ازاى نعالج تشوه الحيوانات المنوية ؟
علاج تشوه الحيوانات المنوية مبقاش حاجة صعبة زي ما كان زمان ، لان بفضل التقدم العلمي والتكنولوجي بقي موجود دلوقتي حلول كتير جدا عشان نعالج بيها مشكلة تشوه الحيوانات المنوية.
و دلوقتى تعالوا نعرف مع بعض اى هى الطرق اللى نقدر نعالج بيها تشوه الحيوانات المنوية ؟
اول حاجة لازم نعرفها ان الطريقة اللى هنعالج بيها تشوه الحيوانات المنوية بتتحدد على حسب سبب التشوه ايه بالظبط فلو كان السبب فى تشوه الحيوانات المنوية
- دوالي الخصية ، الحل هنا هيكون اننا نعالج دوالى الخصية عن طريق ربطها بالجراحة الميكروسكوبية ، العملية دي بتقلل نسبة الحيوانات المنوية المشوهة ، و ده معناه اننا عندنا حيوان منوى سليم يقدر انه يخصب بويضة
- اما لو كان سبب تشوه الحيوانات المنوية التدخين ، فلازم فى الحالة دى اننا نبطل تدخين عشان التشوه يقل و يبقى عندنا حيوان منوى سليم
- و لو السبب كان خلل فى الهرمونات فعلاجنا هنا هيكون ادوية منشطة للخصية
و فى حالة اننا عالجنا سبب تشوه الحيوانات المنوية ، بس لسه عندنا نسبة تشوه عاليه فى الحالة دى هيكون عندنا حلين
- اننا ناخد عينة سائل منوى و نعمل بيها تلقيح صناعى
- اما بقى الحل التانى و ده بنلجأله لو مقدرناش نلاقى حيوانات منوية سليمة فى عينة السائل المنوى ، و هو اننا نستخرج الحيوانات المنوية من الخصية ، و ده بيكون بطريقتين :
1- السحب بالابرة او Fine Needle Aspiration (FNA)
و الاجراء ده بيكون بسيط جدا ، و المريض بيكون واخد بس بنج موضعى ، و كل اللى بنعمله اننا بأبره رفيعه جدا بندخل فى الخصية و بنبدأ اننا ندخلها فى الخصية عشان نسحب عينه من الانسجة الخصوية .
2- عملية التفتيش الميكروسكوبى او Testicular Sperm Extraction (TESE)
و الاجراء ده بنلجأله لو فشلنا فى اننا نطلع حيوانات منويه من الخصية بطريقة السحب بالابره ،
و العملية دى ممكن نعملها بالتخدير النصفي او الكلي ، و كل اللى بنعمله فى العملية جرح صغير في كيس الصفن عشان نوصل للخصية، و بنبدأ بعد كده اننا نستخدم الميكروسكوب الجراحى عشان نشوف الخصية بوضوح اكتر لان الميكروسكوب بيكبر الرؤية 40 ضعف ، و ده بيخلينا نقدر اننا ندور على الانابيب المنوية النشطة جوا الخصية ونستخرج الحيوانات المنوية السليمة والصالحة للتلقيح .
و دلوقتى بعد ما عرفنا اى اللى ممكن نعمله فى لو نسبة التشوهات مقلتش بالعلاج ، تعالوا نعرف مع بعض اى هى طرق التلقيح الصناعى ، و ازاى بنقدر اننا نفصل بين الحيوانات المنوية السليمة و الحيوانات المنوية المشوهه سواء من عينة السائل المنوى او من عينه الخصية
و هنبدأ دلوقتى بالتلقيح الصناعى و اللى بيكون ليه اكتر من طريقة و هنتكلم دلوقتى عن اشهر 3 طرق و هما :
1- التلقيح داخل الرحم او (IUI):
و الاجراء ده بيتم عن طريق اننا بناخد عينة السائل المنوى ، و بننتقي الحيوانات المنوية السليمة و بنحضرها، وبعدين بنحقنها على طول في رحم الزوجة وقت التبويض ، و الطريقة دي بتزود من فرص التلقيح الطبيعي ، بس عشان نقدر اننا نعمل التقنيه دى لازم عدد الحيوانات المنوية يكون اكتر من 5 مليون حيوان منوى فى الملى
2- التلقيح الصناعي (IVF):
و الاجراء ده بنعمله بعد ما نكون اخدنا عينه من الخصية نفسها و استخرجنا منها الحيوانات المنوية السليمه و مش بينفع نعمله بعينة من السائل المنوى ، و بعد كده بنبدا اننا نجمع البويضات من الزوجة ، و بعد كده بنحط البويضات او الحيوانات المنوية مع بعض فى المعمل و بنسيب الحيوانات المنوية تحاول تخترق البويضة لوحدها و تخصبها ، و اول ما الحيوان المنوى يخترق البويضة بنزرع الأجنة في رحم الزوجة
3 – الحقن المجهري (ICSI):
و ده نوع من التلقيح الصناعي، و هنا احنا بنحقن حيوان منوي واحد في البويضة على طول تحت الميكروسكوب ، و التقنية دي تعتبر من احسن التقنيات اللى ممكن نلجألها في حالات التشوهات المنوية، لأنها بتسمحلنا اننا نختار حيوان منوي سليم من العينة اللى اخدناها من الخصية و نحقنه على طول في البويضات الناضجة ، و بعد ما بنحقن البويضة بنحفظها في الحضانة من 3-5 ايام عشان نتابع تطور الأجنة، و بعد كده بنختار الأجنة المثالية في اليوم 3 او 5 بندخله إلى رحم الزوجة ، عن طريق أنبوب قسطرة رفيعه و مرنه عن طريق عنق الرحم ، و بعد العملية باسبوعين، بنعمل للزوجة تحليل دم عشان نتأكد ان الحمل حصل ، و النوع ده من التلقيح نسب نجاحة فى الطبيعى بتكون كبيره جدا ، بس بتقل لو سن الزوجة كان كبير
و دلوقتى تعالوا نعرف بقى ازاى بنقدر اننا نفصل بين الحيوانات المنوية السليمة و الحيوانات المنوية المشوهه و ده بيكون ليه طريقتين
- تقنيات IMSI او التصوير المجهري للحيوانات المنوية و اللي بنستخدم فيها تكبير عالي جدا عشان نقدر نختار حيوانات منوية سليمة .
- او تقنية MACS او الاختيار المغناطيسي للحيوانات المنوية اللي بنفصل فيها الحيوانات المنوية السليمة عن الحيوانات المنوية المشوهة باستخدام مغناطيس خاص.
لو عايز تعرفوا اكتر عن اسباب و اعراض تشوه الحيوانات المنوية ، هنضغط هنا…