ازاي بيتم تشخيص دوالي الخصية عند الرجل؟
تعتبر دوالي الخصية من الأمراض الشائعة اللي بتصيب نسبة كبيرة من الشباب والرجال حوالي 15-20% ، ويبدأ ظهورها في مرحلة البلوغ ، وتزداد مع الوقت ، وعلى الرغم ان في حالات كتير مش بتظهر عليهم اعراض ، الا ان بيتم اكتشافها من خلال التشخيص الظاهري والفحص الإكلينيكي.
وقبل ما نتكلم عن ازاى بيتم تشخيص دوالي الخصية ، تعالوا الاول نوضح
دوالي الخصية عبارة عن اي ؟ ، و ازاي تعرف انك مصاب بدوالي الخصية ؟
في البداية لازم تبقي عارف ان كيس الصفن اللي بيحمل الخصيتين ، بيكون جوا شرايين وأوردة ، شرايين ( بتوصل الدم اللي فيه الاكسجين للخصية ) ، وأورده ( اللي بتخرج الدم غير المؤكسد ) ، ودوالي الخصية بتحدث نتيجة ضعف في صمامات الأوردة اللي بتكون مسؤولة عن تنظيم تدفق الدم من الخصيتين الى القلب ومنع عودته تاني للخصية ، فلو الصمامات دي فيها خلل او عيب ، ده هيتسبب في أن الدم هيرجع تاني للخصية ويفضل يتراكم جوا الأوردة و يتمدد ويتضخم ويسبب الدوالي.
ولازم تكون عارف ان دوالي الخصية بتاثر بشكل سلبي على الخصية وعلى انتاجها للحيوانات المنوية وجودتها ، وكل ده بيسبب العقم وتاخر الانجاب ، حيث اوضحت الدراسات ان حوالي 40% من الرجال المصابين بالعقم وتأخر الإنجاب بيعانوا من دوالي الخصية ، وبرغم كل ده ، الا ان في حالات كثير مصابين بدوالي الخصية ولكن مش ماثرة عليهم بشكل سلبي.
ودلوقتي تعالوا نعرف مع بعض
ازاي تعرف أنك مصاب بدوالي الخصية:
1/ هتحس بتورم في كيس الصفن.
2/ هتلاحظ تغير في حجم الخصيتين : بمعنى أن الخصية المصابة هتكون أصغر من الخصية السليمة.
3/ هتحس بألم في الخصية : والالم ده هيزيد لما تقف لفترات طويلة ، وهيقل الألم لما تنام على ظهرك.
4/ هتحس بثقل وتضخم في كيس الصفن : وده بيحصل نتيجة تجمع الدم بكميات كبيرة في أوردة الخصية.
5/ العقم وتاخر الانجاب : بمعني انك لو بتعانى من تاخر الانجاب ، والزوجة سليمة ومعندهاش اي موانع صحية ، فبنسبة كبيرة اكيد دوالي الخصية هي السبب.
ودلوقتي تعالوا نجاوب على سؤالنا
ازاي بيتم تشخيص دوالي الخصية عند الرجل :
في البداية لازم تكون عارف ان اول واهم خطوة في اكتشاف أي مرض هي التشخيص الصح ، وفي حالة دوالي الخصية ، لازم التشخيص يكون عند دكتور متخصص ، لانه بيفحص المريض كويس ، وبيقيم الاعراض اللي بيحس بيها ، وده بيكون من خلال 3 خطوات :
1/ الفحص السريري :
وفي الخطوة دي لازم المريض يكون واقف ، لانه بيكون صعب علي الدكتور انه يكتشف وجود دوالي الخصية والمريض نايم ، وبعد كدة بيبدا يطلب من المريض انه يتنفس بعمق ويحبس النفس فترة قصيرة ، ويضغط بجسمه لتحت ، علشان يعرف يفحص كيس الصفن ويشوف لو في أي كتل أو أوردة منتفخة.
2/ الفحص باستخدام اشعة الدوبلر الملون :
جهاز الدوبلر هو عبارة عن جهاز آمن وغير مؤلم ، ولازم اللي يعمله يكون دكتور متخصص في الأشعة ، لانه بيوضح حجم الخصيتين بالظبط ، وبيحدد كمان حجم الأوردة كام بالظبط بالملى ، لان حجم الأوردة في الطبيعي مش بيزيد عن 2 ملم ، فلما تزيد حجم الأوردة عن 3 ملم ، فكدة بيؤكد وجود دوالي في الخصية.
ولو عايز تعرف معلومات اكثر عن اهمية اشعة الدوبلر في تشخيص دوالي الخصية ، اسمع الفيديو ده مع الدكتور اسامة البكل…
3/ تحليل السائل المنوي :
الدكتور بيطلب تحليل سائل منوي ، علشان يوضح جودة الحيوانات المنوية وهل في حيوانات منوية في العينة ولا لا ، ولو مظهرش حيوانات منوية في السائل المنوي ، فده دليل على انعدام الحيوانات المنوية ، اللي من اسباب انعدامها وجود مشاكل في الخصية زي الدوالي.
وخلاص بعد ما اتشخصت واتاكدت ان عندك دوالي في الخصية ، لازم تبقي متاكد ان علاج دوالي الخصية مش علاج دوائي ، علاج دوالي الخصية هو علاج جراحي ، بالجراحة الميكروسكوبية :
لان الجراحة الميكروسكوبية افضل طريقة تعالج بيها دوالي الخصية :
1/ لاننا بنستخدم الميكروسكوب الجراحي اللي بيكبر لحد 25 ضعف ، فبيخلينا نميز بين الأوردة والشرايين ، ونتجنب قطع الشريان الخصوي اللي بيغذي الخصية بالدم ، وبكدة مش هيحصل ضمور للخصية.
2/ وبنقدر كمان اننا نبعد عن الشعيرات الليمفاوية ، لأننا لو مش شايفنها كويس وقت العملية ده ممكن يخلينا نربطها بالغلط مع الأوردة ، وده هيسبب قيلة مائية على الخصية.
3/ وبنقدر كمان بسبب تكبير الميكروسكوب اننا نوصل للدوالي الثانوية والدقيقة و نربطها عشان ميحصلش ارتجاع للدوالي مره تانيه.
4/ ده غير أن جرح العملية في الجراحة الميكروسكوبية بيكون صغير اووي حوالي 1سم.
5/ وبعد العملية بنقدر نروح من المستشفى في نفس اليوم ، وننزل شغلنا عادي جدا بعد 5 أيام ، أما بالنسبة للعلاقة الزوجية ، فبنقدر نمارسها بعد العملية بأسبوع واحد بس.
ولو عايز تعرف ازاي تهتم بجرح العملية واي الادوية اللي تاخدها عشان تتعافى بشكل أسرع ، اسمع الفيديو ده مع الدكتور اسامة البكل…
في النهاية ، اوعي تهمل أي أعراض بتحس بيها في الخصية ، واولا واخيرا لازم تروح عند دكتور متخصص ، علشان التشخيص في الحالة دي مهم جدا ، لانه بيحطك قدام طريقين ، اما هتتشخص صح وتمشي رحلة علاج صح ، او هتتشخص غلط ، وتكون ضيعت على نفسك وقت ومجهود علي الفاضي وترجع تاني لنقطة الصفر.
ولو اخدت خطوة الكشف ، تقدر تتواصل معانا على الرقم ده 01018874287 واحنا هنحددلك ميعاد مع الدكتور اسامة محمد البكل مدرس واستشاري طب وجراحة أمراض الذكورة وتأخر الانجاب والصحة الجنسية بطب القصر العيني.