عملت تحليل سائل منوي والنتيجة سليمة .. كدة المشكلة في الزوجة ؟
ارتبطت في اذهانا معلومات ومعتقدات كتير غلط عن تاخر الانجاب ، وهي أن الزوجة هي السبب الرئيسي والأول في تاخر الانجاب ، وان الزوج طالما سليم و تحاليله سليمة أو خلف مرة قبل كدة ، يبقي كده خلاص معندوش مشاكل ، ولكن كل دي افكار اجتماعية غلط.
ودلوقتي تعالوا نعرف مع بعض ايه هى المعلومات الغلط اللي عند معظم الرجالة بخصوص تأخر الإنجاب.
1/ مش معني ان تحليل السائل المنوي طبيعي وكل ارقامه ونتائجه طبيعية ، يبقى معندكش مشكلة وإن الزوجة هي السبب في تاخر الانجاب :
لان في بعض المشاكل مش بتظهر في تحليل السائل المنوي ولكن بتظهر بالفحص الظاهري أو بتظهر في بعض التحاليل التانية زي :
تكسير المادة الوراثية : والمادة الوراثية دي هي اللي بتكون موجودة في راس الحيوان المنوي وهي اللي بتحمل المعلومات الوراثية الخاصة بالاب لتتحد مع المعلومات الوراثية الخاصة بالأم لتكوين الجنين ، ولو في اي خلل في المادة الوراثية هيؤدي إلى تشوه الحيوان المنوي وإضعاف قدرته على الوصول للبويضة وتخصيبها وحدوث حمل او تكون سبب حدوث إجهاض.
فمهم جدا نعمل تحليل تكسير المادة الوراثية لانه بيكشف عن أي خلل في الحيوان المنوي والي مش بيكشف عنها تحليل السائل المنوي العادي، لذلك مش علشان تحليل السائل المنوي سليم يبقي انت سليم، لان ممكن تحليل السائل المنوي طبيعي وعدد الحيوانات المنوية طبيعية والحركة طبيعية والتشوهات كمان طبيعية ولكن في تاخر في الانجاب، فتكون عارف ان الزوجة مش هي السبب وان المشكلة لسه موجودة عندك بس مش ظاهرة ، ولازم نعمل تحاليل وفحوصات تانية علشان نتاكد.
ولو عايز تعرف اي اسباب تفتت المادة الوراثية عند الزوج واي علاقته بتاخر الانجاب والاجهاض المبكر عند الزوجة ، اسمع الفيديو ده مع الدكتور اسامة البكل…
2/ مش معني انك خلفت قبل كده وعندك اطفال يبقي انت دلوقتي ماعندكش مشكلة :
لان في بعض المشاكل بتظهر مع تقدم السن ، وفي بعض الحالات ممكن يحصل حمل حتي لو في انخفاض في العدد أو ضعف في الحركة بس بدرجة بسيطة، والزوجة مكنش عندها اي مشكلة في الاول زي :
دوالي الخصية : ممكن كان عندك دوالي في الخصية، ولكن كانت بدرجة بسيطة ومش مأثرة علي الانجاب، بس مع الوقت درجة الدوالي زادت وخاصة لو كانت درجة ثانية أو ثالثة، فهي هتاثر علي انتاج الخصية للحيوانات المنوية وهتسبب تاخر في الانجاب، بالتالي مش معني انك خلفت قبل كده مرة واتنين، يبقي انت دلوقتي سليم و معندكش مشاكل، لازم تكون عارف ان في مشاكل وأمراض بتظهر مع الوقت وتقدم السن ممكن تسبب تاخر في الانجاب زي :
الالتهابات المزمنة أو التعرض للعلاج الإشعاعي أو الكيماوي : دي كلها مشاكل ممكن تكون مكنتش موجودة في اول حمل بس ظهرت أو زادت مع الوقت.
ولو عايز تعرف ازاي ممكن يحصل عندك تاخر في الانجاب وانت خلفت مرة قبل كدة ، اسمع الفيديو ده مع الدكتور اسامة البكل…
وبعد ما عرفت المعتقدات الغلط اللي موجودة عند معظم الرجالة بخصوص تاخر الانجاب ، تعالو نعرف ايه هي المشاكل والأسباب اللي بتسبب تأخر الإنجاب عند الرجال.
