى بتنتج هرمون البرولاكتين و بكده نسبته هتزيد ، و هيقل بسبب زيادته هرمون FSH – LH
لو عندنا خلل فى الغده الدرقية .
لو فى التهاب فى المخ .
لو بنحقن نفسنا بهرمون الذكوره عشان نزود العضلات ، ده هيحول هرمون الذكوره لهرمون انوثه و ده هياثر على نسبة هرمون FSH – LH .
لو عندنا امراض فى الكبد او الكلى .
لو عندنا اى اضطرابات نفسية و بناخد بسببها مهدئات ، لان المهدئات هتزود من انتاج هرمون الدوبامين وده هيسبب زياده فى هرمون البرولاكتين و نفص فى هرمون FSH – LH ، و هنا بمجرد ما نوقف المهدئات هترجع الهرمونات تانى لوضعها الطبيعى .

هرمون E2 او الهرمون الانثوى فى الخصية :

تانى هرمون بيسبب نقص او انعدام فى الحيوانات المنوية هو هرمون E2 او الهرمون الانثوى فى الخصية

هو عباره هرمون بيتفرز فى الجسم بسبب انزيم اسمة اروماتيز ، و الانزيم ده بيكون موجود فى الخصيتين او فى البروستاتا او فى الخلايا الدهنية فى الجسم كلة .
و نسبة هرمون E2 لو زادت الطبيعي هيبدء يكون ليه اضرار .

طيب ايه اللى ممكن يخلى هرمون E2 نسبته تزيد و اي هى اضراره

هرمون E2 بيزيد بسبب :

او خلل فى الهرمونات .
و السبب الاخير ان هرمون E2 نسبتة تزيد هو التقدم فى السن

اما فرط فى نشاط انزيم الاروماتيز .
او سمنة مفرطة .

اما اضرار هرمون E2

و نقص فى هرمون FSH – LH ، وده هيسبب نقص فى عدد الحيوانات المنوية و ممكن يوصل لأنعدام ، و هيسبب كمان ضعف فى حركة الحيوان المنوى .

زياده هرمون E2 ، هتسبب نقص فى هرمون الذكوره
هييسبب كمان تثدى
و ضعف فى الرغبة الجنسية .

والعلاج هنا هيكون على حسب السبب ، فالو كان السبب فى زيادة هرمون E2 هو السمنة وقتها لازم اننا نخس الاول .

و هنا فى نقطة مهمه لازم نعرفها ان السمنة المفرطة خطر جدا على الخصوبة لانها ممكن تسبب مشاكل اكبر بكتير غير زياده هرمون E2 ، و بسبب المشاكل دى هيحصل نقص او انعدام للحيوانات المنوية و بكده هيكون فى تأخر فى الانجاب ، عشان كده لازم نهتم ديما بوزننا و نبعد على قد ما نقدر عن الوجبات السريعه و الاكل اللى مليان دهون .

اما لو كان السبب هو فرط فى نشاط انزيم الاروماتيز لازم وقتها ناخدعلاج نقلل بيه نشاط انزيم الاروماتيز و خلال 3 شهور من العلاج هيرجع هرمون E2 و هرمون الذكوره لنسبتهم الطبيعية ، و هترجع كمان الخصية لنشاطها الطبيعى و الرغبة الجنسية كمان مش هيكون فيها مشكله .

الغده الدرقية

لو فى خلل فى افرازات الغده الدرقية

الغده الدرقية دى غده موجوده فى الرقبة قدام الحنجرة ، و الغده دى بتنتج هرمون مهم جدا لكل العمليات الحيوية زى نشاط القلب و الدوره الدموية اسمه الثيروكسين ، و هنا خلل الغده الدرقية هيسبب نقص فى هرمون الثيروكسين ، و بسبب النقص ده هيحصل :

نقص او انعدام فى الحيوانات المنوية ،
ضعف او انعدام فى حركة الحيوان المنوى .
زيادة نسبة التشوهات فى الحيوانات المنويه .
و نقص فى هرمون الذكوره .
و ضعف فى الانتصاب .
ده غير ان اضراره ممكن توصل لامراض فى القلب و سكتات دماغيه .

طيب اى اسباب خلل الغده الدرقيه ؟

او اوورم فى الخصية .
و كمان التقدم فى العمر بيسبب نقص فى هرمون الثيروكسين .

ممكن يكون عامل وراثى
او فى ورم فى الغده الدرقية .

و العلاج هنا اننا اولا نعالج السبب ، و بعدين ممكن ناخد علاج هرمونى عشان نعوض بيه نقص هرمون الثيروكسين .

هرمون الذكورة فى الخصية

هرمونى الذكورة ممكن يسبب نقص او انعدام للحيوانات المنوية

الهرمون الذكرى هو الهرمون المسؤول عن حاجات كتير زى :

وصولنا لمرحلة البلوغ و زيادة حجم القضيب و الخصيتين .
و بيأثر كمان على القدره الجنسية ، لانه بيكون مسؤول عن تحفز انسجة القضيب ،و ده اللى بيعمل انتصاب وقت العلاقه الزوجيه .
كمان بيكون مسؤل عن الرغبه الجنسيه ، و الوصول للنشوه ، و قوة القذف .
و كمان بيكون ليه تأثير على انتاج الخصية للحيوانات المنوية ، و بكده هأثر نقص هرمون الذكوره على عدد الحيوانات المنوية .
نقص هرمون الذكوره بيسبب كمان ضعف فى حركة الحيوان المنوى و تشوهات .
و اخيراّ نقص هرمون الذكورة هيسبب كمان انكماش فى العضو الذكرى و ده هيخلينا نحس ان العضو الذكرى صغر ، بس هو مصغرش هو بس حصله انكماش و بمجرد ما بنعالج نسبة هرمون الذكوره و نرجعها لمستواها الطبيعى الانكماش بيروح و بيرجع العضو لحجمه الطبيعى .

اما اسباب نقص هرمون الذكورة :

لو كان عندنا دوالى على الخصية من الدرجة التانية او التالته .
لو اتعرضنا لعلاج كيميائى او اشعاعى على الحوض ، بسبب الاصابه بسرطان الخصيه او البروستاتا .
ولوعندنا مشاكل فى الغده النخامية .
لو عندنا سمنه مفرطة .
لو عندنا أمراض فى الكلى او الكبد
لو عندنا ارتفاع فى ضغط الدم .
لو فى زياده فى هرمون E2 .
الاصابة بفيروس نقص المناعة .
واخيرا طبيعى جدا ان يحصل نقص فى الهرمون الذكرى كل ما بنكبر فى العمر .

اما بالنسبة للعلاج ، اوعى تفكر انك تحقن نفسك بهرمون الذكورة ، لان انت كده بتزود المشكله ، و بتقرر توقف انتاج هرمون الذكوره و انتاج الحيوانات المنوية كمان ، العلاج هنا بكون علاج للمشكله اللى اتسببت فى نقص و هرمون الذكوره ن و بعد ما نعالج السبب هيرجع تانى هرمون الذكوره لنسبته الطبيعية .

و لو لسه عاوز تعرف اكتر عن الاسباب اللى ممكن يحصل بسببها انعدام أو نقص للحيوانات المنوية اضغط هنا

مدرس واستشاري طب وجراحة أمراض الذكوره وتأخر الإنجاب والصحة الجنسية بطب القصر العيني .

# استبشر_خيرا

طاقم عمل مؤهل

#ماتفقدش_الامل

عنايه كاملة

احجز معنا

متاح دائما

مشاكل الهرمونات و تأخر الإنجاب عند الرجال