المسح الميكروسكوبي للخصية
أحدث تقنيات البحث عن الحيوانات المنوية
و هنعرف حالا ليه التفتيش الميكروسكوبى يعتبر من ادق التقنيات
و ده لان كل خصية بتتكون من 250 جزء و كل جزء بيكون فيه من انبوبه الى 4 انابيب منوية و ده بيخلى المساحة و عدد الانابيب اللى بندور فيها على حيوانات منوية كبير جدا، فالطريقة الوحيده اللى نقدر نوصل بيها لكل الانابيب دى فى عملية واحده هى التفتيش الميكروسكوبى. ده غير اننا كمان بنقدر بسبب التكبير ده اننا نبعد خالص عن الشرايين اللى بتغذى الخصية بالدم و بكده مش هيكون فى نزيف و لا ضرر فى الخصية بعد العملية. ده غير كمان ان التفتيش الميكروسكوبى بيخلينا نكبر الجزء اللى بنشتغل فيه من 15 – 40 ضعف عن الطبيعى، و بكده هنقدر اننا نميز كويس جدا الانسجة و الانابيب المنتفخة اللي احتمال وجود حيوانات منوية فيها بيكون اكبر و نبعد عن الانابيب المنكمشة اللي احتمال وجود حيوانات منوية فيها بيكون اقل بكتير وده هيفدنا فى حاجتين:
احتمالية عالية لوجود حيوانات منوية
ان النسيج اللى احنا هنطلعة احتمالية وجود حيوانات منوية فيه كبير، وده اللى بيضمن نجاح العملية.
المحافظة على أنسجة الخصية
بيخلينا مناخدش انسجة كتير من الخصية، لان زى ماقولنا بنبقى قادرين نحدد مكان النسيج اللى فيه انابيب منتفخة واحتمال كبير يكون فيها حيوانات منوية، و كمان بيخلينا نقدر نسحب عدد انابيب قليل و مش بنحتاج اننا نقص النسيج كله، وبكده نكون اخدنا العينه اللى محتاجنها و كمان حافظنا على انسجة الخصية، لان الخصية مش بيكون عندها القدره انها تجدد او تنتج الانسجه دى مره تانية.
عملية التفتيش الميكروسكوبى: ازاى بتم ؟
التخدير
العملية هنا نقدر نعملها ببنج نصفى او كلى.
الفتح الجراحي
و بنعمل فتحة صغيرة جداّ فى نص كيس الصفن، و بنخليه فى النص عشان بعد الجرح ما يلتئم ميبانش ليه اى اثر، و بعد ما بنعمل الفتحة بنبد نخرج الخصية بره كيس الصفن.
كشف الخصية
بعد ما بنخرج الخصية بنبدء نعمل فيها فتحة طولية عشان نقدر نشوف كل انسجة الخصية.
استخدام الميكروسكوب
و بنبدء بعد كده اننا نثبت الميكروسكوب على فتحة اللى عملناها فى الخصية، ونبدء ندور على الانسجة اللى فيها انابيب منوية منتفخة. و بعدين بنبدء اننا نخرج الانابيب المنتفخة من غير ما نقص النسيج كلة زى ما قولنا من شويه.
المعمل
و بعدين نبعت الانابيب دى للممعمل يستخرج منها الحيوانات المنوية، و بعد كده بيبدء يجهز الحيوانات المنوية اللى هنلقيها للحقن المجهرى او للتجميد.
الإغلاق تجميلياً
و بعد كده بنقفل الجرح اللى عملاناه فى الخصية و بنرجعها مكانها فى كيس الصفن و نقفل كيس الصفن بعد كده بغرز تجميلية.
اي هى الحالات اللى التفتيش الميكروسكوبى هو حلها الوحيد ؟
حالات الكلاينفلتر
لان اصلا حجم الخصية بيكون صغير جدا فمش هينفع اننا كمان ناخد منة نسيج، الافضل هنا اننا نعمل تفتيش ميكروسكوبى لان زى ما قولنا احنا بنقدر اننا نسحب بس الانابيب المنتفخة بس من غير ما نقص النسيج.
