التسريب الوريدي

التسريب الوريدي واحد من اسباب ضعف الانتصاب ، عارف كويس جدا انك بمجرد ما قريت كلمة ضعف انتصاب ، ابتديت تقلق 

طب انت عارف ان القلق ده سبب من اسباب ضعف الانتصاب اصلا ، واللى ممكن يدخلك في دوامة تحاليل و علاج و ممكن يوصل لعملية ، فخلينا كده نهدى خالص و نبطل قلق و نعرف ان كل حاجه ليها علاج ، و دلوقتى تعالوا بقى نفهم اكتر عن التسريب الوريدى و ايه هى اسبابه و ليه بيحصل ، و علاجه كمان

بس قبل كل ده خلينا اصلا نفهم ازاى بيحصل انتصاب للعضو الذكرى :

انتصاب القضيب او العضو الذكرى ، بيحصل لما بنحس بأثاره جنسيه ،و بسبب الاثاره الجنسيه بتبدء الشرايين و الأوردة الموجوده فى النسيج الكهفي اللى بيتكون منه القضيب تتمدد و تتملى بالدم ، فتضغط على الأنسجة اللى بتكون مغطية القضيب ، و لما بيحصل الضغط ده الصمامات الموجودة في الأوردة بتتقفل و بتفضل محافظه على الدم جواها ، و عشان كده بيحصل الانتصاب ، و بعد نهاية العلاقه الزوجيه (القذف) بتبتدى الصمامات دى تتفتح تانى و تخرج الدم بره القضيب ، و بعد كده بيحصل ارتخاء في العضو الذكرى ، دى الطريقة اللى بيتم بيها الانتصاب فى الطبيعى .

طيب فى حالة التسرب الوريدى بقى ايه اللى بيحصل :

الدم بيدخل جوه الأنسجة اللى اتكلمنا عنها ، لكن بسبب مشكلة في الأوردة الدم ده بيرجع تانى بسرعه ، عشان كده العضو مبيفضلش منتصب و هو ده اللى بيسبب ضعف الانتصاب أو الضعف الجنسى .

طيب ايه هى اسباب التسرب الوريدى : 

فى البدايه خلينا نقسم الاسباب دى لسببين : 

• اسباب عضويه .
• اسباب نفسيه . 

هنبدء دلوقتى بالاسباب العضويه  : 

و تعالوا نقسمها لحاجتين عشان نفهم كويس 

• تسريب وريدى اولى :
  و ده بيكون عيب خلقى فى الاورده بنكون مولودين بيه ، و بسبب العيب ده صمامات الاورده مش بتقفل كويس
  فمش بتحافظ على الدم جوه القضيب و فى الحاله دى ، مش بيحصل اى انتصاب للعضو من وقت سن البلوغ .

• تسريب وريدى ثانوى : 

و النوع ده من التسرب الوريدي بيكون ليه اكتر من سبب :

1. الاصابه بالامراض اللى بتسبب ضعف فى ضخ الدم زى (السكر – الضغط – امراض القلب او ارتفاع نسبة الدهون فى الدم .
2. التدخين بشراها .
3. مشاكل فى الغدة الدرقية .
4. نقص فى هرمون التستوستيرون اللى بيسبب ضعف فى الانتصاب بسبب ضعف ضخ الدم للقضيب .
5. السمنة المفرطة ، و زيادة و تراكم الكوليسترول فى الأوردة .
6.     الاصابة بتليف انسجة القضيب ، و ده بيخلى الاورده ميحصلهاش ضغط كامل ، فمش بتقفل كويس على الدم .
7.  الإصابة بمرض بيروني  .

نيجى بقى دلوقتى للاسباب النفسية :

• الضغط النفسى والعصبى ،الخوف و القلق و خصوصا فى بداية الحياه الزوجيه ، ده بيسبب افراز الادرينالين بكمية كبيرة ، فتسبب انقباض للشرايين ، فتخلى الدم ميوصلش كويس للقضيب . 

طيب بعد ما عرفنا ايه هو التسرب الوريدى و ايه هى اسبابه ، تعالوا دلوقتي نتكلم عن

ازاى اعرف ان عندى تسريب وريدى  :

1. لو مقدرناش نحافظ على الانتصاب و حصل ارتخاء و ضعف فجاه فى القضيب اثناء ممارسة العلاقة الزوجية ، قبل ما يحصل القذف .
2. ميحصلش انتصاب ، بالرغم من الاثاره الجنسيه . 
3. لو لاقينا صعوبة في ادخال العضو الذكري وقت العلاقة الزوجية .
4. لو الانتصاب متحسنش ، حتى بعد ما استخدمنا ادويه . 

كده احنا اتكلمنا عن اسباب و اعراض التسريب الوريدى ، طيب بيتعالج ازاى .

علاج التسريب الوريدي بيكون عن طريق  :

• اما علاج دوائى .
• او حقن موضعى للعضو .
• او تركيب دعامة للقضيب  .

بس عشان نقدر نحدد العلاج هيكون بأى طريقة ، لازم الاول نحدد ايه هو سبب التسريب الوريدي ، من كل الاسباب اللى اتكلمنا عنها فوق ، لأن كل سبب ليه خطة علاج مختلفة  ، يعنى مثلا لو الشخص اللى عنده تسريب وريدي مريض قلب و بياخد موسعات للشراين زى ادويه النيتريت ممنوع يتعالج بالاقراص ، بنبدأ معاه بالحقن الموضعى ، و لو بناخد ادوية سيولة يبقى الحل الافضل هو تركيب الدعامة لان الحقن الموضعي ممكن يسبب نزيف او تجمع دموي ، أما لو كان التسرب الوريدى ، سببه عامل نفسى يبقى هنا لازم نلجأ للعلاج السلوكى ، و بعض الادوية و نحاول على قد ما نقدر  نبعد عن المشاكل اللى بتسبب قلق أو توتر 

فى النهايه لازم نعرف ان مفيش قاعدة ثابتة لعلاج اى مرض ، خطة العلاج بتتحد على أساس حاجات كتير اوى 

و لو عاوزين تعرفو معلومات اكتر عن تركيب دعامة القضيب هنضغط هنا 

و لو لسه عاوز تعرف اكتر عن التسريب الوريدي ممكن تتواصل مع فريقنا الطبى على رقم 01018874287 ، و هما هيجوبوا على كل استفساراتك ، او تطلب منهم تحديد معاد مع دكتور اسامه محمد البكل مدرس واستشاري طب وجراحة أمراض الذكوره وتأخر الإنجاب والصحة الجنسية بطب القصر العيني .