اى هى طرق استخراج الحيوانات المنوية من الخصية ؟
الخصية هي المصنع المسؤول عن إنتاج الحيوانات المنوية، و استخراج الحيوانات المنوية من الخصية هو إجراء بيتم لاستخراج جزء من أنسجة الخصية لفحصها تحت الميكروسكوب عشان ناخد منها الحيوانات المنوية الصالحة للحقن المجهري ، و العملية دي بتتم بطرق مختلفة وكل طريقة بتساعد في علاج حالات انعدام الحيوانات المنوية في السائل المنوي.
و تعالوا دلوقتى نعرف اى هى
طرق استخراج الحيوانات المنوية من الخصية:
- العينة العادية لاستخراج الحيوانات المنوية من الخصية:
- دي عملية بسيطة جدًا، بنفتح فيها كيس الصفن والخصية بالجراحة التقليدية، وبنبدأ ندور على الأنسجة جوا الخصية ونأخذ منها نسيج أو أكثر.
- الأنسجة دي بتروح للمعمل للفحص تحت الميكروسكوب لاستخراج الحيوانات المنوية السليمة لاستخدامها في الحقن المجهري.
- العملية دي بنلجأ لها في حالة ان كان فى انعدام تام للحيوانات المنوية في السائل المنوي.
بس قبل ما نعمل عملية استخراج الحيوانات المنوية بالعينه العادية لازم نكون عارفين ان :
- العينة العادية ممكن تضر أنسجة الخصية لأن الجراح بيكون معتمد بس علي بصره وادواته الجراحية وده بيخليه ميشوفش الانسجة بشكل واضح وده ممكن ويضرها او ممكن الجراح يشيل جزء كبير من انسجة الخصية .
- مهم جدا نتأكد من خبرة الدكتور اللي هيعمل العملية علشان ميحصلش اي مشكلة للخصية بعد العملية.
- والمكان اللي هنعمل فيه العملية لازم يكون متخصص وفيه مركز حقن مجهري عشان ياخد العينة اول ما تطلع على طول ويفحصها أو يعمل تجميد لو لقينا حيوانات منوية جودتها كويسة.
- استخراج الحيوانات المنوية من الخصية بالإبرة:
- دي طريقة من الطرق اللي بنخرج بيها الحيوانات المنوية من الخصية ، و بنلجأ للطريقة دي لما بيكون عندنا انعدام في الحيوانات المنوية في السائل المنوي نتيجة وجود انسداد في القنوات الناقلة.
- و سحب الحيوانات المنوية من الخصية بالابرة عملية بسيطة وسهلة وبتخلص في حوالي 10 دقائق من غير أي ألم ، المريض بيكون تحت تأثير التخدير الموضعي، و احيانا بنستخدم البنج النصفي.
- و كل اللى بنعمله فى العملية اننا بنركب كانيولا في المكان اللي هنسحب منه العينة، وبعد كده بندخل في الكانيولا سرنجة جواها محلول عشان يحافظ على الحيوانات المنوية ويغذيها و بنسحب بيها الأنسجة اللي فيها الحيوانات المنوية ، عن طريق اننا بنفضل ندخل ونخرج في الكانيولا علشان نسحب الانسجة اللي جواها الحيوانات المنوية ، ونحطها في أنبوب ونبعتها معمل الاجنة عشان يستخرج منها الحيوانات المنوية السليمة تحت الميكروسكوب ولو الحيوانات المنوية جودتها كويسة بنقوم بتجميدها علشان لو المريض احتاج يعمل حقن مجهري تاني منضطرش نفتح الخصية تاني ، و السحب بالابره يعتبر طريقة بسيطة و امنه فى استخراج الحيوانات المنوية من الخصية ، و مش بيكون ليها ضرر على الخصية
- بعد العملية، بنغطي الجرح بلاصق طبي معقم ونحط كيس من الثلج على الخصية لتقليل أي تورم.
- وبيخرج المريض من المستشفى في نفس اليوم ويقدر بعد يوم واحد من العملية يمارس حياته بشكل طبيعي بس ميعملش اي نشاطات مجهدة ، ولا يمارس العلاقة الزوجية لمدة أسبوع واحد من وقت العملية.
- استخراج الحيوانات المنوية من الخصية عن طريق الجراحة الميكروسكوبية:
- تعتبر التقنية دى من أفضل التقنيات للبحث عن الحيوانات المنوية السليمة و استخراجها من الخصية في حالة انعدام الحيوانات المنوية في السائل المنوي.
- الجراحة الميكروسكوبية عملية دقيقة المريض فيها بيكون تحت تأثير التخدير النصفي او الكلي .
- و كل اللى بنعمله فى العمليه هو جرح صغير طوله حوالي 1-2سم في منتصف كيس الصفن علشان نقدر نوصل إلى الخصية ، وبعد كده بنستخدم الميكروسكوب الجراحي لانه بيكبر الرؤية 40 ضعف علشان نشوف الخصية بوضوح ، ونبحث عن الانابيب المنوية المنتفخة داخل الخصية لان في الاغلب بيكون جواها الحيوانات المنوية بكميات كبيرة ونبعد عن الانابيب الضعيفة اللي بتكون جواها حيوانات منوية بكميات قليلة.
- وبعدين نبعت العينات من الأنابيب المنتفخة للمعمل عشان يستخرج منها الحيوانات المنوية ويجهزها للحقن المجهري.
- وبعد كدة بنقفل الجرح اللي عملناه في الخصية وبنرجعها مكانها في كيس الصفن وبنقفل الجرح اللي عملناه في كيس الصفن بغرز تجميلية.
- وبيخرج المريض من المستشفى في نفس اليوم ويقدر بعد يومين من العملية يمارس حياته بشكل طبيعي بس ميعملش اي نشاطات مجهدة وعدم ممارسة العلاقة الزوجية لمدة أسبوع او اتنين من العملية.
في النهاية خليني اقولك ان لسه في امل في العلاج وانه يكون عندك طفل واثنين وثلاثة بس الاهم اننا نمشي رحلة علاج صح ، ولو قررت تبدا معانا رحلتك تقدر تتواصل معانا واحنا هنحدد لك ميعاد مع الدكتور اسامة محمد البكل مدرس واستشاري طب وجراحة امراض الذكورة وتاخر الانجاب والصحة الجنسية بطب القصر العيني.