ايه هي حالات انعدام الحيوانات المنوية اللي لازم تعمل تفتيش ميكروسكوبي داخل الخصية ؟
انعدام الحيوانات المنوية على قد ما هي جملة بتسبب قلق وخوف عند كثير من الرجالة، لأنهم بيكونوا معتقدين ان خلاص اتحكم عليهم بأنهم مش هيكونوا آباء، الا ان لسه في امل، ولسه في حالات بتعاني من انعدام الحيوانات المنوية عندهم فرصة يكون عندهم اطفال وده من خلال عملية التفتيش الميكروسكوبي.
ودلوقتي تعالوا نعرف مع بعض ايه هي الحالات اللي بتعاني من انعدام الحيوانات المنوية واللي حلها الوحيد هو التفتيش الميكروسكوبي
- الحالات اللي بتعاني من متلازمة كلاينفلتر
وده مرض بيحصل بسبب وجود خلل في جينات الشخص، بمعني ان في الطبيعي جينات الشخص بتتكون من 46 كروموسوم، اثنين منهم الكروموسومات الجنسية ( XX للإناث ، XY للذكور ) ، أما لو الشخص كان مصاب بمتلازمة كلاينفلتر، فده بيكون عنده كروموسوم X زيادة في الخلايا، بمعني ان عنده 47 كروموسوم XXY، وده بيحصل بسبب وجود خلل في مرحلة انقسام الخلايا أثناء توزيع الكروموسومات للجنين من الأب والأم، والمتلازمة دي بتسبب نقص في هرمون الذكورة و حجم الخصيتين بيكون اقل كتير من الطبيعي، ده غير كمان انها بتاثر على انتاج الخصية للحيوانات المنوية، وفي الحالة دي مش بيكون في اي فرصة لوجود حيوانات منوية في القذف.
والحالة دي حلها الوحيد هو عملية التفتيش الميكروسكوبي، وده اما بيكون قبلها فترة علاج او من غير فترة علاج، واللي بيحدد النقطة دي هو وضع مستوي هرمون الذكورة في الجسم، بمعني ان ان لو مستوي هرمون الذكورة طبيعي وعلاقته بمستوى هرمون الانوثة E2 طبيعية ساعتها هنعمل عملية التفتيش الميكروسكوبي مباشرة.
ولكن بيكون في نسبة كبيرة من الحالات بيبقي عندهم ارتفاع في نسبة هرمون الأنوثة E2، وانخفاض في نسبة هرمون الذكورة، ودول بيحتاجوا لفترة علاج هرموني الأول قبل عملية التفتيش الميكروسكوبي علشان نقلل من مستوى هرمون الانوثة ونرفع من مستوى هرمون الذكورة علشان يكون عندنا فرصة أكبر لنجاح عملية التفتيش الميكروسكوبي.
ولو عايز تعرف اكتر عن متلازمة كلاينفلتر وازاي بنشخصها وبنعالجها ، اسمع الفيديو ده مع الدكتور اسامة البكل…
2. الحالات اللي بيكون عندهم كسل في الخصية أو فشل وظيفي في أداء الخصية:
بعض الحالات الخصية مابتنتجش حيوانات منوية لأسباب متعددة زي:
- متلازمة كلاينفلتر
- وجود التهابات في الخصية (الالتهابات البكتيرية أو الفيروسية)
- دوالي الخصية
- الخصية المعلقة
- التعرض للعلاج الإشعاعي أو الكيماوي
- العادات الضارة زي التدخين
كل دى اسباب ومشاكل بتسبب فشل وظيفي للخصية وتخليها متنتجش حيوانات منوية، والحالات دي بيكون عندهم ارتفاع في مستوى هرمون FSH وLH مع صغر نسبي في حجم الخصيتين سواء كان حجمهم متوسط او صغير اوي، والحالات دي اغلبهم بيكون شبه مستحيل انهم يخرجوا حيوانات منوية في القذف، وعلاجهم الوحيد هو عملية التفتيش الميكروسكوبي سواء كان قبلها فترة علاج او لا على حسب الحالة ، ولو كنا محتاجين ناخد علاج ده بيكون عن طريق اننا بندي علاج هرموني نظبط بيه وضع باقي الهرمونات وننشط الخصية، لأن هرمون FSH وLH بتكون نسبتهم مرتفعة وهو ده اللي بنحكم بيه ان في فشل وظيفي في أداء الخصية.
ولازم تكون عارف ان في الحالات دي لو هرمون الذكورة منخفض، فاحنا بندي علاج هرموني عشان نرفع بيه مستوى هرمون الذكورة في الجسم، او لو في خلل في مستوى هرمون البرولاكتين فبندي علاج هرموني عشان نحسن مستوى نسبته في الجسم، علشان يكون عندنا اعلى فرصة لنجاح عملية التفتيش الميكروسكوبي.
3. الحالات اللي مش بيكون فيها سبب واضح لانعدام الحيوانات المنوية في القذف:
بمعنى ان المريض بيكون حجم الخصية عنده كويس، ووضع الهرمونات طبيعي، ومفيش دوالي في الخصية بدرجة كبيرة ماثرة عليه، ومفيش التهابات، بالتالي مفيش سبب واضح وقابل للعلاج، وحلها الوحيد هو التفتيش الميكروسكوبي، ولان كمان العلاج الهرموني وقتها مش هيكون ليه اي دور في الحالات دي ومش هيفرق في نتيجة التفتيش الميكروسكوبي ، لان في بعض الحالات ممكن نحتاج نعمل فحوصات جينية علشان نحدد لو كان في سبب جيني معروف ممكن يكون هو سبب انعدام الحيوانات المنوية.
إذا هي دي حالات انعدام الحيوانات المنوية اللي ملهاش علاج ممكن نستخدمه لاستخراج الحيوانات المنوية من الخصية واللي حلها الوحيد هو عملية التفتيش الميكروسكوبي.
ولو عايز تعرف اي حالات انعدام الحيوانات المنوية اللي حتي عملية التفتيش الميكروسكوبي مش حل وعلاج ليها ، اسمع الفيديو ده مع الدكتور اسامة البكل…
في النهاية، مهما اتقالك ان عندك انعدام في الحيوانات المنوية ومستحيل تكون اب، خلي عندك امل في قدرة ربنا سبحانه وتعالى ثم في العلاج، وأن أي مشكلة وليها حل بس اوعى تفقد الأمل، ولو قررت إنك تبدأ معانا رحلة علاجك، تقدر تتواصل معانا على رقم 01018874287 واحنا هنحدد لك ميعاد مع الدكتور اسامة محمد البكل مدرس واستشاري طب وجراحة أمراض الذكورة وتأخر الانجاب والصحة الجنسية بطب القصر العيني.