هل التهابات البروستاتا بتسبب تأخر في الإنجاب ؟
تأخر الإنجاب عند الزوج بيحصل بسبب وجود مشاكل في خصائص السائل المنوي ، والمشاكل دي بتكون زي
– نقص في عدد الحيوانات المنوية ،
– أو ضعف في حركة الحيوان المنوي ،
– أو وجود تشوهات في الشكل الطبيعى للحيوان المنوي ،
– أو تكسير في المادة الوراثية الموجودة في رأس الحيوان المنوي (DNA fragmentation) ،
وفي بعض الحالات ، السائل المنوي بيخرج وقت العلاقة الزوجية من غير ما يكون فيه أي حيوانات منوية ، او بيخرج بس بكمية قليلة جدا ،. وفي أسباب كتيرة بتسبب مشاكل في السائل المنوي ومن اهم الاسباب دي مشاكل البروستاتا
بس قبل ما نتكلم عن مشاكل البروستاتا وعلاقتها بتأخر الإنجاب ، خلينا الأول نوضح نبذة بسيطة عن وظيفة البروستاتا ودورها في اخراج السائل المنوي المسئول عن تغذية الحيوانات المنوية وتسهيل خروجها لحد ما توصل للبويضة ويحصل حمل .
في البداية لازم تكون عارف أن البروستاتا هي غدة صغيرة موجودة في الحوض أسفل المثانة ، و وظيفتها أنها بتفرز جزء من السائل المنوي ، و الجزء التانى من السائل المنوي بتفرزه الحويصلات المنوية ,
والسائل المنوي من السوائل المهمة ، لأنه بيحتوي على مواد مغذية وانزيمات وظيفتها تغذية الحيوانات المنوية وحمايتها وتنشيطها عشان تبدأ في السباحة والخروج من مجرى البول إلى مهبل الزوجة لتخصيب البويضة و حدوث الحمل .
وبعد ما عرفنا وظيفة البروستاتا ، تعالوا نعرف مع بعض ايه هي المشاكل اللي ممكن تحصل للبروستاتا تخليها متخرجش السائل المنوي وتؤدي إلى العقم وتأخر الإنجاب
- لو حصل التهاب في البروستاتا ، والالتهاب ده بيكون موجود بنسبة كبيرة عند الذكور من سن 30-50 سنة ، وده طبعاً بيأثر على عدد وجودة الحيوانات المنوية ، حتى لو كان تحليل السائل المنوي ظاهر طبيعي ومفيش فيه اي مشكلة ، بمعني أن لو عدد الحيوانات المنوية طبيعي والحركة ونسبة التشوهات طبيعية بس في التهاب في البروستاتا وفي نسبة عالية من الصديد في القذف ، فبالتالي جودة الحيوانات المنوية اللي هتبقي خارجة أثناء القذف هتكون أقل من الطبيعي وقدرتها على حدوث حمل هتكون قليلة ، حتي لو الشخص ده عمل عملية حقن مجهري وهو عنده التهاب في البروستاتا ، ففرصة نجاح الحقن المجهري هتكون ضعيفة .
ولو عايز تعرف اكثر عن علاقة مشاكل البروستاتا بتاخر الانجاب وفشل عملية الحقن المجهري ، اسمع الفيديو ده مع الدكتور اسامة البكل………
ودلوقتي تعالوا نعرف مع بعض الأعراض والأسباب اللي أدت إلي إلتهاب البروستاتا ، و خلونا نبدأ بالاعرض :
- ألم أو حرقان أثناء التبول .
- صعوبة في التبول (مثل تقطيع البول أو تقطيره).
- ظهور دم في البول .
- الشعور بألم في البطن أو في المنطقة الاربية أو أسفل الظهر .
- الشعور بألم أو انزعاج في القضيب أو الخصيتين .
- الشعور بألم أثناء القذف .
وبعد ما عرفنا الأعراض اللي بتظهر علي الشخص اللي بيعاني من التهابات البروستاتا، تعالوا نعرف الأسباب اللي أدت إلي وجود إلتهاب البروستاتا
لازم تكون عارف إن مفيش سبب واحد لحدوث التهاب غدة البروستاتا ، ولكن من أشهر الأسباب دي
- التهابات بكتيرية ، ودي بتكون ناتجة عن وجود عدوى في المسالك البولية .
- القذف المرتجع بعد عمليات البروستاتا ، سواء المريض عمل العملية عن طريق الفتح الجراحي أو عن طريق المنظار اللي بيتم إدخاله من مجرى البول ، لأن العملية هنا بتأثر على المحبس الموجود على عنق المثانة ، ودا بيخلى السائل المنوي يرجع تانى للمثانة بدل ما يخرج من مجرى البول وقت القذف .
ودلوقتي تعالوا نعرف ايه هو علاج التهاب البروستاتا عشان نحل مشكلة تأخر الإنجاب :
1/ لو كان سبب التهاب البروستاتا وجود التهابات بكتيريا : في الحالة دي هنطلب من المريض يعمل مزرعة بول علشان نحدد نوع البكتيريا والمضاد الحيوي المناسب لحالة المريض.
2/ لكن لو كان سبب الالتهاب وجود قذف مرتجع ، العلاج هيكون :
- إننا نضيق عنق المثانة عشان نمنع إن السائل المنوي يرجع ليها ويخرج بشكل طبيعي وقت القذف.
- أو نجمع السائل المنوي من المثانة.
- أو أننا ناخد عينة من الخصية ونطلع حيوانات منوية ونعمل بيها حقن مجهري.
ولو عايز تعرف طرق استخراج الحيوانات المنوية من الخصية اضغط هنا…
في النهاية ، لازم تكون عارف أن مشاكل البروستاتا بتؤثر بشكل كبير على قدرة الرجل الجنسية والانجابية ، ويجب عليك الاهتمام بصحة البروستاتا من خلال الفحوصات الدورية اللازمة اللي بتساعد على الحد من خطر الإصابة بأمراض البروستاتا وزيادة فرص الكشف المبكر عنها.
ولو عايز تعرف ازاي مشاكل وأمراض البروستاتا بتاثر على قدرة الرجل الجنسية ، اسمع الفيديو ده مع الدكتور اسامة البكل.
ولو احتجت انك تتابع معانا حالتك تقدر تتواصل معانا واحنا هنحددلك ميعاد مع الدكتور أسامة محمد البكل مدرس واستشاري طب وجراحة أمراض الذكورة وتأخر الإنجاب والصحة الجنسية بطب القصر العيني ، تقدر تتواصل معانا علي الرقم ده 01018874287.