ما هي طرق علاج صفر حيوان منوي؟

ما هي طرق علاج صفر حيوان منوي؟

يعاني نسبة كبيرة من الرجال من مشكلة العقم وتاخر الانجاب ، بمعنى وجود ( صفر حيوان منوي ) في العينة ، يعني مفيش حيوان منوي واحد سليم يقدر يوصل للبويضة ويخصبها ويحصل حمل ، ولكن ده مش معناه ان مفيش امل في الانجاب ، لازم تكون عارف ان في حالات كثير قابلة للعلاج ، حتى لو كانت بتعاني من ( صفر حيوان منوي ).

بس قبل ما نتكلم عن طرق علاج ( صفر حيوان منوي ) ، تعالوا الاول نوضح 

ايه هي أسباب انعدام الحيوانات المنوية : 

في البداية لازم تكون عارف ان في سببين لانعدام الحيوانات المنوية ، وبنقسمهم الى : 

1/ أسباب غير انسدادية 

2/ واسباب غير انسدادية 

• الأسباب الغير انسدادية : بمعنى وجود فشل وظيفي في الخصية ، وعدم قدرتها علي إنتاج الحيوانات المنوية ، وده بيكون نتيجة لأسباب كثير زي : 

1/ خلل في الهرمونات : بمعنى وجود مشكلة في الغدة النخامية خلتها متفرزش هرمون FSH و LH ، اللي مسئولين عن تحفيز الخصية انها تنتج الحيوانات المنوية وهرمون الذكورة ، بالتالي لو في اي خلل في إفراز الهرمونات دي ، هيؤدي الى انعدام الحيوانات المنوية.

2/ وجود خلل جيني زي متلازمة كلاينفلتر :  ودي حالة مرضية بيصاب يها الذكور نتيجة وجود خلل في جينات الشخص ، بمعنى ان جينات الشخص الطبيعي بتتكون من 46 كروموسوم، اتنين منهم الكروموسومات الجنسية ( XX للإناث وXY للذكور) ، أما لو الشخص كان مصاب بمتلازمة كلاينفلتر فده بيكون عنده كروموسوم X زيادة ، يعنى عدد الكروموسومات عنده 47 كروموسوم ، وده بيحصل بسبب خلل في مرحلة انقسام الخلايا أثناء توزيع الكروموسومات للجنين من الأب والأم ، والمتلازمة دي بتأثر على انتاج الخصية للحيوانات المنوية.

ولو عايز تعرف معلومات اكثر عن متلازمة كلاينفلتر وازاي بنشخصها وهل ليها علاج ولا لا ، اسمع الفيديو ده مع الدكتور اسامة البكل…..

3/ الخصية المعلقة :  وده عيب خلقي بيصيب الأطفال الذكور وممكن نكتشفه بعد الولادة مباشرة ، واللى بيتسبب فى أن خصية واحدة أو الاتنين مش بينزلوا إلى كيس الصفن، وبتفضل متعلقة داخل البطن ، ولازم تتعالج خلال السنة الأولى من عمر الطفل ، لأن الخصية لو فضلت متعلقة جوا البطن ده هيسبب مشاكل كتير للطفل ، لأن الخصية المعلقة جوا البطن بتتعرض لدرجة حرارة عالية وده بيسبب ضمور للخصية وعدم إنتاجها للحيوانات المنوية.

4/ التعرض للعلاج الكيماوي والإشعاعي : بمعني ان علاج الامراض السرطانية بياثر على الخصية ، وعلى البؤر المنوية في الخصية ، وممكن يتسبب في موت الخلايا وانعدام الحيوانات المنوية ، علشان كده مهم اللي هيتعرض للعلاج الكيماوي ، انه يجمد عينة من الحيوانات المنوية عشان يستخدمها بعد التعافي في عمليات الحقن المجهري.

5/ دوالي الخصية : وهي عبارة عن تضخم في الاوردة المحيطة بالخصية الموجودة داخل كيس الصفن ، وده بياثر علي الدورة الدموية في الخصية ، وبيؤدي الى رجوع الدم تاني للخصية وده بيخلى الدم يتراكم في الأوردة و يرفع من درجة حرارة الخصية  ويضعف وظيفتها في إنتاج الحيوانات المنوية.

• الأسباب الانسدادية : بمعني ان في عائق أو حاجز بيمنع خروج الحيوانات المنوية من الخصية واختلاطها بالسائل المنوي وخروجها من القضيب وقت القذف، والانسداد ده ممكن يكون في:

1/ القنوات المنوية

2/ البربخ

3/ الوعاء الناقل

4/ قناة القذف

ودلوقتي تعالوا نعرف مع بعض :

ازاي نعالج حالات ( صفر حيوان منوي ) ؟ 

لازم تكون عارف ان لو كان سبب انعدام الحيوانات المنوية سبب غير انسدادي زي وجود : 

1/ خلل في الهرمونات : العلاج هنا هيكون هرموني ، بمعنى اننا نستخدم ادوية علشان نعوض بيها نقص هرمون FSH و LH ، أو أدوية نقلل بيها مستوى هرمون الانوثة او هرمون البرولاكتين ، علشان نساعد الخصية تنتج حيوانات منوية.

2/ ولو كان السبب دوالي الخصية : العلاج هيكون جراحي عن طريق ربط دوالي الخصية بالجراحة الميكروسكوبية ، عشان نحسن من وظيفة الخصية في انتاج الحيوانات المنوية.

لكن لو كان سبب انعدام الحيوانات المنوية انسدادي ، كوجود حاجز بيمنع خروج الحيوانات المنوية ، العلاج هنا الاول هنعمل اشعة علشان نحدد فين مكان الانسداد بالظبط : 

1/ ولو كان الانسداد في القنوات المنوية : وقتها هنضطر نسحب عينة من الخصية بالابرة ونستخرج منها الحيوانات المنوية ونعمل بيها حقن مجهري.

2/ ولو كان الانسداد في الوعاء الناقل : هنستخدم الميكروسكوب الجراحي علشان نصلح الانسداد ، ونعمل توصيلة نوصل الحبل المنوي بالبربخ علشان الحيوانات المنوية تعرف تخرج وقت القذف.

3/ لكن لو كان الانسداد في قناة القذف : وقتها هنستخدم المنظار علشان نسلك بيه الانسداد ، وبعدها تبدأ الحيوانات المنوية تظهر في السائل المنوي ويحصل حمل طبيعي.

وفي النهاية ، لازم تكون عارف ان حتي لو كان التحليل بتاعك نتيجته ( صفر حيوان منوي ) اوعي تيأس وتفقد الأمل ، علشان كل مشكلة وليها حل ، بس الاهم انك تتشخص صح علشان تلاقي طريق للعلاج ويكون عندك بدل الطفل اثنين وثلاثة.

ولو عايز تبدا معانا رحلة علاجك ، تقدر تتواصل معانا على الرقم ده 01018874287 واحنا هنحجزلك ميعاد مع الدكتور اسامة محمد البكل مدرس واستشاري طب وجراحة أمراض الذكورة وتاخر الانجاب والصحة الجنسية بطب القصر العيني.