ما هي حالات العقم وتأخر الإنجاب عند الرجال وعلاجها؟
دائماً كنت بنسمع أن مشكلة العقم أو تأخر الإنجاب بيكون السبب الرئيسي فيها هي الزوجة ، ولكن أثبتت الإحصائيات أن ثلث حالات العقم بيكون بسبب الزوج.
وتأخر الإنجاب عند الرجل بيتمثل في عدم قدرة الحيوان المنوي على الوصول إلى البويضة وتخصيبها لحدوث الحمل ، وده بيكون نتيجة لأسباب كثير جداً ، بس لازم تكون عارف أن نسبة كبيرة من حالات العقم وتأخر الإنجاب عند الرجل بتكون قابلة للعلاج.
ودلوقتي تعالوا نعرف مع بعض
ايه هي حالات العقم وتأخر الإنجاب عند الرجل :
في البداية لازم تكون عارف أن الموضوع بسيط جدًا ، لأن الحمل مش بيحتاج غير حيوان منوي واحد بس علشان يقدر يوصل للبويضة ويخصبها في قناة فالوب ويحصل حمل طبيعي ، لكن وجود عدد كافي من الحيوانات المنوية السليمة واللي بتتحرك حركة جيدة علشان تساعد الحيوان المنوي في الوصول للبويضة وتخصيبها ، بالتالي أي مشكلة هتأثر على وصول الحيوانات المنوية للبويضة هتسبب العقم أو تأخر الإنجاب ، زي:
1/ دوالي الخصية : هي عبارة عن تضخم في الأوردة المحيطة بالخصية الموجودة داخل كيس الصفن ، وبتؤدي إلى ارتفاع درجة حرارة الخصية ، وده بدوره بيأثر سلبا على إنتاج الحيوانات المنوية من حيث عددها وحركتها وشكلها ، ده غير انها بتسبب انخفاض في هرمون التستوستيرون في الجسم.
2/ العدوى البكتيرية والفيروسية في الخصية : بمعنى أن العدوى في الجهاز التناسلي كالأمراض المنقولة جنسيا ، زي التهاب الخصية أو التهاب البربخ ، قد تؤثر على وظيفة الخصية وإنتاجها للحيوانات المنوية.
3/ مشاكل القذف ومنها ( القذف المرتجع ) : بمعنى أن وقت القذف بيخرج السائل المنوي من مجرى البول في القضيب الى عنق الرحم ، ولكن في حالة القذف المرتجع ، السائل المنوي بيعود إلى المثانة بدلاً من خروجه من مجرى البول ، والسبب في ده أن في عضلة صغيرة في عنق المثانة ، و اللى وقت القذف بتتقفل عشان تمنع دخول السائل المنوي للمثانة ، بس في بعض الحالات بيحصل ضعف في عضلة المثانة ، ساعتها فتحة المثانة مش هتتقفل وهيدخل السائل المنوي فيها.
4/ الخصية المعلقة : ودي حالة مرضية بتحصل للأطفال الذكور بعد الولادة مباشرة ، و هنا الخصية مش بتنزل لكيس الصفن و بتفضل متعلقة فى البطن ، ولازم نعالجها قبل عمر سنة ونصف على يد جراح متخصص ، لأن لو اتأخرنا في علاجها ، ده هيسبب مشاكل كتير جداً في الإنجاب.
ولو عايز تعرف اي علاقة الخصية المعلقة بتأخر الانجاب عند الرجل ، اسمع الفيديو ده مع الدكتور اسامة البكل…
5/ الإصابة بالأمراض السرطانية : لأن التعرض للعلاج الإشعاعي والكيماوي بيأثر على الخصية وعلي إنتاجها للحيوانات المنوية ، علشان كده بننصح اللي بيتعرضوا للعلاج الكيماوي أنهم يجمدوا عينة من الحيوانات المنوية علشان يستخدموها بعد التعافي في عملية الحقن المجهري.
6/ الاجسام المضادة : بمعنى أن جهاز المناعة في الجسم بيهاجم الحيوانات المنوية باعتبارها أجسام غريبة وبيفرز ضدها مضادات اكسدة ممكن تتسبب في موت الحيوانات المنوية.
7/ وجود انسداد في القنوات المنوية : بمعنى أن لو في انسداد في القنوات المنوية أو في الحبل المنوي ، ده هيمنع خروج الحيوانات المنوية واختلاطها مع السائل المنوي وقت القذف ، وهيتسبب في انعدام الحيوانات المنوية.
8/ الخلل الهرموني : بمعنى أن لو في اي خلل في مستوى هرمون الذكورة أو خلل في مستوى هرمون الأنوثة ، أو في هرمون fsh , lh وهرمون البرولاكتين ، ده هيتسبب في قصور في وظيفة الغدد التناسلية وهيأثر على إنتاج الحيوانات المنوية.
9/ التدخين بشراهة : وده لأن مادة النيكوتين الموجودة فى السجائر بتعمل ضيق في الأوعية الدموية الموصلة للعضو الذكري ، وده بيقلل من تدفق الدم إلى القضيب وبيسبب ضعف انتصاب ، و بيأثر كمان على الإنجاب لأنه بيقلل من وظيفة الخصية في تصنيع الحيوانات المنوية.
ودلوقتي بعد ما عرفنا إيه هي حالات العقم وتأخر الإنجاب عند الرجل، تعالوا نعرف إزاي نعالجها:
في البداية لازم تكون عارف أن لكل مشكلة حل وعلاج ، وأن نسبة كبيرة من الحالات دي بتكون قابلة للعلاج وبتقدر بعد كدة أنها تخلف ، فلو كان السبب في العقم أو تأخر الإنجاب :
1/ دوالي الخصية : هنعالجها باستخدام الجراحة الميكروسكوبية علشان نربط الدوالي ، ونحسن من طبيعة تدفق الدم داخل الأوردة السليمة ، وننشط الخصية علشان تنتج الحيوانات المنوية.
2/ أما لو كان السبب وجود التهابات في الخصية ، هنعمل مزرعة سائل منوي علشان نحدد نوع البكتيريا ، والمضاد الحيوي المناسب ليها.
3/ أما لو كان السبب في القذف المرتجع : وقتها هناخد أدوية علشان ننشط عضلة عنق المثانة ويرجع السائل المنوي يخرج تاني من مجري البول.
4/ لكن لو كان السبب خلل في الهرمونات : العلاج هيكون بالأدوية علشان ننشط الخصية ونظبط مستوي الهرمونات في الجسم.
5/ ولو كان السبب في التدخين : العلاج هو الإقلاع عن التدخين عشان نحسن من صحة وجودة الحيوانات المنوية.
في النهاية ، لازم تكون عارف ان مش علشان اتقالك انك بتعاني من العقم أو تأخر في الإنجاب ، انك تفقد الامل وتقول خلاص مستحيل اكون أب ، لازم تكون مستبشر خير في العلاج ، لأن في حالات كتير جداً بتتعالج وبيكون عندها فرصة كبيرة في الإنجاب.
ولو فكرت وعاوز تتابع معانا حالتك ، تقدر تتواصل مع الفريق الطبي علي الرقم ده 01018874287 وهما هيحددولك ميعاد مع الدكتور أسامة محمد البكل مدرس واستشاري طب وجراحة أمراض الذكورة وتأخر الإنجاب والصحة الجنسية بطب القصر العيني.