عينة الخصية العادية

عينة الخصية العادية :

طيب امتى اقول ان العملية هى الحل لانعدام الحيوانات المنوية فى السائل المنوى :

• لو عملنا تحليل للسائل المنوى اكتر من مره و كانت النتيجة انعدام تام فى الحيوانات المنوية فى السائل المنوى .
• لو كان عندنا انسداد فى مخرج السائل المنوى ، و هنا مهم اننا نعرف هل الانسداد ده نقدر نصلحه بعملية بسيطة ، ولا الانسداد ملهوش علاج زى ان الوعاء الناقل مش متخلق اصلا ، فوقتها لازم ناخد عينة من الخصية و ندور فيها على حيوانات منوية نقدر نعمل بيها حقن مجهرى.
• لو عملنا تحليل هرمونى ولقينا عندنا خلل فى الهرمونات ، زى نقص فى هرمونات الغده النخامية (FSH - LH) و هنا الخلل ده هيكون مأثر على انتاج الخصية للحيوانات المنوية ،و ده معناه اننا لازم فى الاول ناخد علاج هرمونى نعوض بيه نفص هرمون (FSH - LH) ، لمده متقلش عن 3 شهور عشان الخصية ترجع تنشط و تنتج حيوانات والعلاج هنا :

• اما انه هيجيب نتيجة و هنلاقى ان بدء يطلع حيوانات منوية فى السائل المنوى .
• او ان هنكون لسه محتاجين نعمل العملية بس وقتها العلاج اللى هنكون اخدناه هيكون زود من فرص اننا نلاقي حيوانات منوية في عينة الخصية .

• لو عملنا اشعه على الخصية و كان عندنا :

• دوالى على الخصية من الدرجة التانية او التالتة ، و قتها لازم الاول نعمل عملية بسيطة نربط فيها الدوالى ، لان الدوالى بتأثر على انتاج الخصية للحيوانات المنوية ، و بعد عمليه الدوالى ممكن اننا ناخد علاج هرمونى ينشط الخصية و يخليها تنتج حيوانات منوية اكتر ، و هنا اما الحيوانات المنوية هتطلع فى السائل المنوى و الحمل هيحصل بشكل طبيعى ، او اننا هنكون لسه محتاجين نعمل عينه الخصية ، ووقتها هنكون بردو استفدنا من العلاج لانه هيكون زود من فرص اننا نلاقي حيوانات منوية نعمل بيها الحقن المجهرى و نجمد الباقى
• او كان فى مشكله فى الخصية نفسها وده بيخليها متقدرش اصلا تنتج حيوانات منوية او بتنتجها بس بكميات قليله ، وقتها هناخد علاج هرمونى نحاول اننا ننشط بيه الخصية على قد ما نقدر و نخليها تنتج حيوانات منوية اكتر ، و هنا فى نسبة مش قليلة من المرضى بتبدأ الخصية تستجيب للعلاج بشكل كبير و تطلع حيوانات منوية فى السائل المنوى وقت القذف ، ولو ده محصلش وقتها لازم نفتح الخصية وناخد منها عينة ندور فيها على الحيوانات المنويه .

طيب اى الاحتمالات اللى بتكون عندنا لو قررنا نفتح الخصية ؟

• اما اننا بنلاقى حيوان منوى سليم بس مش بيقدر انه يخرج بره الخصية ، وقتها بناخد النسيج و بنخرج منه الحيوانات المنوية على طول و بنعمل الحقن المجهرى .
• او اننا بنلاقى حيوانات منوية بس مش مكتملة النمو ، و ده بسبب مشكله فى الخصية خلت الحيوان المنوى نموه ميكملش و يقف عند مرحلة معينه ، و فى الحالة دى احنا مش بناخد اى نسيج من الخصية لاننا مش هنستفاد بيه ، لان الحيوان المنوى فى الوضع ده مش هيخصب البويضة ، فاللى بنعمله هنا اننا هناخد علاج لمدة 3 او 6 شهور و هنا نسبة كبيرة من الحالات بتستجيب على العلاج و لما بنفتح مره تانية بنقدر اننا نلاقى حيوان منوى مكتمل .
• اخر و اصعب حاجة ممكن نلاقيها ، ان الخلايا الام اللى بتصنع الحيوانات المنوية متكونش موجوده اصلاّ ، بس هنا بردو لسه قدمنا امل فى اننا ممكن نلاقى مكان تانى فى الخصية فيه بؤر منوية ، بس قبل ما نفتح مكان تانى لازم الاول ناخد كورس علاجى لمده 6 شهور و بعدها نعيد العمليه ، و يفضل هنا ان الاعادة تكون بالتفتيش الميكروسكوبى لان ده بيخلينا نوصل لكل الخصية و نحاول نشوف النسيج اللى فيه بؤر منوية و نطلع منه الحيوان المنوى .

