البلوغ المبكر عند الشباب

البلوغ المبكر

البلوغ المبكر مش معناه ان الطفل كده صحته الجنسية والانجابية كويسه، البلوغ المبكر مرض ولازم نهتم اننا نعالج اطفالنا لو ده حصلهم، لان البلوغ المبكر ليه اضرار صحية ونفسية كتيرعلى الطفل.

وقبل ما نعرف يعنى ايه بلوغ مبكر، تعالوا الاول نعرف يعنى اى بلوغ

البلوغ هو التغيرات الفسيولوجية اللي بتحصل للأطفال عشان تنقلهم من مرحلة الطفولة لمرحلة البلوغ، واللي فيها بيكون عندنا القدرة اننا نمارس العلاقة الجنسية، وبيكون كمان عندنا قدرة على الانجاب.

وبالنسبة البلوغ المبكر فهو المقصود بيه الوصول لمرحلة البلوغ قبل الوقت الطبيعي اللي هو من سن 9 – 14 سنه، والبلوغ هنا ممكن يحصل للطفل وهو عمرة 9 سنين.

أعرف أزاي ان أبني عنده بلوغ مبكر ؟

اعراض البلوغ المبكر نفسها مش بتكون مختلفة عن الاعراض اللي بتظهر في الوقت الطبيعي بس الفرق هنا في الوقت اللي بتظهر فيه اعراض البلوغ انه بيكون في سن 9 سنوات، وممكن البلوغ ده يحصل بشكل تدريجي او بشكل مفاجئ في حالات معينه هنعرفها كمان شويه .

تعالوا بقي دلوقتى نعرف اى هي علامات البلوغ ؟

هنلاقى حجم الخصية والقضيب أكبر من الحجم الطبيعي لأي طفل، ودي من اهم علامات البلوغ.
وكمان هنلاقى زيادة في العضلات.
في زيادة في كثافة العظم.
وزيادة في الطول والوزن اكتر من الطبيعي، ووقتها هيكون شكل الطفل مختلف عن باقي الاطفال اللي في سنه.
وهنلاقى الصوت بقي خشن اكتر.
هيبدأ يظهر شعر في الوجه والعانة والابط.
هنحس ان عرق الطفل بقي له ريحة زي الشخص البالغ.
ممكن يحصل للطفل انتصاب وقذف.

ودلوقتي بعد ما عرفنا يعنى اي بلوغ واي هي علاماته، تعالوا بقي نعرف دلوقتى

اسباب البلوغ المبكر :

لو الطفل كان عنده ورم في المخ او في العمود الفقري او في الخصية.
لو حصل للطفل اصابة في الدماغ.
لو كان في زيادة في نسبة السوائل في المخ.
لو زاد هرمون الذكورة عن نسبته الطبيعية.
لو حصل خلل في الغده الدرقية.
لو كان في ورم او خلل في الغده الكظرية، وهي دي الحالة اللي هيحصل فيها نمو وبلوغ للطفل بشكل مفاجئ.
لو استخدامنا للطفل ادوية او كريمات فيها هرمونات.
وممكن كمان البلوغ المبكر يكون وراثة.
او يحصل بسبب خلل جيني.
و كمان الاطفال اللي بياخدوا ادوية عصبيه، ممكن الأدوية دي تسرع من البلوغ .

طيب أزاي بنعالج البلوغ المبكر ؟

بالنسبة للعلاج فهو بيكون على حسب السبب اللي خلى يكون عند الطفل بلوغ مبكر، بمعنى اننا الاول بنبدأ نعالج المرض اللي سبب البلوغ المبكر وبعدها ممكن ناخد علاج هرموني نبطئ بيه البلوغ، والدوا ده بيكون امن جدا على الاطفال يعنى ومش هيسبب للطفل تأخر مرضى للبلوغ ولا هيأثر على الخصوبة ولا القدرة الجنسية للطفل لما يكبر زي ما ناس كتير ممكن تكون فأكره.

وخلينى دلوقتي اجاوبك على سؤال اكيد انت بتفكر فيه، وهو اي اللي هيحصل يعنى لو معالجناش البلوغ المبكر؟

ممكن تكون فاكر ان البلوغ المبكر ده حاجة كويسه وان ابنك خلاص كبر وبقي راجل ، لكن خلينى اقولك ان ده مش صح البلوغ المبكر مرض ولو ما عالجنهوش هيسبب للطفل اضرار زي:

قصر في الطول لما يكبر، واكيد بتقول أزاي ده هيحصل لما هو من دلوقتى اطول من زمايلة، وهنا هقولك ان بعد البلوغ الجسم بيقف عن النمو من ناحية الطول وحجم الاعضاء التناسلية، فانت هتلاقى ان ابنك اه وهو عنده 9 سنين أكبر واطول من باقي الاطفال اللي في سنه، لكن لما يكبر شويه في السن ويكون مثلا عنده 15 سنه، وقتها هيكون طوله أقصر من الاطفال اللي في سنه، لان زي ما قولنا ان النمو بيقف بعد البلوغ.
تانى مشكلة ان احنا قولنا ان البلوغ المبكر ده بيكون بسبب مرض، زي خلل الهرمونات، اللي لو أهملناها ومعرفناش ان فيه مشكلة بسبب اننا متابعناش الطفل لما حصلة بلوغ مبكر، وقتها الهرمونات دي ممكن تأثر على الجسم كله، وتسبب للطفل مشاكل اكتر.
واخيراّ البلوغ المبكر هيسبب للطفل مشاكل نفسية، لأنه هيحس ديماّ ان هو فيه مشكله وانه مختلف عن باقي الاطفال اللي في سنه، غير ان بسبب سنه الصغير مش هيكون قادر انه يفهم التغيرات اللي حصلت في جسمه او فاهم سببها ايه، و ده هيسبب قلق وتوتر للطفل، لأنه فجأة اتحول من طفل، لشاب في تكوين الجسم بس، لكن عقلة لسه عقل طفل.

و في النهاية خلينا نتأكد ان مهم جدا كل أب وأم يكونوا بيتابعوا نمو أولادهم كويس سواء من ناحية نمو الجسم أو نمو الأعضاء التناسلية عشان لو حصل اى حاجة مش طبيعية في فترة بلوغ الطفل لازم نكشف عليه ، و نعالجه في اقرب وقت عشان نبعد عن اى مضاعفات او مشاكل ممكن تحصل للطفل ، و دلوقتى لو اخدتوا قرار انكم عاوز تطمنوا على ابنكم تقدروا تتواصلوا مع فريقنا الطبي ،01018874287 و هما هيحددولكم اقرب معاد مع د/أسامة محمد البكل مدرس واستشاري طب وجراحة أمراض الذكورة و تأخر الإنجاب و الصحة الجنسية بطب القصر العيني ، عشان نطمن على اولادنا

مدرس واستشاري طب وجراحة أمراض الذكوره وتأخر الإنجاب والصحة الجنسية بطب القصر العيني .

# استبشر_خيرا

طاقم عمل مؤهل

#ماتفقدش_الامل

عنايه كاملة

احجز معنا

متاح دائما