1/ دوالي الخصية : لان دوالي الخصية من الأسباب والمشاكل الرئيسية لتأخر الانجاب، لانها عبارة عن وجود تلف في صمامات الاوردة الموجودة في الخصية واللي مسؤولة عن تنظيم تدفق الدم من الخصية الى القلب ومنع عودته تاني للخصية بعد تدفقه، فلما بيحصل خلل في الصمامات، الدم بيبدا يتراكم جوا الاوردة، والأوردة تفضل تتضخم وتتمدد و تسبب الدوالي، والدوالي بتاثر على انتاج الخصية للحيوانات المنوية وكمان بتاثر على الهرمونات المسؤولة عن إنتاج الحيوانات المنوية وبتضر بالحيوانات المنوية السليمة ، وكل ده بيسبب تأخر الإنجاب.
2/ العدوى : حيث أن العدوى والالتهابات الموجودة في الجهاز التناسلي، كالتهاب الخصية أو التهاب البربخ أو الأمراض المنقولة جنسيا، بتؤثر على الأعضاء التناسلية وجودة وصحة الحيوانات المنوية، وبالتالي هتسبب تأخر الإنجاب.
3/ اضطرابات القذف : ومنها القذف المرتجع، بمعنى أن السائل المنوي اللي بيحمل الحيوانات المنوية، اثناء القذف بيدخل إلى المثانة بدل ما يخرج من مجرى البول، وبكدة هيؤدي إلى مشاكل في السائل المنوي ونقص في عدد الحيوانات المنوية وكل ده هيسبب تأخر الإنجاب.
4/ الاضطرابات الهرمونية : حيث تؤدي لغبطة الهرمونات زي وجود خلل في هرمون الذكورة أو خلل في هرمون الانوثة او هرمون البرولاكتين إلى قصور وخلل في وظيفة الغدد التناسلية، وبالتالي هتاثر علي انتاج الخصية للحيوانات المنوية وتاخر الانجاب.
5/ الخصية المعلقة : ودي حالة بيتولد بيها الأطفال الذكور ، وهي أن الخصية منزلتش إلى مكانها الطبيعي في كيس الصفن وفضلت معلقة داخل البطن، وفي الحالة دي لازم نعالجها في خلال السنة الأولى من عمر الطفل، لأنها هتسبب له مشاكل في البلوغ ومشاكل كثيرة جدا في الإنجاب، لعدم انتاج الخصية للحيوانات المنوية.
6/ العمليات الجراحية : الخضوع لبعض العمليات الجراحية زي الخضوع لعملية قطع القناة المنوية أو عمليات البروستاتا ، كل ده بياثر على سلامة وصحة الحيوانات المنوية ، وبالتالي هتسبب تأخر الإنجاب.
7/ التدخين : لأن النيكوتين بيعمل ضيق في الأوعية الدموية الموصلة للعضو الذكري وبكدة هيقلل من تدفق الدم الى القضيب، وبالتالي مش هيبقي في انتصاب ولا علاقة زوجية، والأهم ان كمان هياثر علي انتاج الخصية للحيوانات المنوية، وهيحصل تأخر في الإنجاب.
8/ الانسدادات : حيث ان وجود انسداد في مسار خروج الحيوانات المنوية من الخصية، هيؤدي إلى نقص عدد الحيوانات المنويه او انعدامها، بالتالي هيؤدي إلى تأخر الإنجاب.
9/ مشاكل العلاقة الزوجية : حيث أن المشاكل النفسية والخلافات الزوجية مش بتخلينا نستمتع بالعلاقة الزوجية ولا بيكون عندنا رغبة جنسية، وزي ما قولنا قبل كدة ان علشان يحصل انتصاب لازم يكون في رغبة جنسية، والضغط النفسي مش بيخلي عندنا رغبة او اثارة جنسية لحدوث الانتصاب ، بالتالي مش هيكون في علاقة زوجية وكل ده هيؤدي الي تاخر الانجاب.
ولو عايز تعرف ازاي المشاكل والخلافات الزوجية ممكن تسبب ضعف انتصاب ، اسمع الفيديو ده مع الدكتور اسامة البكل…
في النهاية ، بعد ما عرفت المشاكل اللي ممكن تسبب لك تاخر في الانجاب وعرفت المعلومات الغلط اللي عندك بخصوص تاخر الانجاب، اوعي تمشي ورا كلام سمعته عن مشكلة حد، لان مشكلتك غير مشكلة شخص تاني ، وانك لو كنت بتعاني من اي مشكلة لازم تكشف فورا وتطمن علي نفسك قبل المشكلة الصغيرة ما تكبر وميبقاش ليها علاج.
ودلوقتي لو قررت انك تاخد خطوة الكشف، تقدر تتواصل مع الفريق الطبي علي رقم 01018874287 وهما هيحددولك اقرب ميعاد مع الدكتور اسامة محمد البكل مدرس واستشاري طب وجراحة أمراض الذكورة وتاخر الإنجاب والصحة الجنسية بطب القصر العيني.