طيب تعالوا بقى دلوقتى نعرف بعد العملية المفروض اى اللى يحصل :

• لو لقينا حيوانات منوية ، وقتها هيكون عندنا حلين .

• اما اننا بنعمل الحقن المجهرى فى نفس يوم العملية ، وده عشان نقدر نعمله بنحتاج اننا نكون محضرين الزوجة ، و تكون واخده العلاجات الهرمونية اللى بنشط بيها التبويض و الحالة دى انا عارف ان مرضى كتير مش بتفضلها خصوصاّ لو احنا مش متاكدين اننا هنلاقى حيوانات منوية ، وده ممكن يحصل زى ما قولنا فى حالة ان المشكلة كانت فى الخصية نفسها و انتاجها للحيوانات المنوية ، ، بس احيانا بنضطر اننا نعمل الحقن المجهرى بمجرد ما يطلع حيوان المنوى من الخصيه ، وده سببه ان الحيوانات المنوية اللى بنلاقيها بتكون ضعيفة جدا ، و دى عمرها ما هتستحمل التجميد .
• لكن لو لقينا الحيوانات المنوية اللى خرجناها جودتها كويسه وقتها نقدر نعمل التجميد و نعمل الحقن المجهرى فى اى وقت ، وده بيدينا كمان فرصه اننا نجمد حيوانات منوية اكتر عشان وقت ما نكون عاوزين طفل تانى نقدر اننا نستخدم الحيوانات اللى جمدناها و نعمل على طول الحقن المجهرى ،و منحتجش نفتح الخصية تانى .

• لو ملاقيناش حيوانات منوية و ده وارد انه يحصل خصوصاّ لو السبب فى انعدام الحيوانات المنوية كان بسبب خلل هرمونى او مشكلة فى الخصية نفسها و محصلش استجابة للعلاج ، وقتها احنا بنفتح الخصية و احنا مش متأكدين اذا كان فيها حيوانات منوية ولا لا، و كمان مش بنكون عرفين فين بالظبط مكان البؤر و الانسجة اللى هيكون فيها حيوانات منوية ، بس لازم هنا تعرف ان لسه بردو قدامنا فرصة ناخد علاج تانى لمدة 6 شهور و نعيد العملية مره كمان .

و دلوقتى خلينى اقولك على كام نقطة مهم جدا تعرفهم

• لو عندنا انسداد او عيب خلقى فى القنوات المنوية مش هينفع يتعالج ، يبقى وقتها لازم اعمل سحب للعينة على طول .
• لو سن الزوجة اكبر من 35 سنه فده معناه ان فرص الزوجة فى الانجاب بتقل ، و مش هينفع نضيع وقت فى العلاج ، وقتها لازم نلحق نعمل عملية عينة الخصية و نعمل الحقن المجهرى فورا
• لو في فشل وظيفي بالخصية (صغر لحجم الخصيتين – ارتفاع هرمون FSH) ، هنا بردو بنعمل العينة على طول و نحاول نلاقى نسيج فيه حيوانات منوية .

فى النهاية لازم تعرف ان انعدام الحيوانات المنوية مش نهاية حلمك فى انك تبقى أب ، لسه فى امل ، بس لازم تكون عارف وضعك كويس عشان متمشيش رحلة علاج غلط متجبش نتيجة ، و تحس بسببها ان خلاص مفيش فايده ، لازم الاول نشخص سبب انعدام الحيوانات المنوية فى السائل المنوى صح ، و منستعجلش العملية ، ولو محتاجين علاج ناخده ، و نعمل العملية فى وقتها المناسب ، و بعد ما نطلع الحيوانات المنوية لازم نتعامل معاها صح و نعرف امتى ممكن نعمل تجميد و امتى مينفعش لازم نعمل حقن مجهرى على طول ، عشان منضيعش نتيجة العملية و كل التعب اللى انت استحملته فلو عاوز تبدأ رحلة علاجك صح تقدر تتواصل معانا ،01018874287 و تحدد معادك مع د/اسامة محمد البكل مدرس واستشاري طب وجراحة أمراض الذكورة و تأخر الإنجاب و الصحه الجنسية بطب القصر العينى ، و نبدء مع بعض رحلة العلاج الصح اللى هتنتهى بأنك تبقى اب .