هل ارتفاع هرمون الأنوثة عند الرجال يسبب العقم؟
الهرمونات في جسم الإنسان بيكون ليها تأثيرات مختلفة على شكل ووظيفة الجسم زي نمو الجسم والتمثيل الغذائي والوظيفة الجنسية ، وواحد من أهم الهرمونات دي هو هرمون الاستروجين وعلى الرغم من أنه هرمون أنثوي ، إلا انه بيكون موجود في جسم الرجل ولكن بنسب متوازنة ، ولو نسبته قلت أو زادت عن النسبة الطبيعية ساعتها بيكون ليه اضرار كتير جدا أهمها العقم أو تأخر الإنجاب.
ولكن قبل ما نتكلم عن علاقة هرمون الأنوثة بالعقم عند الرجل ، خليني الاول اقولك
ايه هو هرمون الاستروچين او هرمون الانوثة :
هرمون الأستروجين هو هرمون بيتفرز في الجسم بسبب انزيم اسمه اروماتيز ، و الانزيم ده بيكون موجود في الخصيتين أو في البروستاتا أو في الخلايا الدهنية في الجسم كله.
ولازم تكون عارف أن هرمون الاستروجين بيكون ليه دور عند الرجل زي هرمون التستوستيرون في تنظيم وظيفة الخصية وتعزيز الرغبة الجنسية وحدوث الانتصاب وكذلك إنتاج الحيوانات المنوية.
ودلوقتي خليني اجاوب ع سؤالك…
هل ارتفاع هرمون الأنوثة عند الرجل يسبب العقم؟
بس في البداية لازم تكون عارف أن زي ما جسم الرجل بيكون محتاج لهرمون الاستروجين علشان يعمل بشكل طبيعي ، إلا أنه لو زاد عن النسب الطبيعي ، هيسبب مشاكل كتير على القدرة الإنجابية زي العقم ، لان ارتفاعه هيؤدي إلى انخفاض هرمون الذكورة اللي بيكون ليه تأثير على انتاج الخصية للحيوانات المنوية ، وبكدة نقص هرمون الذكورة هيسبب نقص في عدد الحيوانات المنوية وضعف في حركتها وزيادة في نسبة تشوهات الحيوان المنوي وكل ده هيكون السبب في الاصابة بالعقم او تاخر الانجاب.
ولو عايز تعرف ازاي بنعالج حالات انعدام الحيوانات المنوية ، اسمع الفيديو ده مع الدكتور اسامة البكل…
ودلوقتي تعالوا نعرف مع بعض ايه هي الأسباب اللي ممكن تؤدي إلي ارتفاع هرمون الأنوثة عند الرجال :
1/ خلل في الهرمونات : بمعنى أن وجود أي خلل في الغدة التناسلية هيؤدي إلى اضطراب الهرمونات زي انخفاض هرمون الذكورة وارتفاع هرمون الأنوثة عن المعدل الطبيعي.
2/ أو بسبب فرط في نشاط انزيم الاروماتيز اللي هيحول هرمون الذكورة الي هرمون أنوثة.
3/ السمنة المفرطة : لأن السمنة من الأمراض الصحية الخطيرة اللي بتسبب مشاكل كتير جدا ، لأن بسبب زيادة نشاط انزيم الاروماتيز وتراكم الدهون في الجسم ، هيحصل انخفاض في هرمون التستوستيرون ، وهيحول هرمون الذكورة إلى هرمون أنوثة ، و هيخلي توازن الهرمونات في الجسم يضطرب.
4/ وأخيرا ومع التقدم في العمر بيحصل انخفاض طبيعي في مستوى هرمون التستوستيرون، وده ممكن يؤدي إلى زيادة نسبة هرمون الأنوثة في الجسم.
ودلوقتي تعالوا نعرف ايه هي الأضرار اللي هتحصل لو ارتفع هرمون الأنوثة عند الرجل عن المعدل الطبيعي :
مهم تبقي عارف ان ارتفاع هرمون الأنوثة عند الرجل عن المعدل الطبيعي هيسبب :
- نقص في هرمون الذكورة.
- ده غير انه هيسبب نقص في هرمونات fsh, lh وساعتها الخصية هتتوقف خالص عن إنتاج هرمون الذكورة وإنتاج الحيوانات المنوية ، لأن زي ما قولنا قبل كدة أن الهرمونات دي هي اللي بتحفز الخصية على إنتاج الحيوانات المنوية ، وساعتها هيحصل انعدام في الحيوانات المنوية وهيؤدي إلى تأخر الإنجاب.
- وهيسبب ضعف في الرغبة الجنسية وضعف انتصاب لأن علشان تقدر تقيم علاقة زوجية ناجحة ويحصل انتصاب للعضو الذكري لازم يكون عندك رغبة جنسية كافية ، وهرمون الذكورة هو اللي مسؤول عن تحفيز الرغبة الجنسية وحدوث الانتصاب أثناء العلاقة الزوجية.
- ده غير ان ارتفاع هرمون الأنوثة عند الرجل هيسبب تضخم في الثدي.
ودلوقتي خليني اقولك ازاي نعالج ارتفاع هرمون الأنوثة عند الرجل :
وهنا لازم تكون عارف أن علشان تعالج المشكلة ، لازم الاول تعالج السبب الي ادي الي حدوث المشكلة من البداية ، بمعني أن لو كان السبب في ارتفاع هرمون الانوثة :
- وجود خلل في الهرمونات أو زياد نشاط انزيم الاروماتيز : وقتها لازم ناخد فترة علاج هرموني لمدة 3 شهور علشان نرجع هرمون الذكورة وهرمون الانوثة الي نسبتهم الطبيعية ، وبعدها كمان هترجع الخصية لنشاطها الطبيعي في إنتاج هرمون الذكورة وإنتاج الحيوانات المنوية ، وساعتها كمان الرغبة الجنسية والانتصاب مش هيكون فيهم اي مشكلة ، وهتقدر تقيم علاقة زوجية ناجحة.
- لكن لو كان السبب في إرتفاع هرمون الانوثه هو السمنة المفرطة : وقتها لازم نخس الاول ونبعد كمان عن الوجبات السريعة والأكل اللي مليان دهون ونلتزم بالاكل الصحي ، وبعدها هترجع الهرمونات لمعدلاتها الطبيعية.
وفي النهاية، لازم تكون عارف أن صحتك هي كنز لازم تحافظ عليه، وخاصة في الأمور اللي ليها علاقة بصحتنا الجنسية أو الانجابية، عن طريق أننا دايما نفحص نفسنا ونعمل تحاليل الهرمونات علشان نطمن علي صحتنا، ونلحق أي مشكلة قبل ما تكبر وساعتها ميكونش ليها علاج.
ولو احتجت تتابع معانا مشكلتك تقدر تتواصل معانا على الرقم ده 01018874287 واحنا هنحجزلك ميعاد مع الدكتور أسامة محمد البكل مدرس واستشاري طب وجراحة أمراض الذكورة وتأخر الإنجاب والصحة الجنسية بطب القصر العيني.