اى هو علاج انعدام الحيوانات المنوية ، و ازاى بنشخصه ؟
انعدام الحيوانات المنوية جملة مرتبطة بقلق وخوف عند اي الرجل بمجرد ما يسمع أو يقرأ أي معلومة ليها علاقة بالمرض ده، عشان بيكون فاكر انها مشكلة ملهاش علاج وأنه طالما عنده انعدام في الحيوانات المنوية يبقى عمره ما هيبقى اب.
بس أحب اقولك ان التفكير ده غلط خالص لان كل مشكلة وليها علاج، ومشكلة انعدام الحيوانات المنوية ليها طرق علاج كتير ، بس عشان العلاج يجيب نتيجة لازم الاول نكون عرفنا اى هو سبب انعدام الحيوانات المنوية ، عشان نقدر اننا نحدد طريقة العلاج المناسبة و نكون بنتعالج صح .
في المقال ده، هنتكلم عن تشخيص وعلاج انعدام الحيوانات المنوية.
و تعالوا نعرف فى الاول اى هي الأعراض اللي ممكن تظهر عند المريض اللي عنده انعدام في الحيوانات المنوية؟
- هيحصل تأخر في الحمل .
- و ممكن نحس بألم في منطقة الحوض بعد القذف.
- او اننا نلاقى انخفاض في كمية السائل المنوي.
- او نحس بانعدام في الرغبة الجنسية.
- و ممكن كمان نلاحظ قلة نمو الشعر في الجسم، خصوصًا في منطقة الإبط والعانة.
طيب إزاي بيتم تشخيص انعدام الحيوانات المنوية؟
تشخيص انعدام الحيوانات المنوية بيتم على مرحلتين :
- المرحل الاولى و اللى بنطلب فيها من الزوج :
1- تحليل للسائل المنوي ، و التحليل ده لازم يتعمل أكثر من مرة عشان نكون متأكدين من نتيجته ، و التحليل ده بيوضحلنا حجم السائل المنوي وبيساعدنا نعرف هل فيه فعلاً انعدام كامل للحيوانات المنوية أو لا ، و هنا لو لقينا ان نتيجة التحليل بتوضح :
- ان السائل المنوي كميته طبيعية ، فده ممكن يكون معناه ان فيه فشل في إنتاج الحيوانات المنوية أو انسداد في القنوات المنوية .
- اما لو لقينا ان كمية السائل المنوي قليلة ، فهنا ممكن يكون عندنا مشاكل في البروستاتا أو مشاكل في القذف زي رجوع السائل المنوي للمثانة بدل من خروجه من القضيب.
ولو عايز تعرف معلومات أكثر عن شروط تحليل السائل المنوي ، اسمع الفيديو ده مع الدكتور اسامة البكل….
2- لازم كمان نعمل تحاليل للهرمونات ، زي هرمون FSH وLH وهرمون التستوستيرون والبرولاكتين وهرمون الانوثة ، و هنا هيكون قدمنا احتمالين :
- اما اننا هنلاقى نسب الهرمونات طبيعيه ، و ده هيكون معناه ان انعدام الحيوانات المنوية سببه وجود انسداد في القنوات المنوية أو البربخ .
- او اننا هنلاقى زيادة في نسبة FSH وLH، وانخفاض في هرمون الذكورة ،؟ و ده معناه ان الخصية فشلت في إنتاج الحيوانات المنوية .
بعد فحص التحاليل ، بنحتاج اننا نعرف اكتر عن التاريخ المرضى و شويه معلومات عن المريض زى :
- حالة المريض الصحية بشكل عام ، و هل بيشتكى من اى امراض .
- و بنعرف التاريخ الجنسي، خصوصًا هل حصل للمريض اى عدوى او التهابات تناسلية.
- و بنعرف كمان مستوى الرغبة الجنسية.
- و إذا كان المريض عنده أطفال ولا لا.
- إذا كان المريض بيستخدم أدوية معينة زي العلاج الكيماوي.
- و لو كان المريض خضع لعمليات جراحية في الجهاز التناسلي قبل كده ولا لا.
و بعد كده بتيجى المرحلة الثانية من التشخيص و هى الفحص و اللى بيتقسم لنوعين :
- الفحص السريري ، و هنا بيتم فحص الخصيتين والبروستاتا وكيس الصفن .
- و فحص بالموجات فوق الصوتية عشان نقيم وضع الخصيتين والبربخ والحبل المنوي و نتأكد من وجود القنوات المنوية والحويصلات المنوية و هل فيها اى انسداد ، ده غير اننا كمان بنشوف هل فيه مشاكل في البروستاتا زي الالتهابات او التكيسات.
و بعد ما عرفنا ازاى بنشخص انعدام الحيوانات المنوية ، خلونا نيجي بقى لمرحلة العلاج:
و العلاج هنا بيتحدد على اساس سبب الانعدام بمعنى ان ،
- لو انعدام الحيوانات المنوية كان بسبب خلل في الهرمونات ،فالعلاج بيكون هرموني، بمعنى اننا بنستخدم ادوية عشان نعوض بيها نقص هرمون FSH وLH، او ادويه عشان نقلل بيها هرمون البرولاكتين او هرمون الانوثة لو لقينا نسبتهم مرتفعه ، علشان الخصية تقدر تشتغل بشكل طبيعي وتنتج حيوانات منوية .
- اما لو سبب انعدام الحيوانات المنوية كان انسداد فى القنوات المنوية ، و قتها العلاج
- اما بيكون جراحي باستخدام الميكروسكوب عشان نعالج الانسداد ونعمل توصيلة عشان الحيوانات المنوية تخرج
- او عن طريق سحب عينة من الخصية بالابرة تحت التخدير الموضعي عشان نستخرج الحيوانات المنوية من الخصية على طول و نعمل بيها حقن مجهري
- لكن بقى لو السبب فى انعدام الحيوانات المنوية كا ضعف في الخصية ، فهنا العلاج بيكون جراحي ، عن طريق اننا بنعمل عملية استكشافية للخصية تحت تكبير الميكروسكوب الجراحي عشان ندور على البؤر المنوية الكويسة ونستخرج منها الحيوانات المنوية ونستخدمها في الحقن المجهري ،
و هنا لازم نعرف معلومة مهمة ان لو كان عندنا دوالي على الخصية بدرجة كبيره ، فممكن اننا نحتاج فى الاول عملية جراحية بالمكروسكوب عشان نربط الدوالي ، لان ممكن تكون هى السبب اصلا فى ضعف الخصية
في النهاية، لازم نكون عارفين ان علاج انعدام الحيوانات المنوية حاجة سهلة سواء كان من خلال معالجة الهرمونات او الانسداد او الدوالي بالميكرسكوب واستعادة الخصية وظيفتها الطبيعية في تصنيع وإنتاج الحيوانات المنوية، أو من خلال التفتيش عن الحيوانات المنوية واستخراجها من الخصية لاستخدامها في عمليات الحقن المجهري.
لو عايز تعرف طريقة استخراج الحيوانات المنوية من الخصية اضغط هنا….