الحالات التي فشلت عينات سابقة
كل الحالات اللى عملت قبل كده عينة خصية بالابره او بالجراحة و مقدرناش اننا نلاقى فى العينة حيوانات منوية، يفضل اننا نعملها فى المرة التانية بالتفتيش الميكروسكوبى و نفحص الخصية كويس عشان نضمن اكتر نجاح العملية.
عدم وجود بؤر منوية في أجزاء من الخصية
و فى حالة ان فى اجزاء من الخصية مفيهوش بؤر منويه، وقتها عشان نقدر ندور فى كل الخصية لازم نعمل التفتيش الميكروسكوبى، لان ده اخر امل لمريض معندهوش الخلايا الام اللى بتصنع الحيوانات المنوية، عشان كده لازم نتأكد و ندور كويس فى كل نسيج فى الخصية.
ازاى اضمن نجاح العملية ؟
لازم فى الاول نعمل تحليل للسائل المنوى و يفضل انه يتعمل اكتر مره، و يكون فى وقت بين التحليلين على الاقل اسبوعين، عشان نتأكد ان فى انعدام فعلا للحيوانات المنوية فى السائل المنوى.
لازم نعمل تحليل جينى خصوصاّ لو عملنا قبل كده تفتيش ميكروسكوبى و فشل، لان بعض المشاكل الجينية مش بيكون ليها علاج للأسف وفرص اننا نلاقي حيوانات منوية في التفتيش بتبقى صفر.
و لازم اننا نكون مطمنين ان الخصية وضعها كويس من ناحية الهرمونات.
الهرمونات:
بمعنى اننا لازم نعمل تحليل للهرمونات، و لو لقينا اى نقص فى الهرمونات المسؤولة عن انتاج الحيوانات المنوية زى هرمون (FSH – LH) او هرمون الذكوره، فكده لازم قبل ما نعمل التفتيش الميكروسكوبى نعوض الاول نقص الهرمونات دى بعلاج هرمونى لمده متقلش عن 3 شهور و هو ده الوقت اللى بتحتاجة الخصية عشان تنتج حيوانات منوية، و بعدين نعيد تحليل الهرمونات مره تانية عشان نطمن على نسبة الهرمونات بعد العلاج، و كمان هنعيد تحليل السائل المنوى مره تانية لان فى حالات بتستجيب للعلاج و بتبدء تطلع حيوانات منوية مع السائل المنوى وقت القذف...
علاج دوالي الخصية:
لو كان عندنا دوالى على الخصية من الدرجة التانية او التالته، فالدوالى اصلا بتقلل من انتاج الخصية للحيوانات المنويه، و عشان كده لو عالجناها بعمليه بسيطة، ده هيرجع الخصية تنتج تانى حيوانات منوية و بكده ممكن يطلعلنا حيوانات منوية فى السائل المنوى و منحتاجش نعمل العملية...
بعد العلاج الكيميائي أو الإشعاعي:
لو كنا بناخد اى علاج اشعاعى او كيميائى لازم نستنى فتره قبل ما نعمل التفتيش الميكروسكوبى متقلش عن 5 سنين من وقت اخر جلسة، لان العلاج الكيميائى او الاشعاعى بيأثر على الخصية و على الحيوانات المنوية ويفضل يبقى في فترة علاج تنشيطي هرموني للخصية قبل التفتيش لمدة لا تقل عن 6 شهور...
متطلبات فنية هامة لنجاح التفتيش الميكروسكوبي
لازم اللى يعمل العملية يكون عنده خبره كبيره جدا فى الجراحات الميكروسكوبيه، عشان يقدر يميز الانابيب المنتفخة اللي احتمال اكبر نلاقي فيها حيوانات منوية عن غيرها.
عملية التفتيش الميكروسكوبى مينفعش يقل وقتها عن ساعة لساعتين، عشان نكون فتشنا الخصيتين كويس جدا و قدرنا نوصل لاكبر عدد من الانابيب المنوية.
الميكروسكوب نفسه اللى بنستخدمة فى الجراحة لازم تكون كفائته عالية جدا من ناحية الاضاءة و التكبير و وضوح الصوره.
لازم كمان المكان اللى هنعمل فيه العملية يكون فيه معمل اجنة و يكون مجهز وفيه دكاتره عندهم خبرة عالية.
اخيراّ الخيوط اللى هنستعملها فى قفل الجرح لازم يكون بمواصفات معينه عشان متتفاعلش مع انسجة الخصية.