ما هي مراحل عملية التفتيش الميكروسكوبي داخل الخصية؟
زمان لما كان الزوجين بيحصل عندهم تاخر في الانجاب ، مكانوش بيدوروا على حل ، وكانوا بيرضوا بالأمر الواقع ، لكن دلوقتي ومع التقدم العلمي بقي في تقنيات حديثة لعلاج انعدام الحيوانات المنوية في السائل المنوي وحل مشكلة تاخر الانجاب ، وكانت بمثابة الأمل للحصول على طفل ، ومن أهم التقنيات دي عملية التفتيش الميكروسكوبي داخل الخصية.
ودلوقتي تعالوا نعرف مع بعض ايه هي عملية التفتيش الميكروسكوبي داخل الخصية :
عملية التفتيش الميكروسكوبي هي عملية جراحية بتستخدم في الحالات اللي بتعاني من انعدام الحيوانات المنوية في السائل المنوي ، وبتستخدم من أجل البحث والتفتيش عن الانابيب والبؤر المنوية الصالحة في الخصية علشان نستخرج منها الحيوانات المنوية السليمة ونستخدمها في عملية الحقن المجهري.
ودلوقتي تعالوا نعرف ايه هي مراحل عملية التفتيش الميكروسكوبي :
في البداية لازم تكون عارف ان عملية التفتيش الميكروسكوبي بتم بعدة مراحل :
- مرحلة ما قبل عملية التفتيش الميكروسكوبي : بمعنى أن في تحاليل وفحوصات لازم نعملها قبل العملية عشان ميكونش في اي مضاعفات بعد العملية ، وعشان يكون عندنا اعلى فرصة لنجاح العملية ، زي :
1/ لازم في الاول نعمل تحليل سائل منوي ويكون أكثر من مرة ، ويكون في وقت بين التحليلين على الاقل اسبوعين ، علشان نتاكد من وجود انعدام في الحيوانات المنوية في السائل المنوي.
2/ ولازم نعمل تحليل الهرمونات fsh و lh اللي مسؤولين عن انتاج الحيوانات المنوية في الخصية ، عشان لو لقينا نسبتهم قليلة في الجسم ، لازم ناخد فترة علاج هرموني لمدة 3 شهور علشان نظبط مستوي الهرمونات في الجسم ، وبعد العلاج بنعمل تحليل سائل منوي تاني ، لان في نسبة كبيرة من الحالات بتتحسن مع العلاج ، والخصية بتطلع حيوانات منوية ومش هنحتاج نعمل تفتيش ميكروسكوبي ، لكن لو كانت نتيجة تحليل السائل المنوي بتوضح ان في انعدام في الحيوانات المنوية في السائل المنوي بعد العلاج ، في الحالة دي هنعمل العملية بس واحنا مطمنين أننا ظبطنا مستوي الهرمونات في الجسم.
3/ ولازم نعمل تحليل جيني قبل عملية التفتيش الميكروسكوبي ، لان في بعض المشاكل الجينية للاسف مش بيكون ليها علاج ، وفرص اننا نلاقي حيوانات منوية في الخصية بتكون ضعيفة جدا ، بس علشان نكون وفرنا على نفسنا تعب وتكاليف مادية كتير.
4/ ولازم لو كان عندنا دوالي في الخصية من الدرجة الثانية أو الثالثة ، لان الدوالي بتضعف وظيفة الخصية في انتاج الحيوانات المنوية ، فالاول نعالج الدوالي علشان الخصية ترجع تاني تنتج حيوانات منوية ، وبكدة ممكن يطلعلنا حيوانات منوية في السائل المنوي ومنحتجش نعمل تفتيش ميكروسكوبي ، لكن لو مطلعتش حيوانات منوية في السائل المنوي بعد عملية الدوالي ، في الحالة دي هنعمل عملية التفتيش الميكروسكوبي ، بس واحنا مطمنين ان الخصية نشطة وبتنتج حيوانات منوية ، وده هيزود من فرص نجاح عملية التفتيش الميكروسكوبي داخل الخصية.
- مرحلة وقت عملية التفتيش الميكروسكوبي :
1/ لازم الجراح اللي هيعمل العملية يكون متخصص وعنده خبرة ، عشان يعرف يميز بين الأنابيب المنتفخة اللي فيها حيوانات منوية بكميات أكبر ، وبين الأنابيب المنكمشة اللي فيها حيوانات منوية بكميات أقل.
2/ ولازم المكان اللي هنعمل فيه العملية يكون مجهز وفيه معمل اجنة ، علشان يستلم العينة اول ما تطلع من الخصية ويستخرج منها الحيوانات المنوية اللي هنعمل بيها حقن مجهري ، ويجمد الحيوانات المنوية اللي جودتها كويسة ، علشان منحتجش نعمل عملية ونفتح الخصية في كل مرة عاوزين نخلف فيها.
3/ والعملية هنا بنقدر نعملها ببنج نصفي أو كلي.
4/ وبنبدا نعمل فتحة صغيرة جدا في نص كيس الصفن علشان ميكونش ليه اي اثر بعد العملية ، وبعدها بنبدا نخرج الخصية برة كيس الصفن ونعمل فيها فتحة علشان نقدر نشوف كل انسجة الخصية.
5/ وبعدها بنبدا نستخدم الميكروسكوب الجراحي لانه بيكبر الرؤية لحد 40 ضعف ، وبنبدا ندور علي الانسجة اللي فيها الانابيب المنوية منتفخة ، وبعدين نبدا نخرج الأنابيب المنتفخة من غير ما نقص النسيج كله.
6/ وبعدها بنبعت الانسجة دي للمعمل عشان يستخرج منها الحيوانات المنوية السليمة اللي هنعمل بيها حقن مجهري.
7/ وبعد كده بنقفل الجرح اللي عملناه في الخصية و نرجعها تاني مكانها في كيس الصفن ، ونقفل كيس الصفن بغرز تجميلية ، وبكدة العملية خلصت.
- مرحلة ما بعد عملية التفتيش الميكروسكوبي :
1/ بعد العملية ممكن تحس بألم أو تورم في كيس الصفن ، لكن ده بيكون الم بسيط جدا وبيروح بالمسكنات و بالكمادات الباردة.
2/ ولازم نحافظ علي نظافة الجرح لمنع حدوث أي عدوى أو بكتيريا.
3/ ولازم نتجنب اي مجهود شاق بعد العملية لمدة أسبوعين.
ولو عايز تعرف ايه هي حالات انعدام الحيوانات المنوية اللي لازم تعمل تفتيش ميكروسكوبي من الخصية ، اسمع الفيديو ده مع الدكتور اسامة البكل….
في النهاية ، لازم تكون عارف ان اي مشكلة هتواجهك وهتسبب لك انعدام في الحيوانات المنوية وتاخر في الانجاب ، فهي ليها علاج ، المهم أننا نتشخص صح ونمشي على خطة علاج مناسبة لحالتنا علشان يكون عندنا بدل الطفل اثنين وثلاثة.
ودلوقتي لو قررت انك تاخد خطوة العلاج ، تقدر تتواصل معانا على الرقم ده 01018874287 واحنا هنحددلك ميعاد مع الدكتور اسامة محمد البكل مدرس واستشاري طب وجراحة امراض الذكورة وتاخر الانجاب والصحة الجنسية بطب القصر العيني.